InfoHub Logo

ەلىنىڭ سورپاعا شىعارى اتانعان قىڭىر مىنەزدى بالعاباي بولىس التى قاتىن الىپ، ءبىراق سولاردىڭ بىردە-بىرىنەن بالا سۇيمەپتى. قازانى مايلى، توسەگى جايلى، ءتورت تۇلىگى سايلى توپاي باي الپىستى القىمداعانىنا قاراماي، ات سابىلتىپ قالىندىق ىزدەي باستايدى. «ەل قۇلاعى ەلۋ» دەگەندەي، جاسىنان ءانشى اتانعان بالكۇمىستىڭ داڭقىن ەستىگەن باي وعان كوز سالادى.

قىز اۋىلىن ماڭايلاپ، ءۇي تىكتىرىپ، اق داستارحان جايىپ تاستايدى دا:

— اق ديدارىن كورسەتىپ، اسەم ءانىن ەستىرتسىن، — دەپ باي ءبىر جىگىتتى بالكۇمىسكە جىبەرەدى. قۇربى قىزدارىن ەرتىپ تابالدىرىقتان اتتاي بەرگەن بالكۇمىستى بالعاباي قارسى الىپ:

— بالكۇمىس، ىزدەپ كەلدىم سەنى الىستان،
قىرانداي ۇياسىنا قونعان-ۇشقان.
جاساتام كۇمىس وشاق، التىن كەسە،
جار بولساڭ جاقسىلىققا قول الىسقان، —

دەپ ءبىر سەرىگىنە شىعارتىپ جاتتاپ العان ولەڭىن ايتىپ، اڭىراپ قويا بەرەدى.

— جايىلعان ءدۇيىم ەلگە اتاعىڭ بار،
قالتاڭ توق، ۇستىندە اسىل شاپانىڭ بار.
تابىلار ءون بويىڭنان ءبىر عانا ءمىن —
يەگىندە قارسى تۇتام ساقالىڭ بار.
نە كەرەك كۇمىس وشاق، التىن كەسە،
تىلەگىن جاس جۇرەكتىڭ وتەمەسە،
ايتشى اتا، ون جەتىڭدە قايتەر ەدىڭ،
كەمپىرگە الپىستاعى نەكەلەسە، —

دەپ توقتايدى دا، ۇيدەن شىعا جونەلەدى.

---