InfoHub Logo

كوپتەگەن ادامدار وتە اقىلدى، دارىندى جانە ەڭبەكقور، ءبىراق ولاردىڭ قولىنان تۇك كەلمەيدى. ال اقىل-پاراساتى ورتاشا، قابىلەتى ازداۋ ادامدار جەتىستىككە جىلدام جەتىپ جاتادى. بۇنداي ادىلەتسىزدىكتىڭ سەبەبى نەدە؟ قالاۋىنا جەتۋگە مۇمكىندىك بەرمەيتىن اقىلدىلاردىڭ باتىلسىزدىق تۇزاعى.

ءوزىڭىزدى ءبىر ورىننان جىلجي الماي تۇرىپ قالعانداي سەزىنىپ ءجۇرسىز بە؟ سىلىكپەڭىز شىعىپ، قۇر اينالىپ جۇگىرىپ جۇرگەندەي سەزىم بار ما؟ كوپتەگەن اقىلدى، بىلىكتى جانە ەڭبەكقور ادامداردىڭ پروبلەماسى نەدە؟ نەگە ولاردىڭ قولىنان تۇك كەلمەيدى دە، تالانتى مەن اقىلى ازداۋ ادامدار كوبىرەك تابىسقا جەتىپ جاتادى؟ سەبەبى بىرەۋ-اق. بۇل باتىلسىزدىق تۇزاعى. 

اقىلدى، قابىلەتتى ادامدار ارەكەتسىزدىك، ۇزاق تالداپ-ساراپتاۋ، جاعدايدى باسقاشا ويلاپ كورۋ جانە قولايلى ءساتتى كۇتۋ دەگەن باتپاققا باتىپ قالعان. اقىلى مەن قابىلەتى تومەندەۋ ادامداردىڭ جەتىستىككە جەتۋىنە ولاردىڭ بەلسەندى ۇستانىمى مەن جىلدام ارەكەتى سەبەپ بولادى. ءىس جۇزىندە كەز كەلگەن ارەكەت تارتىنشاقتىق پەن باتىلسىزدىقتان اناعۇرلىم ءتيىمدى.

اقىلدىلاردىڭ باتىلسىزدىق تۇزاعى

قاتە ارەكەتتەن گورى، باتىلسىزدىقتىڭ كەسىرىنەن كوبىرەك جوعالتاسىڭ.

سوپرانو اۋلەتى

اقىلى ازداۋ ادامدار مۇمكىنشىلىكتىڭ ءبارىن كورە بەرمەيدى. ولار انىعىراق، تيىمدىرەك بولىپ كورىنىپ تۇرعاندى تاڭداي سالادى. 2-3 ەسىكتىڭ ىشىنەن دۇرىستاۋىن تاڭدايدى دا، العاي قاراي زىرىلداپ جىلجي بەرەدى. ولار قاتەلەسىپ، ماڭدايىن سوعىپ جاتادى، دەگەنمەن العا جۇرە بەرەدى.

اقىلدىلاۋ، زيالىلاۋ ادامدار باسقاشا ارەكەت ەتەدى. ولاردىڭ كورگەن ەسىگى مەن ارەكەت نۇسقالارىنىڭ سانى كوبىرەك. ناتيجەسىندە ولار كوپتەگەن نۇسقالاردى قاراستىرا باستايدى، الداعى جاسالار قادامداردىڭ ءتۇر-تۇرىن ويلاستىرىپ، ەڭ قولايلى ءساتتى كۇتۋگە كىرىسەدى.

اقىلدى ادامداردىڭ سارابى مەن تالداۋى كوپ، بۇل ءوز كەزەگىندە اقپاراتتىڭ كوبەيە تۇسۋىنە، سوعان بايلانىستى ەسەپتىڭ ودان سايىن كۇردەلەنۋىنە اپارىپ سوعادى. ال شەكسىز تالداۋ ادەتتە شەشىمنىڭ قابىلدانباي قالۋىنا سەبەپ بولادى. ەسەپتەۋدە بەلگىسىزدىك پەن كەزدەيسوقتىق وتە كوپ، ال اقىلدىلار مۇندايدان سەسكەنەدى. اقىلدى ادامدار شەشىم قابىلداعاننىڭ وزىندە، كوبىنە كەشىگىپ قالادى. ول كەزدە پويىز كەتىپ قالعان.

ومىردە تابىستى بولۋ ءۇشىن شەشىم جاساۋدىڭ ماڭىزى  

ۇرەيلى جانە ارمانشىل باتىلسىزدىق جالقاۋلىققا ەرەدى دە، شاراسىزدىق پەن كەدەيلىككە سەبەپ بولادى.

ۋيليام شەكسپير

سول سەبەپتى اقىلدى ادامدار قالامايتىن نارسەمەن اينالىسىپ، ماماندىعىن نەمەسە قام-قارەكەت سالاسىن وزگەرتە الماي جۇرەدى. سوندىقتان اقىلدى ادامدار بولاشاعى مۇلدەم جوق، جالاقىسى ماردىمسىز جۇمىستى ىستەپ جۇرە بەرەدى. وسىلايشا تالانتتى ادامدار، مەگاپوليس نەمەسە استاناعا كەتىپ، ءوز ارماندارىن جۇزەگە اسىرۋدىڭ ورنىنا اۋىل مەن شاعىن قالالاردا ءومىرىن وتكىزۋدە.

ويلانىپ، بولۋى مۇمكىن نۇسقالاردى ەسەپتەۋ جامان ەمەس. ءبىر جەردە توقتاپ، قاجەتتى شەشىمدى قابىلداماۋ جامان. ءومىر بويى باتىلسىزدىق تۇزاعىنان شىعا الماۋ جامان.

دۇرىس شەشىمدى قالاي جاساۋ كەرەك؟

ويلانىپ-تولعانۋعا جاراتىلاتىن ەڭ ۇزاق ۋاقىتتى بەلگىلەپ قويىڭىز: ءبىر كۇن، ءبىر اپتا، ءبىر اي.

شەشىمنىڭ جاقسى/جامان تۇستارىن، پەرسپەكتيۆاسى مەن قاتەرلەرىن تالداپ، قاراستىرىپ شىعىڭىز.  

شىنايى جالپى احۋالدى كورە الۋ ءۇشىن جاعدايدى بەيتاراپ، ءادىل قاراستىرۋ.  

قىسقامەرزىمدى پايدا مەن كۇماندى ۇسىنىستارعا قىزىقپاۋ، جولاماۋ. 

ۇزاقمەرزىمدى پەرسپەكتيۆاعا جانە بولاشاق ناتيجەگە نازار سالۋ.

شەشىم قابىلداۋىعا ىقپال ەتەتىن فاكتورلاردى قاراستىرىپ شىعۋ، ولاردى تالداۋ.

قولدا بار اقپاراتقا سۇيەنىپ، بىرنەشە ۇزدىك شەشىمدى تاڭداپ الۋ. 

جاقسى اقىل-كەڭەس بەرە الاتىن تابىستى كىسىمەن اقىلداسۋ. 

جاقسى نۇسقالاردى ەگجەي-تەگجەيلى، جەتە ويلاستىرۋ. 

ويلانىپ-تولعاناتىن ۋاقىت اياقتالدى ما؟ ۇرەي مەن باتىلسىزدىق كەدەرگى بولۋعا تىرىسادى. 

قازىرگى ساتتە ەڭ دۇرىسى دەپ قابىلداعان شەشىمدى ۇزىلدى-كەسىلدى (قايتارىمسىز) قابىلداۋ.

شەشىم قابىلداۋ ءاردايىم تاۋەكەلدى، ەكىۇشتى بولادى. ءبىراق ودان وتكەن قاۋىپ-قاتەر — ەش تاۋەكەل ەتپەي، ءومىر بويى باتىلسىزدىق باتپاعىندا ءومىر ءسۇرۋ.

باتىلسىزدىق پەن ارەكەتسىزدىكتى ەمەس، ىس-ارەكەتتى قارۋ ەت. وزىڭە ويلانۋعا ءبىر كۇن، ءبىر اپتا نەمەسە ءبىر اي بەر دە، سوسىن شەشىم جاساپ، ىسكە كىرىس...

وقۋعا كەڭەس بەرەمىز:

شەشىم قابىلداۋدا تۇراقسىزدىق

---