InfoHub Logo

اۋىز ءيىسى ءوزىمىزدىڭ دە جانە اينالاڭىزداعى ادامداردىڭ دا مازاسىن قاشىراتىن جاعىمسىز جاعداي. ادامنىڭ وزىنە دەگەن سەنىمىن كەتىرەتىن، پسيحولوگيالىق قاتەرلەرگە دە اپارۋى مۇمكىن كەلەڭسىزدىك. بۇل تۇرعىدا مامانداردىڭ كەڭەستەرىنە قۇلاق تۇرەيىك: سىلەكەي بەزدەرى سىلەكەي ءبولىپ شىعارۋ جانە بۇل سۇيىقتىقتاردى اۋىز ىشىنە جەتكىزۋ قىزمەتىن اتقارادى. كۇن ىشىندە ازىق الىنۋىنىڭ ازايۋى (اشتىق)، سۋسىزدىق سەكىلدى سەبەپتەرمەن اۋىزداعى سىلەكەي مولشەرى ازايۋى مۇمكىن. سونداي-اق سىلەكەي ءبولىنۋ ءۇردىسى ۇيقى كەزىندە توقتايدى. اۋىزداعى سىلەكەي ازايعان كەزىندە اۋىز ءوزىن تازالاۋ ءۇشىن قاجەتتى سۇيىقتىقتى تابا المايدى. وسى سەبەپتى اسىرەسە تاڭەرتەڭگىسىن ۇيقىدان تۇرعاندا اۋىز ءيىسى پايدا بولۋى مۇمكىن. قانت ديابەتى، قان ازدىعى، قىزۋ كوتەرىلۋى سەكىلدى اۋرۋلار مەن كەيبىر ءدارى تۇرلەرى دە سىلەكەي ءبولىنۋىن ازايتاتىن سەبەپتەر قاتارىنا جاتادى. سونداي-اق اۋىز ىشىندە پايدا بولعان ينفەكسيا جانە اسقىنعان ءتىس ەتى اۋرۋلارى دا اۋىز ءيىسىنىڭ سەبەپكەرى بولا الادى. اۋىز ءيىسىن كەتىرۋدە سۋدىڭ اسەرى مول. ءتۇرلى سەبەپتەرگە بايلانىستى ازايعان سىلەكەي مولشەرىن قالىپتى جاعدايعا كەلتىرۋدە سۋ ءىشۋدىڭ ماڭىزى زور. كۇنىنە شامامەن 2 ليتر سۋ تۇتىنۋ ءتىس ساۋلىعىن قورعاۋعا جانە سىلەكەيگە قاتىستى اۋىز ءيىسىنىڭ الدىن الۋعا كومەكشى بولادى. كۇندەلىكتى ءتىس تازالىعىنا ءمان بەرۋ كەرەك. ءتىل – قاتپارلى قاباتتارىنا بايلانىستى باكتەريالاردىڭ وڭاي ورنىعاتىن مەكەنگە جاتاتىندىقتان، تىسپەن قاتار ءتىلدى دە تازالاۋ اۋىز ءيىسىن كەتىرۋدە ماڭىزدى. قويۋ شاي، كوفە جانە تاتتىلەردى تۇتىنۋدى ازايتىپ، اسىرەسە ءسپيرتتى ىشىمدىكتەر مەن تەمەكىدەن اۋلاق بولۋ كەرەك. تىستەگى شىرىكتەر، كەيبىر ءتىس ەتى اۋرۋلارى، ەسكى ءتىس كوپىرلەرى مەن كورونكالارى دا اۋىز يىسىنە سەبەپكەر بولاتىندىقتان بۇلاردى مامان دارىگەرلەرگە كورسەتىپ ەمدەپ، جوندەۋ قاجەت.    

 

وقۋعا كەڭەس بەرەمىز:

اۋىز قۋىسىنىڭ تازالىعى

---