InfoHub Logo

ءبىر ءالىم ادام جاپاندا كەلە جاتىپ، اياعى استىندا ءبىر ۇلكەن تاسقا ءسۇرىنىپ جىعىلىپ، ويلادى: بۇل تاس ادامعا زيان كەلتىرەتىن تاس ەكەن، جولدان الىپ تاستايىن دەپ. سول ويمەن تاستى كوتەرىپ ەدى، استىنان ءبىر ساندىق شىقتى، ساندىقتى اشىپ ەدى، ىشىنەن ءبىر جىلان شىعىپ، شاعامىن دەپ الىمگە ۇمتىلدى، ءالىم ايتتى:
- مەن سەنى قاراڭعى، تار جەردەن، تۇتقىننان شىعاردىم، جاقسىلىققا جاماندىق بار ما؟
جىلان ايتتى:
- بار.
ءالىم ايتتى:
- ولاي بولسا بىرەۋگە جۇگىنەلىك، تورە ساعان تيسە شاعارسىڭ،- دەپ.
جىلان دا بۇل سوزگە توقتاپ، ەكەۋى كەلە جاتىپ، تۇيەگە جولىقتى. تۇيەگە بۇلار ىستەرىنىڭ ءمانىسىن ايتىپ ەدى، تۇيە ايتتى:
- جاقسىلىقكا جاماندىق بار؛ نە ءۇشىن دەسەڭىز: مەن ادامنىڭ قانشا اۋىر جۇگىن، مۇلكىن تاسىپ، ومىرىمشە قىزمەت ىستەسەم دە، ادام قاي ۋاكىتتا شامامنان تىسقارى جۇك ارتادى دا، جۇرە الماسام ۇرىپ-سوعىپ رەنجىتەدى.
جىلان مۇنى ەسىتىپ، ءالىمنىڭ موينىنا ءبىر ورالدى. مۇنان شىعىپ جەمىس اعاشتارىنا كەلىپ جۇگىندى. بۇل اعاش تا ايتتى:
- جاقسىلىقكا جاماندىق بار؛ نە ءۇشىن دەسەڭىز: مەنىڭ جەمىسىممەن قانشا ادام كۇن كورىپ پايدالانىپ تۇرسا دا، جەمىسىمدى جان اۋىرتپاي قولىمەن الماي، تۇبىمنەن قاتتى ورىپ، جەمىسىمدى جەرگە ءتۇسىرىپ الىپ جەيدى،- دەدى.
جىلان ءالىمنىڭ موينىنا تاعى ءبىر ورالدى. ونان كەتىپ ءبىر يتكە جولىعىستى.
يت تە ايتتى:
- جاقسىلىققا جاماندىق بار، مەن يەمە قانشا تۇن-كۇن ۇيىقتاماي مۇلكىن، مالىن، ءوزىن باعىپ قىزمەت قىلىپ ەدىم، اقىرىندا مەن قارتايىپ اۋرۋلى بولعان سوڭ، تاياقتاپ ۇرىپ مەنى قۋىپ جىبەردى،- دەدى. جىلان جانە ءبىر ورالىپ، ەندى شاعامىن دەدى.
ءالىم ايتتى:
- ەندى تاعى بىرەۋگە-اق جۇگىنەيىك، تورەلىك تاعى ساعان تيسە، شاعا بەر.
سونان شىعىپ ءبىر توپ ويناپ جۇرگەن بالالارعا كەلدى. ىشىندە ءبىر بالا الىمگە سالەم بەردى. ءالىم سالەمىن الىپ، سول بالاعا ىستەرىنىڭ ءمانىسىن ايتتى.
بالا ەسىتىپ بولىپ:
- ءاي، اتا، بەكەر سويلەيسىڭ وسى قولىڭداعى كىپ-كىشكەنتاي قوبديعا موينىڭا ءۇش ورالعان ايدىك جىلان سىيۋشى ما ەدى؟ - دەدى سوندا جىلان دا ايتتى:
- بۇل ءسوز راس،- دەپ.
بالا ءتىپتى نانبادى، «بۇل سوزگە كوزبەن كورمەي كىسى نانىپ بولماس» دەپ. سوندا جىلان بالانى ناندىرۋ ءۇشىن ءيىرىلىپ باردى دا، ماناعى قوبديعا كىرىپ جاتتى. بالا سوندا تارس ەتكىزىپ ساندىقتى جاۋىپ بەكىتتى دە، ءالىمنىڭ قولىنا بەردى، «اپارىپ العان ورنىڭىزعا قويى-ڭىز» دەپ.

---