InfoHub Logo

شوڭنىڭ قارتايعان كەزى ەكەن. ءبىر جىلى شۋ قىستاۋعا مالىمەن كوشكەن. التاي، كارپاتتىڭ ءبىراز ەلى شۋ بويىندا قىس قاتتى بولىپ، مالى جۇتقا ۇشىراپتى. وسى جاعدايدى ەستىگەن ارقاداعى شوڭ ۇلكەن بالاسى وسپاندى شىقىرىپ، الىپ:

— كوكتەم تاياندى شۋ قىستاعان ەلدىڭ الدىنان شىعىپ، كەلە جاتقان ەلدىڭ جاعدايىن ءبىلىپ، ۇلكەن-كىشى ازاماتتارىنا سالەم بەر. بۇرىنعىلار ايتادى ەكەن: «جۇتاعان ەلدىڭ مالى — ءوسىمتال، ءورت شالعان جەردىڭ ءشوبى — ءوسىمتال» دەپ، سول ايتقانداي، حالىق امان، بولسا جۇتاعان مالدىڭ ورنى ءالى-اق تولادى. ەل ازاماتى امان بولسا بولعانى. مەنەن ەل اقساقالى، ۇلكەندەرگە سالەم ايت. سول ەلدە كوپتى كورگەن، ءبىر كەزدە ەلىنىڭ ءجون بىلەتىن شەشەنى بولعان، سەكسەننەن اسقان باجاق قارت بار. سوعان بارىپ مەنىڭ ارنايى سالەمىمدى ايت! — دەپتى.

ايتقانداي وسپان بارىنە سالەم بەرىپتى. ءسويتىپ، اكەسى شوڭنىڭ تاپسىرۋى بويىنشا باجاق قارتتى سۇراسا، ەشكىم بىلمەپتى. سونى ىزدەپ كەلە جاتسا، كەشكە قاراي ءبىر اۋىل ۇستىندە، ءبىر قورا قوي جاتىر ەكەن. قىستان ابدەن ارىقتاپ شىققان قوي قوزىسىنا، قوزى ەنەسىنە تابىسا الماي ۋ-شۋ بولىپ جاتىر ەكەن. اۋىل شەتىندەگى ءبىر قاراشا ءۇي ەسىك الدىنا تۇرعان قارتقا بارىپ سالەم بەرەدى.

— بۇل اۋىل كىمدىكى؟ — دەپ سۇرايدى.

— شىراعىم، اۋىل — باجاقتىكى، مال — باراقتىكى، — دەگەن ەكەن قارت.

سويتسە، اۋىل ۇستىندەگى جايىلىپ جاتقان قوي باراقتىكى ەكەن دە، باجاق قارت سول بايعا قوسشى ەكەن. اتتان ءتۇسىپ، وسپان باجاق قارتتىڭ قولىن الىپ، سالەم بەرىپ، اكەسى شوڭنىڭ ارنايى سالەمىن ايتقان ەكەن. «پەيىلى بولسا شەتتەگى تۇرعان قاراشا ءۇي اق وردادان ءۇش ارتىق» دەگەن ەمەس پە؟ باجاق قارت بۇلاردى جالعىز سيىرىنىڭ بۇزاۋىن سويىپ قوناق ەتۋگە جىك-جاپار بولادى. ءبىراق بۇلار ءبىر ءۇيلى جاننىڭ كۇن كورىپ وتىرعان جالعىز سيىرىنىڭ بۇزاۋىن قالاي سويعىزسىن؟ باجەكەڭە بۇزاۋىن سويعىزباي، كەدەيمىن دەپ قينالماي قوناققا جالعىز بۇزاۋىن سويام دەگەن اق پەيىل، جومارت نيەتىنە كوپ ريزا بولىپ، قوش ايتىسىپ، اتقا قونباق بولادى. سوندا باجاق قارتتىڭ شوڭعا ايتقان سالەمى:

— مەنەن شوڭ ىنىمە سالەم دەرسىڭ،
كىم دەسە باجاق دەگەن اعاڭ دەرسىڭ.
كارىلىك كەدەيلىكپەن بىردەي كەلدى،
مال-باسى ودان باسقا امان دەرسىڭ، — دەپتى.

وسپان شۋداعى ەل جاعدايىن، باجاق قارتتىڭ سالەمىن اكەسىنە ايتىپ كەلەدى. سوندا شوڭ:

— شىركىن، ءبىر كەزدەگى ەل ارداگەرى باجاق، بۇگىندە قارتايعان كەزىندە كەدەيلىك تۇرمىستان قاجىعان ەكەن عوي، — دەپ ەكى اتتىڭ ءبىرىن جانە ءبىر تۇيەسىن بەرىپ، بالاسىن جىبەرگەن ەكەن.

---