بەرگەن ەمەس، بەرگەنىنە قۋانعان ادام – جومارت
ءماۋلانا جالالاددين رۋمي جومارتتىق تۋرالى بىلاي دەگەن ەكەن: «جومارتتىقتا جانە كومەكتەسۋدە اعىپ تۇرعان سۋداي بول. مەيىرىم مەن راقىمدىلىقتا كۇن سياقتى، وزگەلەردىڭ كەمشىلىگىن جاسىرۋدا ءتۇن سياقتى بول. اشۋشاڭدىق پەن قىزبالىقتا ءولى سياقتى بول. قاراپايىمدىلىق پەن كىشىپەيىلدىلىكتە توپىراق سياقتى بول. جۇمساقتىقتا تەڭىزدەي بول. يا قانداي بولساڭ سولاي كورىن، يا قالاي كورىنسەڭ، سونداي بول.»
حالىق جادىندا قۇرمەتپەن ءوزىنىڭ قايىرىمدىلىعى مەن جومارتتىعىنا ساي اتى جايىلعان اتىمتاي جومارتتان ( حاتيم-تاي ) دوستارى «وزىڭىزدەن دە جومارت بىرەۋدى كورگەنسىز بە؟» دەپ سۇرايدى. سوندا ول: «ءيا، كوردىم» دەپ، مىنا وقيعانى ايتىپ بەرەدى:
ءبىر جەتىم جاس جىگىتكە قوناق بولعان ەدىم. ماعان قوي سويىپ، داستارحانىن جايدى، سىي-سياپات كورسەتتى. قوي ەتىنەن ءبىر جەرى ماعان قاتتى ۇنادى. انت ەتىپ، «مىنا جەرى وتە ءدامدى ەكەن» دەدىم. جىگىت بىردەن سىرتقا شىعىپ كەتتى. ون قويى بار ەكەن. بىرەۋىن سويىپ قويعان، قالعان توعىزىن دا بىردەن سويىپ جىبەردى. ماعان ۇناعان جەرلەرىن ءپىسىرىپ، الدىما الىپ كەلدى. مەن بولعان جايدان حابارىم جوق. قايتاردا ەسىكتىڭ الدىنداعى قاندى كورىپ، ءمان-جايدى ءتۇسىندىم دە، ۇرسىپ:
«ون قويدىڭ ءبارىن سويعانسىڭ با؟ مۇنىڭ نە؟» دەدىم.
جىگىت «وندا تۇرعان نەسى بار؟ سىزگە ءبىر نارسە ۇناپ قالعان ەكەن. ول نارسە مەنىڭ قولىمدا، سىزدەن اياپ قالعانىم دۇرىس بولا ما؟» دەدى.
بۇل وقيعانى تىڭداپ وتىرعان دوستارى:
«جەتىم جىگىتتىڭ سىي-سياپاتىنا ءسىز دە وعان ءبىر نارسە بەرگەن شىعارسىز؟» دەپ سۇرادى. سوندا اتىمتاي جومارت جاۋاپ بەرىپ:
— ءيا، بەردىم، ءبىراق اسا ماڭىزدى سانالمايدى، — دەدى.
— نە بەردىڭىز؟
— ءۇش ءجۇز تۇيە مەن بەس ءجۇز قوي.
— ولاي بولسا، ءسىز ودان دا جومارت ەكەنسىز.
— جوق، ول جىگىت مەنەن دە جومارت. ويتكەنى ول مالىنىڭ ءبارىن بەردى. ال مەن مالىمنىڭ تەك ازىن عانا بەردىم. كەدەي ادامنىڭ جارتى نانىن تولىقتاي قوناققا بەرگەنى ماڭىزدى ما، الدە باي كىسىنىڭ ۇلكەن تابىنىنان ءبىر تۇيەسىن قوناعىنا سويىپ بەرگەنى مە؟
You Might Also Like
-
وتەگەننىڭ اكەسى وتەعۇل ەلۋ بەس جاسقا كەلگەندە، ازامات بولىپ، ەر جەتىپ وتىرعان ون ەكى ۇلى وبا اۋرۋىنان قايتىس بولىپتى. ون ەكى ۇلىنان بىردەي ايىرىلعان وتەعۇل كۇندىز-تۇنى جىلاۋدان كوز اشپاپتى. ءسويتىپ ...
-
وزبەك، قالماق، تۇرىكپەن ۇشەۋى رەسەيگە قوسىلۋ جونىندە پاتشا وكىمەتىنە ادام جىبەرسە، ولار: «امۋداريانى سات»، — دەيدى. ولار نە ايتارىن بىلمەي، ويلاسا كەلە، كىشى جۇزدە دات بالاسى سىرى...
