InfoHub Logo

بۇرىن مارقاكول جاعاسىن مەكەن ەتكەن، داۋلەتى اسقان ءبىر باي بولىپتى. ول قايدا جۇيرىك بار دەسە، كەيدە الداپ، كەيدە زورلاپ الماي قويمايتىن وزبىر دا ەكەن. كۇندەردىڭ بىرىندە باي «سالدامان دەگەن كەدەيدە ءبىر ات بار، ول اتقا بۇل جالعاندا ات جەتە المايدى» دەگەن ەل داقپىرتىن ەستىپ، قالاي دا وسى اتتى قولىنا تۇسىرۋگە اڭسارى اۋىپتى. باي سالداماندى اتىمەن شاقىرتىپ جۇقالاعان ەكەن. سالدامان دا قۋ ءىشى سەزگەندەي «كەدەيلىك باعىما بىتكەن ادەتتەگى ءجاي ات» دەپتى. باي سالدامانعا:

— اينالاسى التى كۇندىك كولدى ەت ءپىسىرىم ۋاقىتتا اينالىپ كەل. ەگەر ەت ءپىسىرىم ۋاقىتتا كەلە الماساڭ، اتىڭا التىن ەر سالىپ ءوزىم مىنەم، كەلە الساڭ، ساعان ءبىر توعىزعا جىعىندى بولامىن، —  دەپ ۋادە بەرىپتى. سالدامان اتقا سەنىپ جولعا شىعىپتى. باي شىنە كەلە قۋانىپ ورداعا كىرىپ، ەسە سويلەپ، «قانات بىتسە دە، ەت پىسقانشا اتتىڭ جەتە المايتىندىعىنا» كوزى جەتىپ، ەتتىڭ كوبىگىن الۋعا بۇيرىق بەرگەنشە دالادان اتتىڭ قاراسى كورىنگەن حابار كەلەدى. بۇل حاباردان شوشىنعان باي دالاعا شىقسا، ات تۇياقتارى جەر ويىپ، ۇشقان قۇستاي ەكپىندەپ كەلە جاتىپتى. سوندا، وزەگىنە ءورت تۇسكەن باي وتىرا كەتەدى. ءبىراق ايتقانىنان قايتا الماي، امالسىز ءبىر توعىزىن بەرىپتى. «بالجىڭگەر» دەگەن كۇي وسىدان قالعان ەكەن.

 

---