اش قاسقىردىڭ دامەسى
نەشە كۇننەن بەرى قاندى اۋزىنا قارا شىبىن دا ىلىنبەگەن ءبىر قاسقىر اۋىلدى تورىپ، قوراعا جاقىن كەلىپتى. جالعىز تال ءشيدى پانالاپ، جەر باۋىرلاپ، جان-جاعىنا الاقتاپ، ءبىر ءۇيدىڭ ىرگەسىنە تاياپتى. ءۇي ىشىنەن جىلاعان بالانىڭ داۋسى شىعادى.
— جىلاما، قوي ەندى، جىلاي بەرسەڭ، قاسقىرعا بەرە سالامىن، — دەپتى شەشەسى بالاسىنا.
— مەنىڭ اش جۇرگەنىمدى اۋىل كىسىلەرى دە بىلەدى ەكەن عوي، ەندى جىلاسا، بالاسىن ماعان بەرە سالار، — دەپ دامەلەنگەن قاسقىر ءۇيدىڭ ىرگەسىندە جاتا بەرىپتى. بالانىڭ جىلاۋىن كۇتىپتى. سول وتىرعاننان تاڭعا تايانعانشا وتىرىپتى.
ءبىر كەزدە كۇتكەنىندەي-اق، بالا تاعى جىلاپتى.
— جىلاما، بالام، قاسقىرعا بەرمەيمىن، ول ەندى كەلەتىن بولسا، ونى ۇرىپ ولتىرەمىن، — دەپ ۋاتىپتى شەشەسى.
— ادامداردان ماعان پايدا جوق ەكەن، ەندى تابانىمدى جالتىراتايىن، — دەپ قاسقىر ورنىنان قوزعالا بەرەدى. تاڭ راۋانداپ اتىپ قالعان ەكەن، تۇرىپ جاتقان ادامنىڭ كوزىنە تۇسكەن قاسقىر تۇس-تۇس جاقتان تاپ بەرگەن ۇلكەن كۇشتىڭ وتىندە قالادى.
بالادان دامە قىلعان قاسقىر اجالدىڭ قارماعىنا ءىلىنىپ، تەرىسى جايىلىپ، تىندىم بولادى.
You Might Also Like
-
حالقىمىزدىڭ تاريحىندا باراق بىرنەشەۋ بولىپ كەزدەسەدى. قايىم مۇحامەدحانوۆ ءوزىنىڭ ءبىر زەرتتەۋىندە «قازاق تاريحىندا ۇزىن سانى 12 باراق بولعان» دەگەندى ايتادى.
