InfoHub Logo

اقتوبە قالاسىنىڭ قارعالى اۋىلىنداعى №53 ورتا مەكتەپتىڭ ءمۇعالىمىن ورىس تىلىندە دۇرىس سويلەمەگەنى ءۇشىن جۇمىستان شىعارىپ جىبەرگەن دەپ حابارلايدى kerek-info ءتىلشىسى.

بەس جىلدىق تاجىريبەسى بار ماماننىڭ بىلىمىنە اتا-انالار كۇدىك كەلتىردى. ولارعا مەكتەپالدى دايىندىق كلاسىنا جەتەكشىلىككە بارعان ءمۇعالىمنىڭ ورىسشاسى ۇناماي،  جاقىندا عانا جۇمىسقا تۇرعان باستاۋىش سىنىپ ءمۇعالىمىن جۇمىستان شىعارۋدى تالاپ ەتكەن.

بۇل جاعدايدى مەكتەپ ديرەكتورى ءجانيا رومانوۆا ءتۇسىندىرىپ بەرىپ، ءمۇعالىم جۇمىستان ءوز ەركىمەن كەتكەنىن ايتتى.

"ءبىز – ارالاس مەكتەپپىز. ورىس كلاستارىنا ساباق بەرەتىن مامان وتە تاپشى. ەكى مەكتەپالدى دايىندىق كلاسىنا ءمۇعالىم جوق. ءمۇعالىم بۇرىن بەس جىل ورىس مەكتەپتەرىندە، بالاباقشالاردا جۇمىس جاساعان. ەڭبەك كىتاپشاسىندا ءبارى جازۋلى تۇر. مەنىڭ الدىما كەلگەندە دە ورىس تىلىندە ەركىن سويلەپ تۇردى. تاجىريبەسى بار ءمۇعالىم بولعان سوڭ قىزمەتكە الدىق. ءۇش ايلىق سىناق مەرزىمىمەن ءوز جۇمىسىنا كىرىسكەن بولاتىن. بۇل توپتى 14 قىركۇيەككە دەيىن جوعارى دارەجەلى ءمۇعالىم ۆالەنتينا پەتروۆا وقىتقان ەدى. جاس مامان كەلگەن سوڭ، دايىندىق سىنىبىن وسى مۇعالىمگە تاپسىردىق. مەكتەپالدى دايىندىق كلاسىنداعى ءبىر وقۋشىنىڭ اتا-اناسى مەكتەپ اكىمشىلىگىنە ەسكەرتپەستەن ءمۇعالىمنىڭ ساباعىنا كىرگەن. سوندا ءمۇعالىمنىڭ ساباق بەرۋ ءادىسى ۇناماعان بولۋ كەرەك، كەيىن 12 اتا-انا قول قويعان ارىز-شاعىم الدىم. مەنىڭ ويىمشا، اتا-انالار بۇعان دەيىن ساباق بەرگەن ءمۇعالىمدى قايتارىپ العىلارى كەلگەن سياقتى. ويتكەنى، ول كوپ جىلعى تاجىريبەسى بار، جوعارى كاتەگوريالى مامان. ءبىراق، بىزگە كەلگەن جاس ماماندى ءبىز وقىتىپ، ۇيرەتۋگە مىندەتتىمىز. جاڭا وقۋ جىلى باستالماي جاتىپ، اتا-انالار تاراپىنان وسىنداي جاۋاپ العان ءمۇعالىم ءوز ەركىمەن جۇمىستان كەتتى،- دەدى ول.

جاڭادان كەلگەن جاس ماماننىڭ بىلىكتىلىگىنە كۇمان كەلتىرگەن اتا-انالاردىڭ ءبىرى ايجان بىلاي دەيدى:

- جاس ءمۇعالىمنىڭ جەكە باسىندا جۇمىسىم جوق. ءبىراق، ول ورىس تىلىندە مۇلدەم ءبىلىم بەرە المايدى. قازاقشا ويلاپ، ونى ورىس تىلىنە اۋدارىپ جەتكىزەدى. بالالارعا تەرىس ءبىلىم بەرەتىن ءمۇعالىم كەرەك ەمەس. بالامىز ۇيگە كەلگەن سوڭ سوزدەردى قاتە ايتادى. ورىسشا اكسەنتپەن سويلەيدى.

№53 ورتا مەكتەپتىڭ مەكتەپالدى دايىندىق كلاسىندا 22 وقۋشى وقيدى. وسى كلاستىڭ تاعى ءبىر اتا-اناسى ساۋلە قۇلسارينانىڭ ايتۋىنشا، وسى وقيعادان كەيىن سىنىپ ەكى توپقا بولىنگەن.

"نەگە قارسى بولىپ جاتقانىن تۇسىنبەيمىن؟ وتە ءبىلىمدى، سىپايى، سابىرلى قىز ەدى. بالالارىمىزدى شىعارىپ سالىپ، كۇتىپ الاتىن. قاشان دا بالالارمەن بىرگە جۇرەتىن. ايتقان اڭگىمەلەرى دە، ءسوز ساپتاۋلارى وتە ورىندى ءمۇعالىم ەدى. مىسالى، مەنىڭ بالام بالاباقشاعا قانشا جىل بارسا دا، ۇيرەنىسە المادى. ال مەكتەپكە تەز ءسىڭىسىپ كەتتى. ونىڭ ءوزى ءمۇعالىمنىڭ بالامەن وتە جاقسى جۇمىس جاسايتىنىن ءبىلدىرۋى كەرەك. ءقازىر اتا-انالار ەكى توپقا ءبولىندى، بىرەۋلەرى جاقتايدى، بىرەۋلەرى داتتايدى. مەن مۇندايدى تۇسىنە المايمىن، ءمۇعالىم اتا-اناعا ەمەس، باستىسى وقۋشىعا ۇناۋ كەرەك. ال جاس ءمۇعالىم وقۋشىلارعا ۇنايتىن"،- دەيدى ول.

اتاپ ايتۋ كەرەك، №53 ورتا مەكتەپتە  ءبىرىنشى سىنىپتاردان بەسەۋ. ولاردىڭ 4ء-ۋى ورىس تىلىندە وقيدى.

---