InfoHub Logo

- بالا تاربيەسى دەگەن قيىن ەكەن، - دەدى ەركەك. - ءوز باسىمنان وتكەسىن بىلەمىن عوي. جالعىز قىزىمىز بار. سونىڭ تاربيەسىنە الاڭدايمىز. كەيىنگى كەزدە قىزىمىز بىزگە قارسى سويلەيتىندى شىعارىپ ءجۇر. ول ءتىپتى ءبىزدىڭ ءوزىمىزدى تەرىسكە شىعارا باستادى. مىسالى، جۇبايىمىز ەكەۋمىز اڭگىمەلەسىپ وتىرساق، ول ارالاسا كەتىپ، ءبىزدى تەرىسكە شىعارادى.
- سەن بىزگە قارسى سويلەپ وتىرسىڭ عوي، - دەيمىز ءبىز.
- مەن قارسى سويلەپ وتىرعان جوقپىن، - دەيدى قىزىم. - بار بولعانى ءوز پىكىرىمدى بىلدىرگەنىمە دە جازىقتىمىن با؟
- قارسى سويلەمەگەنىڭ وسى بولسا... سەن ءالى دە سويلەپ وتىرسىڭ.
ايەلىمىز ەكەۋمىز قاتار وتىرىپ الىپ، ونىڭ تاربيەسى جايلى شۇڭكىلدەسە باستايمىز.
- وسىنىڭ ءبارى مەكتەپتەن، - دەيدى ايەلىم.
- دۇرىس ايتاسىڭ، ارينە مەكتەپتەن.
- ولاردىڭ ديرەكتورلارى نە بىتىرەدى ەكەن سوندا؟
- قايداعى ديرەكتور؟ - دەيمىن مەن. - ديرەكتور دەگەن بار بولعانى گالستۋگىن تارتقىلاپ قويىپ، ەكى قولىن ارتىنا ۇستاپ جۇرەدى دە قويادى.
- مۇنداي جۇمىس سەنىڭ دە قولىڭنان كەلەدى عوي، - دەيدى ايەلىم.
- كەلمەگەندە شە؟ گالستۋگىڭدى تارتقىلاپ قويىپ، قولىڭدى ارتىڭا ۇستاپ ءجۇرۋ دە قيىن جۇمىس بولىپ پا؟ تەك تاماق ءىشۋدى ۇمىتىپ كەتپەسەڭ بولعانى.
- ولاردىڭ مەكتەبى قاي جەردە ءوزى؟ - دەيمىن. - سەن وندا بارساڭشى، ءسويت تە شاڭىن قاق.
- قاعامىن، - دەيدى ايەلىم.
ايەلىم ەرتەڭىڭە مەكتەپكە كەتتى. ءبىراق شاڭىن قاعا الماپتى. انىعىندا وندا ءبىز ويلاعانداي ديرەكتور ەركەك ەمەس، ايەل ادام ەكەن.
ديرەكتور ايەلىمدى جىلى ىلتيپاتپەن قابىلداپتى.
- ءبىز سىزدەرگە قالاي العىسىمىزدى بىلدىرەرىمىزدى بىلمەي وتىر ەدىك، - دەيدى ديرەكتور. - سىزدەردىڭ قىزدارىڭىز ءبىزدىڭ مەكتەبىمىزدىڭ ەڭ ۇزدىك شاكىرتى. وسىنداي بالا تاربيەلەپ وتىرعاندارىڭىز ءۇشىن سىزدەرگە راقمەت!
ايەلىم بۇل سوزدەردەن كەيىن نە ايتارىن بىلمەي توسىلىپ قالادى.
- سوندا دا ءبىر اۋىز ەسكەرتە سالساڭىزدار قايتەدى.
- ءبىز سىزدەرگە العىسىمىزدى ءبىلدىرىپ، حات جىبەرىپ ەدىك قوي، - دەيدى ديرەكتور تاڭدانىپ. - سىزدەر المادىڭىزدار ما؟!
- قايداعى حات؟! - دەيمىن مەن ايەلىمە قاراپ. - سەن حات كورىپ پە ەدىڭ؟
- حات كورسەم، كوزىم شىقسىن.
ءبىز دەرەۋ قىزىمىزدى شاقىرىپ الامىز.
- وسىندا بىزگە العىس ءبىلدىرىپ، حات كەلگەندىگىن ەستىپ وتىرمىز؟
قىزىم بىزگە قاعازدارىنىڭ اراسىنان حاتتى الىپ بەردى.
- بۇل حات بىزگە ارنالعان عوي. سەن مۇنى نەعىپ بىزگە بەرمەي ءجۇرسىڭ؟
- مەن سەندەرگە حات اكەلدىم دەپ قانشا رەت ايتتىم، - دەيدى قىزىم كۇيىنىپ. - سەندەر كەشەگى بولعان تويدىڭ اڭگىمەسىنەن اۋىزدارىڭ ءبىر بوساماي وتىرىپ الدى ەمەس پە؟
- مىناۋ بىزگە قارسى سويلەپ تۇر عوي.
- مەن قارسى سويلەپ تۇرعان جوقپىن، - دەيدى قىزىم. - بار بولعانى تۇسىندىرمەك بولدىم.
- بۇل حاتقا جاۋاپ جازۋ كەرەك پە؟ - دەيمىن ايەلىمە قاراپ.
- قايدان بىلەيىن؟ مادەنيەتتى ادامدار حاتقا جاۋاپ قايتارىپ جاتادى عوي.
ءبىراق قىزىمىز ءبىزدىڭ حاتىمىزدى اپارۋدان ۇزىلدى-كەسىلدى باس تارتتى. ءتىپتى بولمەسىنىڭ ەسىگىن تارس جاۋىپ الدى.
- ايتپاقشى الگى سوڭعى قوڭىراۋ دەگەن بىردەڭەلەرى بولادى ەمەس پە؟ - دەيمىن ايەلىمە قاراپ. - حاتتى سوندا اپارىپ بەرەيىك.
ءبىز دەرەۋ قىزىمىزدى شاقىرىپ الدىق.
- سەندەردىڭ سوڭعى قوڭىراۋلارىڭ قاشان بولاتىن ەدى؟
قىزىمنىڭ كوزى شاراسىنان شىعا جازدادى.
- قايداعى سوڭعى قوڭىراۋ؟! مەن ءالى جەتىنشىدە وقىپ ءجۇر ەمەسپىن بە؟!
- ەندى سوعان دا ءبىز كىنالىمىز بە؟
قايتكەندە دە حاتتى سوڭعى قوڭىراۋدا اپارىپ بەرەتىن بولىپ شەشتىك. ءارى العىسىمىزدى بىلدىرەيىك، ءارى ءجون-جوبانى بىلەتىندىگىمىزدى تانىتىپ، سىي-سياپات تا كورسەتەيىك.
- سوڭعى قوڭىراۋعا دەيىن ءالى ءبىراز ۋاقىت بار ەكەن، - دەدى ەركەك قول ساعاتىنا ءبىر قاراپ قويىپ. - وعان دەيىن بالا تاربيەسىمەن ۇزدىكسىز اينالىسا بەرمەكپىز.
 

---