InfoHub Logo

اۆاريا (اپات) — وندىرىستىك پروسەستىڭ بۇزىلۋىن تۋعىزاتىن، ماشينانىڭ، اگرەگاتتىڭ ىستەن شىعۋى نەمەسە ادامداردىڭ ءومىرى مەن دەنساۋلىعىنا ءقاۋىپ تونۋىنە بايلانىستى توقتاتىلۋى. ءىرى وندىرىستىك اپاتتارىندا ونەركاسىپ ورىندارىندا، ترانسپورتتا نەمەسە باسقا دا حالىق شارۋاشىلىعى وبەكتىلەرىندە وندىرىستىك پروسەسس كەنەتتەن توقتايدى نەمەسە ىستەن شىعادى، بۇل ادامداردىڭ زارداپ شەگۋىنە نەمەسە شىعىنعا ۇشىراۋىنا، ماتەريالدىق يگىلىكتەردىڭ زاقىمدانۋىنا اكەپ سوقتىرادى.

اپات زارداپتارىنىڭ سيپاتى ولاردىڭ تۇرىنە، اۋقىمىنا جانە اۆاريا شىققان كاسىپورىننىڭ ەرەكشەلىگىنە بايلانىستى. قەيبىر جاعدايدا اۆاريا اتموسفەرانىڭ لاستانۋىن، مۇناي ونىمدەرىنىڭ، زياندى سۇيىقتار مەن كۇشتى اسەر ەتەتىن ۋلاعىش زاتتاردىڭ توگىلىپ، جايىلۋىن تۋعىزادى. حالىق شارۋاشىلىعى وبەكتىلەرىندە كوپ جاعدايدا اۆاريانى تۋعىزاتىن سەبەپتەر — تەحنولوگيالىق پروسەستىڭ جانە قاۋىپسىزدىك تەحنيكاسى ەرەجەلەرىنىڭ بۇزىلۋى. ءىرى وندىرىستىك اۆاريانى جويۋ كەزىندە تومەندەگىدەي شارالار جۇرگىزىلەدى: وبەكتىنىڭ جۇمىسشىلارى مەن قىزمەتشىلەرىن، اۆاريا قىزمەتتەرىن، حالىقتى (قاجەت بولعان جاعدايدا) اۆاريانىڭ پايدا بولعان ءقاۋىپتى زارداپتارى جونىندە حابارلاندىرۋ؛ ادامداردى قۇلاعان ۇيىندىلەردىڭ استىنان، قيراعان جانە زاقىمدانعان ۇيلەر مەن عيماراتتاردان شىعارۋ، زاقىمدانعاندارعا مەديسينالىق كومەك كورسەتۋ جانە ولاردى ەمدەۋ مەكەمەلەرىنە كوشىرۋ؛ ورتتەردى ءسوندىرۋ جانە وقشاۋلاۋ؛ كوممۋنالدىق-ەنەرگەتيكالىق جۇيەلەردەگى اۆاريانى وقشاۋلاۋ؛ اۆاريا بولعان جەرلەرگە، زاقىمدانعان جانە قيراعان ۇيلەرگە كىرەتىن جانە شىعاتىن جولدار جاساۋ؛ مەحانيزمدەردىڭ جۇمىس ىستەۋى ءۇشىن الاڭدار دايىنداۋ؛ اۆاريا بولعان اۋدانعا جانە ول شەكتەسەتىن تەرريتوريالاردا كومەندانتتىق قىزمەتتەر ۇيىمداستىرۋ. ولاردى جۇزەگە اسىرۋ ءۇشىن اۆاريا اسكەرىنىڭ — اعا باستىعىنىڭ شەشىمى بويىنشا اۆاريا اسكەري ەمەس جاساقتارى تارتىلادى.

---