باۋبەك بۇلقىشيەۆ
بۇلقىشيەۆ باۋبەك (1916، قاراعاندى وبلىسى ۇلىتاۋ اۋدانى — 1944، ۋكراينا، دنەپرو-پەتروۆسك وبلىسى سوفيەۆسك اۋدانى) — جازۋشى. شىعارمالارىن قازاق، ورىس تىلدەرىندە جازعان. قارساقبايداعى فزو مەكتەبىن بىتىرگەن (1935). الماتى ساۋدا-قارجى تەحنيكۋمىندا وقي ءجۇرىپ (1937)، كوپتەگەن ولەڭ، «بالالىق شاق» پوەماسىن، «اۋىلدان الماتىعا» اتتى اڭگىمەسىن جازدى. 1939 ج. «لەنينشىل جاس» (قازىرگى «جاس الاش») گازەتىندە ادەبي قىزمەتكەر، كەيىن «قازاقستان پيونەرى» (قازىرگى «ۇلان») گازەتىندە ءبولىم مەڭگەرۋشىسى بولعان. 1940 ج. كەڭەس ارمياسى قاتارىنا شاقىرىلادى دا، ماسكەۋ اسكەري ۋچيليششەسىندە وقيدى. باۋبەك ۇلى وتان سوعىسى مايداندارىنداعى ۇرىستارعا العاشقى كۇندەردەن باستاپ قاتىسادى. ونىڭ سوعىستاعى وتانشىلدىق ەرلىگى اتا ءداستۇرىنىڭ جالعاسى ىسپەتتى. باۋبەكتىڭ اكەسى ا. يمانوۆ باسقارعان ۇلت-ازاتتىق قوزعالىسىنا بەلسەندى قاتىسقان. اتا داستۇرىنە بەرىك ازامات، جالىندى كوسەمسوز شەبەرى، ەرجۇرەك جاۋىنگەر ماسكەۋدى قورعاۋ، ۋكراينانى ازات ەتۋ شايقاستارىنىڭ بەل ورتاسىندا بولدى.
1944 جىلدىڭ باس كەزىندە مايداندا قاھارماندىقپەن قازا تاپتى. باۋبەك بۇلقىشيەۆ كوپتەگەن ولەڭدەر جازىپ، رەسپۋبليكالىق باسپا ءسوز بەتتەرىندە جاريالادى، ونىڭ «الماتى — مەنىڭ تۋعان قالام» دەگەن بىتپەي قالعان رومانى جانە «ايسۇلۋ» دەگەن پوەماسى بار. بۇلقىشيەۆتىڭ شىعارماشىلىق دارىنى ۇلى وتان سوعىسىنىڭ اۋىر سىن ساعاتتارىندا ەرەكشە كورىندى. 1942 ج. 1 مامىردا «كومسومولسكايا پراۆدا» گازەتىندە بۇلقىشيەۆتىڭ «ءومىر مەن ءولىم تۋرالى» (جاس قازاق اسكەرىنىڭ حاتى) دەگەن ءورشىل، وتانشىل ماقالاسى جارىق كوردى. سوعىس كەزىندە جازعان شىعارمالارىنىڭ دەنى «كومسومولسكايا پراۆدا» گازەتىندە جاريالاندى. باۋبەك بۇلقىشيەۆتىڭ «يا حوچۋ جيت»، «جيزن پرينادلەجيت نام»، «كوۆارستۆو ي ليۋبوۆ»، «پيسمو سىنۋ ۆوستوكا»، «سلۋشاي، كاۆكاز» جانە باسقا ماقالالارىن كورنەكتى جازۋشى ع. مۇسىرەپوۆ قازاق تىلىنە اۋدارىپ، رەسپ. «سوسياليستىك قازاقستان» (قازىرگى «ەگەمەن قازاقستان») گازەتىندە جاريالادى. ب. شىعارمالارى ادەبي جيناقتاردا («جيزن سولداتا»، م.، 1946؛ «جۋرناليستى ۆ شينەلياح»، ا.-ا.، 1968؛ «ەسىمىزدە قاندى مايدان جورىقتارى»، ا.، 1968) باسىلدى، جەكە كىتاپ بولىپ جارىق كورگەن.
وقۋعا كەڭەس بەرەمىز:
باۋبەك بۇلقىشيەۆ شىعارمالارى
You Might Also Like
-
ۇشۋ جانە قونۋ كەزىندە جولاۋشىلاردان نە ءۇشىن ورىندىقتاردىڭ ارقالىقتارىن تىكتەپ قويۋدى وتىنەتىنىن جانە سالونداعى شامداردى ءوشىرىپ تاستايتىنىن ءبىلىپ الىڭىز.
-
دۇزەلحانوۆ اعىمسالى — سۋرەتشى، قازاقستاننىڭ ەڭبەك سىڭىرگەن ونەر قايراتكەرى (1996). اعىمسالى دۇزەلحانوۆ 1951 جىلى 19 تامىزدا قىزىلوردا وبلىسى قازالى قالاسىندا دۇنيەگە كەلگەن. 1976 جىلى الماتى ...
