استانا تۋرالى شىعارما
استانا – نۇرسۇلتان نازاربايەۆتىڭ ءوز جۇرەگىنە سىيعان تۇتاس الەمدى ءوز ەلى مەن حالقىنا دەگەن شەكسىز سۇيىسپەنشىلىگىنىڭ بەلگىسىندەي ەتىپ قاسيەتتى قازاق جەرىنە، ءوز دالاسىنا قوندىرىپ، ورنىقتىرا بىلگەن وزىندىك ءبىر الەمى! ابىرويى اسقان استانا! الەمدى ءسۇيءسىندىرىپ تاڭعالدىرعان استانا! دۇنيەگە داڭقى جايىلعان استانا! قازاق ەلىنىڭ باعىن جاندىرعان استانا! سول قازاق ەلىنىڭ بۇگىنگى ەلورداسى – استانا قالاسى جايلى سىر تولعار كوڭىل تۇكپىرىندە جاتقان وسى ءبىر ءۇش اۋىز ءسوزدىڭ ءدال وسى ءبىر ساتتە جۇرەكتەن ءۇن قاتارىن قايتەرءسىز! تاريحتىڭ اسا ءبىر قىسقا مەرزىمىندە بوي كوتەرىپ، الەمنىڭ ارىدەگى زاماندارىندا، ياعني عاسىرلاردان اسىپ تۇسەر كەزەڭدەردەن بەرى استانا بولىپ كەلە جاتقان تالاي دا تالاي ءبىر ايگىلى دە ايدىك قالالاردان ءوزىنىڭ ءسانى مەن سالتاناتىن دا، ساۋلەتى مەن داۋلەتىن دە اسىرىپ، ادامزاتتىڭ بۇگىنگى وركەنيەتى الدىنداعى ءوزىنىڭ تاريحي ميسسياسىن دا ادال اتقارىپ، ادام بالاسىنىڭ جاقسىلىقتار مەن تاتۋلىق، بىرلىك پەن ىنتىماقتاستىق جانە باۋىرمالدىق ءۇمىتىنىڭ شىراعىن جاعىپ كەلە جاتقان استانا داڭقى الەمگە قازاق ەلىنىڭ داڭقى بولىپ جايىلعاندىعىن دا ايتقان ءلازىم.
دۇنيە جارالعالى الەمدە بىردە-بىر مەملەكەتتىڭ استاناسى قاتارىمەن ءتورت ءمارتە الەم دىندەرى ليدەرلەرىنىڭ باسىن قوسىپ كورمەگەنى اقيقات. مىنە، سول باسقوسۋلار 2003 جىلدان بەرى ءبىزدىڭ استانامىزدا ءوتىپ كەلەدى. ۇلى تاريحتىڭ وسى ءبىر ۇلى جۇگىن لايىقتى كوتەرە بىلگەن استانانىڭ بۇگىنگى كۇنى ايداي الەم الدىنداعى ءجۇزى جارقىن، مەرەيى ۇستەم، ابىرويى اسقاق ەكەندىگى تاعى دا بار. استانا قالاسىمەن اسپانداعان دۇنيە الدىنداعى ابىرويىمىز جانە دە وسى ءبىر جارقىن دا ۇستەم مەرەيىمىز ءۇشىن ءبىز ەڭ اۋەلى ءبىر عانا ادامعا – قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازاربايەۆقا العىسىمىزدى ايتار ەدىك. – دۇنيە قايىرا ءبىر بولىسكە ءتۇسىپ، بوداندىقتىڭ بۇعاۋىنان باسىمىزدى ەندى شىعارىپ الا باستاعان تۇستا، ەس جينالىپ، ەتەك جابىلماي جاتقان شاقتا استانانى اۋىستىرماق تۇگىلى مىنگەن اتىڭنان اۋىپ ءتۇسىپ قالماۋدى عانا ويلار قيلى دا قيىن كەزەڭدە ەلباسى نۇرسۇلتان نازاربايەۆتىڭ الماتىداعى استانانى ارقاداعى اقمولاعا كوشىرۋ جونىندەگى ويىنا اۋەلدە بۇكىل ەل شوشىنا قارادى. سەنبەدى، سەنگىلەرى كەلمەدى. ال ەندى سارىارقا توسىندەگى تاۋەلسىز قازاق ەلىنىڭ بۇگىنگى استاناسى – استانا قالاسىنا ەل تاۋەلسىزدىگىنىڭ وتكەن كەزەڭدەردەگى ورىنتاعىنا شىعىپ قارايىق تا، كوز سالايىق. ايتارعا ءسوزىڭ جوق ! تاڭداي قاعىپ سۇيسىنەسىڭ دە، تاعى دا سول ەلباسىنىڭ ءوز قولىمەن ءوز ەلىنىڭ جاڭا ەلورداسىن سالعان، سالىپ تا جاتقان تاعى ءبىر كوزسىز ەرلىگىن مويىنداپ، سوعان باس يەر ەدىڭىز!، –دەگەن بۇدان بۇرىن دا ءبىر ايتقان پىكىرىمىزدى قايتالاي وتىرىپ، تاعى دا وسى اقيقاتقا جۇگىنگەندى ءجون سانادىق. – ءبىز الاتاۋدىڭ باۋىرىنداعى الماتىعا سىيا الماي ەمەس، الماتىنى قىيا الماي كەتىپ بارامىز، – دەگەن ەلباسىنىڭ وسى ءبىر اۋىز جۇرەكجاردى ءسوزى ەل مەن جەر تاعدىرى ءۇشىن باسىن بايگەگە تىگىپ بارا جاتقان ەردىڭ جۇرەك ءلۇپىلى مەن جاۋاپكەرشىلىگىندەي سەزىلەرى بار. «مەنىڭ تالاي جىلىم الماتىمەن بايلانىستى. وسىندا العاشقى نەمەرەلەرىم دۇنيەگە كەلدى. بۇل قالا مەنىڭ وزىمە دە، وتباسىما دا جانىمداي جاقىن» دەپ تۇرعان ەلباسىنىڭ («ەۋرازيا جۇرەگىندە»، 19-بەت) پەرزەنتتىك ادال كوڭىلى سول ادالدىقپەن ءتاۋەلسىز ەلدىڭ دە جاڭادان قالىپتاسا باستاعان تاعدىرىن دا كەڭىنەن پىشۋگە ماجبۇرلەدى. جەلمايامەن جەلىپ ءجۇرىپ، جەر ۇيىعىن ىزدەگەن اسانقايعى باباسىنداي تاۋەلسىز ەلى ءۇشىن ەندىگى جەر ۇيىعىن ىزدەگەن نۇرسۇلتان نازاربايەۆ ەسىلدىڭ بويىنا ەل قوندىرىپ، العاشقى قازىعىنان باستاپ ءوزى قاعىپ، ءبۇگىنگى ايدىندى دا ايبىندى اقوردالى استانانى دۇنيە اكەلگەندىگى ءبىزدىڭ، ياعني قازاق ەلىنىڭ ماڭگىلىك ەل بولا الاتىندىعىن ءدالەلدەپ، وسىعان ەڭ اۋەلى ءوز جۇرتىنىڭ دا، ودان قالدى دۇنيە جۇرتىنىڭ دا كوزدەرىن جەتكىزىپ، يلاندىرا بىلگەن ۇلىلىعى ەدى. ەندى كەلىپ، ءححى عاسىرداعى قازاق ەلىن جانە اتا-بابالارىمىز ءۇشىن عاسىرلار بويى ارمان بولعان تاۋەلسىزدىگىمىزدى بۇگىنگى استاناسىز كوز الدىڭىزعا ەلەستەتىپ ءبىر بايقاڭىزشى!
بۇل استانا تاۋەلسىزدىگىنىڭ ءلۇپ-لۇپ سوعىپ تۇرعان جۇرەگى ەمەس پە؟! بۇل استانا حالقىمىزدىڭ بارلىق ۇلى مۇراتتارىنىڭ بايتەرەك بولىپ تەرەڭگە تارتقان تامىرى، جايقالعان جاپىراعى ەمەس پە؟! بۇل استانا دوڭگەلەنگەن دۇنيەنىڭ قازاق يەلەنىپ وتىرعان قاسيەتتى ءبىر جەرىنە ورناتىلعان الەمنىڭ ءتورت بۇرىشىنان دا كوزگە ءتۇسىپ، كورىنەر، التىن تۇعىرلى ەڭ زاڭعار دا، ەڭ بيىك، ەڭ ابزال دا، ەڭ ءبىر ازبايتىن دا توزبايتىن ماڭگىلىگىنىڭ ماڭگىلىگى جولىندا مىڭ ءولىپ، مىڭ تىرىلگەن قازاق ءۇشىن سوعىلعان ۇلى ەسكەرتكىش! سول ۇلى دا قاسيەتتى، كيەلى ەسكەرتكىشتى قازاق حالقى ءۇشىن تۇرعىزىپ بەرگەن ەلباسى نۇرسۇلتان نازاربايەۆتى ءوز حالقىنىڭ الدىنداعى پەرزەنتتىك تە پرەزيدەنتتىك پارىزىنا ءاماندا ادال بولىپ كەلە جاتقاندىعىن جانە دە ءوز حالقى ءۇشىن نەبىر كوزسىز ەرلىككە بارا الاتىن، باتىل دا باتىر، دارا دا دانا قاسيەتىن ايعاقتاپ تۇر. بۇل استانا ەلباسىنا ءوزىنىڭ جەكە باسىنىڭ ابىرويى مەن بەدەلىن اسىرىپ، اسقاقتاتۋ ءۇشىن قاجەتتىلىگى شامالى ەكەندىگىن دە ەسكەرەيىك. نازاربايەۆتىڭ ءبىر باسىنىڭ اتاعى مەن ابىرويى، داڭقى مەن بەدەلى الەمگە ايگىلى، اقىلى مەن پاراساتى، سارابدال ساياساتكەرلىگى، ادامزاتتىڭ ادال دا شىنايى جاناشىرى رەتىندە بيىك ادامي قاسيەتى، كىسىلىك كەلبەتى دۇنيەگە تانىلعالى، مويىندالعالى قاشان! استانا ءوزىنىڭ بۇگىنگى الەمدىك وركەنيەتءتىڭ ساۋلەتىمەن دە، شالقىعان داۋلەتىمەن دە، ىنتىماعى، بىرلىگى جاراسقان اۋلەتىمەن دە، ماڭگىلىك تىرشىلىكتىڭ اسپانىنا ۇمتىلعان زاڭعار بيىگىمەن دە، نۇرلى دۇنيەگە نۇر شاشقان سامالا الاۋ جارىعىمەن دە، كورگەن جاندى ءسۇيسىندىرىپ، جانىڭا شۋاق قۇيار جىلۋىمەن دە، كەلگەن جاننىڭ بارلىعىن جاڭا ءبىر ۇمىتتەرمەن جەتەلەي جونەلەر كوشەسىمەن دە، سايا بولار جاسىل باعىمەن دە ەڭ اۋەلى قازاق بالاسى – ءبىز ءۇشىن، ءبىزدىڭ بولاشاعىمىزدىڭ، ءبىزدىڭ تاۋەلسىزدىگىمىزدىڭ ماڭگىلىگى ءۇشىن قاجەت ەكەندىگىن ۇعىناتىن كەز كەلدى! استانا ءبىر الەم بولسا، سول الەمدى تانىپ الا ءبىلۋ ءۇشىن اۋەلى قازاقى سەزىمتال ءجۇرەك پەن قازاقى جۇيرىك سەنىم، تۇيسىك كەرەك! ەلباسى تاريح بەرىپ وتىرعان مۇمكىندىكءتىڭ، ياعني تاۋەلسىزدىكتىڭ ارقاسىندا قازاق دالاسىنا سول الەم ورناپ قالسا ەكەن دەگەن ءبىر عانا ىزگى مۇراتتى كوزدەگەنى بار. الەمءنىڭ ءبىر-بىر بولشەگىن دالامىزعا اكەلىپ ورناتىپ بەرە العان ەلباسى بۇگىنگى استانانى سالۋ ارقىلى بارشا قازاق جۇرتىن ەگەمەندىك جولىندا ەرلىك جاساۋعا تالپىندىرسا، قازاق جۇرتىنا ايداي الەمدى سۇيسىندىرتە بىلگەن تاعى ءبىر كەمەڭگەرلىگى مەن ەرلىگى بولعاندىعىن ايتقان ءلازىم! انە، اقوردا! كوك كۇمبەزىنىڭ ۇشار باسىندا كوك بايراعى جەلبىرەپ اقوردا تۇر! كونە تاريحتىڭ كومبەسىندە قالعان، تالاي شاپقىنشىلىقتىڭ شاڭى مەن توپىراعىنىڭ استىندا كومىلىپ، جەرمەن جەكسەن بولعان تالايعى ءبىر وردالاردىڭ ورنىنا تىگىلگەن ارماندى اقوردا عوي بۇل! التىن قىران دا قاۋىرسىن قوس قاناتىمەن جەر الەمدى كوتەرىپ، ۇشىپ كەلىپ اقورداعا قونىپ تۇر انە! بۇل قازاقتىڭ اقورداسىنىڭ ۇشار باسىنداعى التىن قىران سول جەر الەمنىڭ ءۇمىتىن ارقالاپ، ەل مەن حالقىمىزدىڭ باسىنا قونعان باعى عوي! ۇركىتىپ الا كورمەيىك، كوز جازىپ قالىپ جۇرمەيىك سول قىراننان! ماڭگىلىگىن بەر وسى ءبىر ءۇمىت پەن تىلەكتىڭ! انە، «قازاق ەلى» مونۋمەنتى! اتا-بابالارىمىزدىڭ اقتالعان ءۇمىتى مەن ورىندالعان سانعاسىرلىق ارماندى ماقساتىنداي اسقاقتاپ، بۇگىنگى بارلىق قازاقستاندىقتاردىڭ اق نيەتىندەي اسپانعا بوي سوزىپ شانشىلعان شىنارىنداي اق تۇعىردىڭ ۇشار باسىندا بار كەڭىستىككە جايعان قۋاتتى قاناتىمەن دۇنيەگە ارىدەن كوز سالىپ وتىرعان دالانىڭ الىپ سامۇرىق قۇسى ەلباسىنىڭ «دۇنيەدە تاۋەلسىز قازاق ەلى بار.
الەمدە ەگەمەن قازاقستان بار. ونىڭ كوپ ۇلتتى، تاتۋ، ىنتىماقشىل حالقى بار. قۋاتتى ەكونوميكاسى، سەنىمدى ساياسي جۇيەسى بار. ەڭ باستىسى – بۇگىننەن نۇرلى، بۇگىننەن كەمەل بولاشاعى بار. سول كۇنگە بەرىك سەنىم بار!» دەگەن وسى ءبىراۋىز ءسوزىن الەمگە پاش ەتىپ تۇر! انە، قازاق ەلى مەن حالقىنىڭ كونە تاريحىنىڭ بەدەرلى بەلگىلەرىمەن ورنەكتەلگەن «ماڭگىلىك ەل» قاقپاسى! سول ماڭگىلىك ەلدىكءتى اقىل-پاراساتىمەن دە، ايبىندى ەرلىگىمەن دە، كەمەلدى شەشەن سوزىمەن دە ۇستاپ تۇرا العان حالقىمىزدىڭ قاسيەتتى بي-شەشەندەرى مەن ەرلەرى دە، «تايقازانى» سىندى كيەلى جادىگەرلەرى دە،تاۋەلسىز ەلىمىزدىڭ تۇڭعىش پرەزيدەنتى نۇرسۇلتان نازاربايەۆ سىندى بۇگىنگىنىڭ كەمەڭگەرىمەن دە كورىكتەنىپ، كومكەرىلگەن سول كيەلى قاقپانى ءوزىمنىڭ قاعبا تاسىمداي سەزىندىم دە، ءوز نەمەرەلەرىم سەگىز جاسار ايانا، تىلدەرى ەندى شىعا باستاعان ەرنۇرىم مەن دانيالىممەن بىرگە جەتى رەت اينالا ءجۇردىم. تۋعان جەرلەءرىنىڭ قاسيەتتى توپىراعىن ەندى باسىپ، ءوز قادامدارىن ەندى جاساعان ۇرپاقتارىم ءۇشىن دە وسى ەل، قازاق ەلى ماڭگىلىك بولسا ەكەن، سول ماڭگىلىك ەلدىڭ وسى ماڭگىلىك قاقپاسى ارقىلى مىنا قازاق ەلىنە ءاردايىم تەك قانا ىزگى كوڭىلدى دوستارى عانا كىرىپ جۇرسە ەكەن دەپ تىلەپ تۇردىم! ءامين، سولاي بولسىنشى ءاماندا! انە، ەركىندىك پەن ەلدىكتىڭ ماڭگىلىگىنىڭ سيمۆولىنا اينالعان «بايتەرەك!» بۇل «بايتەرەك» بارشا قازاق جۇرتىن بيىكتەرگە شاقىرىپ تۇرار قۋاتىمەن دە، ءوزىنىڭ اسقاقتىعىمەن دە، ارماندى بولاشاعىمەن دە قىمبات تۇعىر! ەلدىگىڭدى، سول ەلدىگىڭنىڭ كەڭدىگى مەن تەڭدىگىن، ارماندى بولاشاعىڭنىڭ بۇگىننەن دە ەرتەڭگى كەمەلدىلىگىن بىلگىڭ كەلسە، قاسيەتتى «بايتەرەكتىڭ» بيىگىنە شىعىپ تۇر ءاردايىم! انە، بىلايعى جۇرت «پيراميدا» اتاپ كەتكەن بەيبىتشىلىك پەن كەلىسىم سارايى! قازاق جەرىندە تاعدىرلارى تابىستىرعان بارلىق ۇلتتار مەن ۇلىستاردىڭ كەلىسكەن ىنتىماعىنىڭ، كۇشەيگەن بىرلىگىنىڭ، بۇگىنگى بارلىق قازاقستاندىقتاردىڭ نىعايعان دوستىعى مەن ابىرويىنىڭ بيىگىندەي، بار نيەتتەرى مەن كوڭىلدەرىنىڭ جاراستىعى، ءباءرى-بارى كەلىپ ءبىر ارمان مەن مۇددەنىڭ ءھام ماقساتى ءۇشىن تۇيىسكەن بەرىك تە بيىك ساليقالى رۋحىنىڭ ايناسىنداي بولىپ جارقىلداپ تۇر! انە، «حان شاتىرى!» ساۋلەلى كۇننىڭ اق نۇرىنا مالىنىپ، مىنا كەڭ دە بايتاق ۇلى دالانى نەبىر جاۋگەرشىلىك شاپقىنشىلىقتان قورعاپ قالعان باتىرلاردىڭ قاسيەتءتى حاس تۇلپارىنىڭ التىن تۇياعىنداي بولىپ، مىنا دۇنيە اتاۋلىنىڭ دا، قازاق جۇرتىنىڭ دا ماڭگىلىگىنە نۇكتە قويىپ تۇرعان قالپىمەن كوڭىل قۋانىشىنا اينالدى! انە، قازاقتىڭ قاسيەتتى دالاسىنىڭ كەڭدىگى مەن تەڭدىگى ءۇشىن سان عاسىرلار بويى قورامساسىنا قول سالىپ كەلگەن نەبىر باتىرلارىمىزدىڭ جاۋ شەبىنە شىرەنە تارتقان جەبەسىندەي، بولماسا تالاي ءبىر دۇشپانىنىڭ كەۋدەسىنە قادالعان نايزاسىنىڭ ۇشىنداي بولىپ نەمەسە ادامزات جاراتىلىسىنان بەرى جەردىڭ تارتىلىس كۇشىن جويىپ، قازاق دالاسىنان ماڭگىلىك كەڭىستىككە ۇمتىلعان زىمىراننىڭ بەلگىسىندەي ورناي قالعان «مينترانسكومنىڭ» عيماراتى دا بۇگىنگى ويى دا، نيەتى مەن ماقساتى دا بولەك قازاق ەلى مەن استانانىڭ ءوز بيىگى! انە، تورتكۇل دۇنيەنىڭ ءتورت بۇرىشىنا ساقتىقپەن قۇلاعىن ءتۇرىپ تىنا دا تۇرا قالعان قارت قىتايدىڭ وزىندەي بولىپ سىعاناق كوشەسىندەگى «بەيجىڭ سارايى» دا قازاق جەرىندەگى وزىندىك ول دا ءبىر الەم! استانا! ءوزىڭنىڭ قۇشاعىڭا تۇرعىلىقتى ءبىر پەرزەنتىڭ بولىپ كىرگەلى، ياعني كوكشەتاۋدان قونىس اۋدارىپ، استانالىق بولعان كۇننەن باستاپ، مەن ءوزىڭنىڭ ءار كوشەڭنىڭ، ءسانى مەن سالتاناتى جاراسقان ءار سارايىڭنىڭ، ءار ۇيلەرىڭ مەن عيماراتتارىڭنىڭ سىرىن وزىمشە تانىپ، تۇسىنگىم كەلىپ ءجۇر. سويتەمىن دە، وي تولعايمىن. انە، سايىن دالا ساحاراسىندا بيە بايلاپ، قازاقتىڭ اسىل ءدامى قىمىزىن ساپىرعان حالقىمىزدىڭ قاستەرلەپ ۇستاعان ىستالعان ساباسىنداي دوڭگەلەنە بىتكەن انا ءبىر ۇيلەردى الدەءبىر «جەتى بوشكەگە» تەڭەگەنشە، سولاردى التىن سابا دەسەك جاراسادى. ەركىندىكتىڭ ايدىنىندا ءجۇزىپ بارا جاتقان اناۋ ءبىر الىپ كەمەنى كوردىڭىز بە؟ سول عيماراتتى «ماتراس» دەگەندەرى نەسى ەكەن؟! بۇل – «ءبىز – الىس ساپارعا بەل بۋىپ، كەمەءمىزدى تاۋەكەل دارياسىنا تۇسىرگەن ەلمىز، ەلەس ۇمىتتە ەمەس، ەرلىك پەن ەلدىك مۇراتىن كەمەءمىزدىڭ تۇعىرىنا تۋ ەتىپ بايلاعان ەلمىز» دەپ ەلباسى ايتقان تاۋەكەلگە بەل بۋىپ، ءوز قايىعىن تاۋەلسىزدىك اتتى مۇحيتقا سالىپ، ءۇمىتتى دە كەمەل كەلەشەكتى بەتكە الىپ ايدىنعا شىققان بۇگىنگى قازاقستاننىڭ ءوزى ەمەس پە؟!
دۇنيە مۇحيتىنداعى بۇگىنگى قازاقستاننىڭ الىپ تا ءساندى كەمەسى عوي بۇل! استانانىڭ ءار كوپىرىن قازاق ەلىنىڭ بۇلىڭعىر وتكەنىنەن بۇگىنگى تاۋەلسىزدىك پەن سەنىمدى بولاشاققا وتكەن وتكەلدەرىنىڭ ءبىر نىشانى دەپ تانىسام، التىن كۇمبەزدى مەشىتتەرىن دالاسىنىڭ نۇرى، ءار بالاسىنىڭ يمانعا تولعان جۇرەگى دەپ سەزىنىپ كەلەمىن. كۇنى كەشە استانادا وتكەن «جاڭا الەمدەگى ەۋرازيالىق مادەنيەت» حالىقارالىق فورۋمى قازاق ەلىنىڭ ەلورداسىن اۋەلدەن «دوستاستىقتىڭ مادەني استاناسى» دەپ تانىعان الەمنىڭ كورنەكتى قايراتكەرلەرى مەن زيالىلارىنىڭ ءۇمىتىن تاعى ءبىر اقتاعانداي بولدى. ەل مەن جەر ارالىعىنا شەكارا سىزىقتارى تۇسكەنىمەن، ادامداردىڭ كوڭىلدەرى مەن نيەتتەرىنىڭ، جۇرەكتەرى مەن وي مۇددەلەرىنىڭ ارالىعىندا ەشقانداي سىزىق جوق ەكەندىگىنىڭ تاعى ءبىر كۋاسى بولدىق. تالاي ءبىر ونەر مەن مادەنيەتتىڭ مايتالمان وكىلدەرىنىڭ بىر-بىرىمەن جادىراعان جارقىن كوڭىلدەرى مەن ساعىنىشقا دا، الدەبىر ىزگىلىككە دە تولى قۇشاقتارىنىڭ قاۋىشقاندىعىن كوردىك. ادامزات وسى ءبىر تازا دا ساعىنىشتى جانە دە ادال كوڭىلدەرىمەن تابىسىپ، قاۋىشىپ تۇرۋلارى ارقىلى عانا بۇگىنگى دۇنيەنى دە، ونىڭ تىرشىلىگىن دە، وزدەرى مەن ءوز مادەنيەتتەرى ءھام وركەنيەتتەرىن دە ساقتاپ قالا الاتىندىعى جايلى نۇرسۇلتان نازاربايەۆتىڭ ايتىپ كەلە جاتقان وي مەن پىكىر ءسوزىنىڭ اۋەلى ءوز استانامىزدا جۇزەگە اسىرىلا باستاۋى دا قازاق ەلى ەلورداسىنىڭ الەمدىك دەڭگەيگە كوتەرىلگەندىگىنىڭ ءبىر ايعاعى دەپ باعالانۋى كەرەك. ءيا، ءبىزدىڭ استانا – الەمنىڭ ءۇمىتتى استاناسى!
جابال ەرعالييەۆ، جازۋشى
You Might Also Like
-
تاماشا مەرەكە – استانا كۇنىمەن شىن جۇرەكتەن قۇتتىقتايمىز. ءبىز نۇر-سۇلتاننىڭ قالىپتاسۋىنىڭ كۋاگەرلەرى جانە وسى اۋقىمدى زور جوبانى جۇزەگە اسىرۋ مۇمكىندىگىن كوزبەن كورۋ باقىتىنا يە بولىپ كەلەمىز...
-
قايران دالام-اي! نە بولىپ كەتتى؟ كىم ءبارىن وتاپ جاتقان؟ نەبىر اسىل وسىمدىكتەردىڭ كوزى جويىلۋدا. ماسەلەن، ەلگە دە، جەرگە دە پايداسى مول ميانى تۇپ-تامىرىمەن جويىپ جاتىر. ەركەك ءشوپ، بيدايىق دەگەن ءشوپت...
