InfoHub Logo

ەسىمدە... قاراشا ايىنىڭ 8ء-شى جۇلدىزى، جو-جوق جۇلدىزدى كۇن ەمەس مەن ءۇشىن...قاراشانىڭ قارا سۋىق جەلىندەي ىزعارلى. 
تاڭ. كۇزگى قارا سۋىقتان مەنى انامنىڭ قۇشاعى عانا قۇتقاراتىن. ءتاپ-تاتتى ۇيقىدا جاتىرمىن. انامنىڭ جىپ-جىلى قۇشاعىندا. سول ءبىر جىلۋلىق پەن ءتاتتى ۇيقىنى سۋىت حابار بۇزعانداي.

اكەمنىڭ و دۇنيەلىك بولعانى تۋرالى... نەبارى 5 جاستا بولسام دا ءبارىن ءتۇسىنىپ جاتىرمىن. ءبارىن ءتۇس سەكىلدى قابىلدادىم با، بالا كوڭىل ەش نارسەنى الاڭدار ەمەس. سابىرلى قالپىمدى بۇزباستان  مۇمكىن وتىرىك شىعار، ءتۇس كورىپ جاتقان بولارمىن دەگەن ۇمىتپەن تىسقا شىقتىم. ۇستىمدە انام كيگىزگەن قىزىل كويلەك (ءالى ەسىمدە). راسىمەن دە، جاڭا عانا مۇلگىگەن تىنىشتىق بۇزىلعان.
ۇيگە اياڭداپ قايتا كىردىم، كىردىم دە انامدى ىزدەي باستادىم. كىشكەنە عانا پەشتىڭ جانىندا انام وتىر ەكەن. جانارىنداعى جاستى بايقاماۋ مۇمكىن ەمەس ەدى.

- ماما جىلاماشى...

- جىلامايمىن قىزىم...

ءبىتتى... ءارى قاراي ارامىزدا ديالوگ بولدى ما، بولمادى ما بىلمەيمىن... ەسىمدە قالعانى مەنى كورشى ۇيگە اپارىپ تاستاعانى عانا... بالامىن عوي، ول وقيعاعا مۇلدە سەنبەدىم بە، سەنۋگە قورىقتىم با، ايتەۋىر كوزىمە جاس الماپپىن... الدە اششى اقيقاتقا سەنگىم كەلمەدى مە ەكەن؟ بىلمەيمىن... تىم اۋىر جاعداي. 

ءقازىر 20 جاستامىن، اكەمنىڭ تاعدىر تالايىنان ەرتە وتكەنىنە مىنە 15 جىل ءوتىپتى...

اكەم مەنىڭ-بايتەرەگىم! 15 جىل بۇرىن سول بايتەرەك قۇلاعان بولسا، ونىڭ تامىرى ولگەن جوق. بەتەگەلى بايتەرەك ءونىپ، ونىڭ بۇتاقتارى قايتا قانات جايىپ كوگەردى. مەن ءوزىمدى ەلسىز جەردە ءوسىپ تۇرعان قىزعالداققا تەڭەمەيمىن، مەن الىپ بايتەرەككە ۇيا سالعان قارلىعاشپىن.
ايتسە دە، ءبىز ءوز بايتەرەگىمىزدى اڭسايمىز...ساعىنامىز. اكەگە دەگەن ساعىنىش جۇزىمىزدەن بىلىنبەسە دە جۇرەگىمىز قانجىلاپ، "اكەم بولعاندا..." دەگەن وي سانادا جاڭعىرىپ تۇرادى.

اكەسىز وتكەن ءار مينۋت، ساعات عاسىرعا تاتيتىنداي اۋىر، وتە اۋىر... مۇڭ. قايعى. ساعىنىش. ءار ءساتىم ساعىنىشپەن اۋىرلاپ تۇرادى. شىركىن، كوپ نارسە جازعىم كەلەدى-اۋ، كوپ نارسە... توم-توم كىتاپ جازسام دا سىيدىرا الماسىمدى بىلەمىن. ءبارى ويىمدا!  اكەمنىڭ سۇڭعاق بويلى، كەڭ جاۋىرىندى بەينەسى عانا كوز الدىمدا قالىپ قويىپتى...

مەنىڭ ءبىر عانا بىلەرىم، مەنىڭ اكەم ەڭ جاقسى ادام...بولعان!

---