اسحات ايماعامبەتوۆ: مۇعالىمدەرگە قانشا جاقسىلىق جاساساق تا كوپ بولمايدى
ەلورداداعى «قازاقستان» ورتالىق كونسەرت زالىندا «ۇزدىك پەداگوگ» رەسپۋبليكالىق بايقاۋىنىڭ جەڭىمپازدارىن ماراپاتتاۋ ءراسىمى ءوتتى. شارا بارىسىندا ەلىمىزدىڭ ءبىلىم جانە عىلىم ءمينيسترى اسحات ايماعامبەتوۆ مۇعالىمدەردى مەرەكەلەرىمەن قۇتتىقتادى.
«ەلباسىمىز نۇرسۇلتان نازاربايەۆ ەگەمەندىك العاننان باستاپ، ءبىلىم، عىلىم سالاسىنا ەرەكشە كوڭىل بولۋدە. ونى وزدەرىڭىز دە جاقسى بىلەسىزدەر. ەلباسىمىزدىڭ ساليقالى ساياساتىنىڭ ارقاسىندا جالپى مەملەكەتىمىز، ءبىلىم سالاسى بيىكتەردەن كورىنىپ، جەتىستىكتەرگە قول جەتكىزۋدە. ءقازىر وسى جۇمىس جالعاسۋدا. مەملەكەت باسشىسى قاسىم-جومارت توقايەۆ ءوزىنىڭ سايلاۋالدى باعدارلاماسىندا ءبىلىم، عىلىم سالاسىن دامىتۋعا ۇلكەن نازار اۋدارىپ، ءبىزدىڭ الدىمىزعا ناقتى ماقسات-مىندەت قويدى. بيىلعى جىلى تامىز كونفەرەنسياسىنادا مەملەكەت باسشىسى ءوزى قاتىسىپ، ۇستازدارعا العىسىن ءبىلدىردى. 4 جىلدىڭ ىشىندە ۇستازداردىڭ جالاقىسىن 2 ەسە كوتەرۋ، ءبىلىم سالاسىن دامىتۋ بويىنشا ۇلكەن ماقسات جۇكتەدى. وسى باعىتتا جۇمىس ىستەپ جاتىرمىز»،- دەدى ول.
مينيستر پەداگوگتاردىڭ مارتەبەسى تۋرالى زاڭنىڭ ازىرلەنىپ، قازىرگى ۋاقىتتا اتالعان قۇجاتتىڭ پارلامەنت قابىرعاسىندا قارالىپ جاتقاندىعىن اتاپ ءوتتى.
«وسى زاڭدى ىسكە اسىرۋ ءۇشىن بيۋدجەتتەن دە قوماقتى قاراجات قاراستىرىلىپ وتىر. بۇگىنگى كۇننىڭ وزىندە 3 تريلليوننان استام قاراجات قارالدى. بۇل ءبىزدىڭ ۇستازدارعا، جالپى ءبىلىم سالاسىنا دەگەن ۇلكەن قۇرمەت. ارينە، پروبلەمالار جوق ەمەس، بار. ءبىز ونىڭ بارلىعىن بىلەمىز. ونى مۇعالىمدەرمەن، اتا-انالارمەن، قوعاممەن بىرگە شەشەمىز. ۇلى ۇستاز، اعارتۋشى احمەت بايتۇرسىنوۆ: «ماعان بارىنەن دە ۇستاز، ءمۇعالىم جاقىن. ءمۇعالىم مەكتەپتىڭ جۇرەگى» دەگەنىن بىلەسىزدەر. سوندىقتان مۇعالىمدەرگە قانشا ماداقتاما ايتىپ، قانشاما جاقسىلىق جاساساق تا كوپ بولمايدى. سەبەبى مۇعالىمدەردىڭ جۇمىسى وتە ماڭىزدى. مەملەكەتىمىزدى، بولاشاعىمىزدى جارقىن ەتۋ جولىندا ەڭ الدىڭعى قاتاردا تۇرعان ماماندىقتاردىڭ ءبىرى ەكەنىن بىلەمىز»،- دەدى اسحات ايماعامبەتوۆ.
You Might Also Like
-
دۇنيەدەگى ماماندىق اتاۋلىنىڭ اناسى–ۇستازدىق. سەبەبى ۇلى تۇلعالارىمىزدىڭ بارلىعى ۇستازدان ءتالىم العان، ۇستازدىڭ سالىپ بەرگەن سارا جولىنان وتكەن. ولەڭ ءسوزدى ورنەكتەگەن اقىن دا، قالامى قار...
