InfoHub Logo

ءاربىر جاننىڭ ومىرىندە ءوزى تامسانا ايتىپ وتىراتىن قىزىق وقيعاسى، نە بولماسا جانىڭدى جەگىدەي جەپ مۇڭايتاتىن قايعىلى وقيعاسى بولادى. بارلىعىمىزدىڭ ۇيىمىزدەگى ۇلكەن اتا-اجەلەرىمىز، اعا-اپكەلەرىمىز وزدەرىنىڭ بالالىق شاعىن اۋزىنان سۋى قۇرىپ اڭگىمەلەپ وتىرادى ەمەس پە، قاراپ تۇرسام، اۋىلدا وسكەن سوڭ با مەنىڭ دە بالالىق شاعىم سول كىسىلەردىڭ اڭگىمەسىنە ۇقساس ەكەن. بىزدە اسىق وينادىق، لاڭگى تەپتىك، ساماۋرىننان ءشاي ءىشىپ، اق قارا تەلەديداردان مۋلتفيلم تاماشالادىق. ايتايىن دەگەنىم بۇل ەمەس، وتكەن شاقتى ويلاعان ساتتەن-اق ەسىمە ءبىر وقيعا تۇسەدى. ءبىزدىڭ اۋىل وتە كىشكەنتاي بولاتىن. كورشى اۋىل بولسا وتە ۇلكەن. بارلىق ورتالىقتار سوندا ورنالاسقان، تىپتەن مەرەكەلىك شارالار دا سول جاقتا قىزىقتىراق بولاتىن. ءبىر جىلى دوستارىمىزبەن جينالىپ ناۋرىز مەرەكەسىن سول اۋىلدا تويلاماقشى بولدىق. ول اۋىل بىزدەن ءۇش كيلومەتر الشاق جاتىر. ەكى اۋىلدى ءبولىپ تۇراتىن ۇلكەن ساي بار. ول سايدان كوكتەم ايلارىندا تاۋدان ەرىگەن قار سۋى وتە كوپ مولشەردە اعىپ جاتاتىن. سول جىلدارى ول جەردە بايلانىستىراتىن ەشقانداي كوپىر جوق بولاتىن. ال ءبىز ەشنارسەگە قاراماستان مەرەكەنى قىزىقتاۋ ءۇشىن ۇلكەندەرگە ايتپاستان جولعا شىقتىق. گۋ-گۋ اڭگىمە كوڭىلدەنىپ الگى سايعا كەلىپ تىرەلگەندە بىردەن شەشىنە كەتىپ ءجۇزىپ وتەتىن جەر ىزدەدىك. ناۋرىز ايى ءبىز جاقتا ول كەزدە قار ەرىپ جاتقان، ال سۋ تاۋ قارىنىڭ ەرىگەن وتە مۇزداي سۋى. سول كۇنى ايتەۋىر كۇننىڭ ءوزى سالقىن بولاتىن. جاستىقتىڭ وتى ما ايتەۋىر سۋدىڭ سالقىندىعىنا قاراماي، ءبىر تايازداۋ جەرگە كەلىپ ارعى بەتكە قاراماستان، ارعى جاعاعا شىعۋعا تىراسا باستادىق. ءبىر كەزدە بارلىعىمىز جاعاعا شىقتىق. الايدا ول ءبىز ويلانعان، مەجە تۇتقان جاعا بولماي شىقتى. سۋ ورتاسىنداعى شاعىن ارال ەكەن. كىشكەنتاي عانا سايدا وسىنداي بولادى دەگەن ەشقايسىسىمىزدىڭ ويىمىزدا بولماعان ەدى. سول ساتتە ءبىر جولداسىم الگى جەردەن ءبىز مەجەلەگەن جەرگە سەكىرىپ وتۋگە بولاتىندىعىن ايتىپ، ءوزى سەكىرىپ كەتتى. ونىڭ اياقتارى ۇزىن شيراق جىگىت بولاتىن. دوستارامىز كەزەكپەن ءوتىپ جاتىر، مەن سوڭىنا قالدىم. ەندى مەنىڭ الدىمدا بويى كىشكەنتايلاۋ دوسىم قالدى. ونىڭ وتەتىنىنە مەن سەنىمدى ەدىم. سەبەبى ول وتە شيراق بولاتىن. سەكىردى، الايدا اياعى جاعاعا ىلىككەنىمەن ءوزى ارتقا قاراي قۇلاپ كەتتى. تاڭعالدىم وسىنداي كىشكەنتاي سايدا وسىنداي ءجايتتار بولعانىنا. بارلىعىمىز الگى دوسىمىزدى الىپ شىقتىق. ونىڭ ءۇستى سۋ. ءبىرىمىزدىڭ شۇلىعىمىز سۋعا اعىپ كەتكەن. ءبىرىمىز جاۋراعاننان قاتتى دىرىلدەيمىز. نە كەرەك سىرتتان قاراعانداعى بەينەمىز جاۋ قولىنان قاشىپ كەلە جاتقان اسكەريلەر دەرسىڭ. سول اۋىلداعى ءبىر تۋىسىمىزدىڭ ۇيىنە بارىپ جىلىنىپ كيىمدەردى كەپتىرىپ، مەرەكە بولاتىن الاڭعا بارساق، بارلىق شارالار ءبىتىپ قويعان ەكەن. سونىمەن نە مەرەكە جوق، نە كوڭىل كۇي جوق، وسىنداي ءبىر ىستىق ەستەلىكتى جادىمىزعا ءتۇيىپ اۋىلىمىزعا قايتقان بولاتىنبىز.

اسادبەك ەرگەش ۇلى

---