بەس دۇشپان ءىس بىلسەڭىز…
دالانى جەل ۇرلەپ تۇر. جانتاق قاۋلاي وسكەن جازىقتىڭ توبەشىكتەۋ جەرىندەگى جىڭعىلدى تاسا ەتىپ كورشىمىز ەكەۋمىز قوي قارايلاپ وتىرمىز. جەلدىڭ باعىتىنا قارسى ىقتاي جايىلاتىن ۋاق مالدى كوزدەن ءبىر ءسات تاسا ەتۋگە بولمايدى. كەنەت "پالەنشەكەڭنىڭ قويى ەگىز تاپقان-اۋ دەيمىن شاماسى، اناۋ سايدا جۇرگەن تۇگەنشەنىڭ سيىرلارى ما، از ۋاقىت بۇرىن جامان لاعى دا جوق ەدى، اناۋ تايلار مىنا ۇيدىڭكى ەمەس پا، ا؟" دەپ ءبىر اڭگىمەنىڭ شەتىن شىعاردى. ءا.... قويلارىن باعۋشى ەدى، ءقازىر جايىلىمعا ەمىن-ەركىن جىبەرەتىن بولىپتى عوي دەگەنىم سول-اق ەكەن، "ە، ونىڭ مۇرتىن بالتا شابار دەيمىسىڭ، تابىن-تابىن سيىرى تۇرعاندا" دەپ قويىپ قالدى. وسىلايشا اۋىلدىڭ جارتى ءۇيىنىڭ ويشا قوراسىنا كىرىپ، مالىنىڭ باسىن تۇگەندەپ شىقتى. ءتىپتى بىزدەن جىراقتاۋ جەرگە قونىستانعان اۋىلداستارىمىزدىڭ دا قانشا سۇتقورەكتىسى بارىنان حاباردار. كورشىمنىڭ مالدى الىستان جازباي تانيتىندىعى مەن كىمنىڭ ەنى قانداي ەكەنى ەسىندە ساقتالىتىندىعىنا ءتانتىمىن. ايتكەنمەن، اڭگىمەسىنىڭ استارىنان كورەالماۋشىلىق پەن ءىشتارلىقتىڭ لەبى سەزىلەدى. كورشى-قولاڭ باس قوسىپ، اڭگىمە دۇكەن ءجۇرىپ جاتقان ساتتەردە "مىنانىڭ ارقاسى كەڭىپ، اۋزى مايلانىپ قالىپتى" دەپ ەلدىڭ قۇلاعىن كوتەرىپ وتىرادى.
ءيا، قازاقتىڭ قاشاننان بەرگى جازىلماي كەلە جاتقان دەرتتەرى - وسەك، وتىرىك، ماقتانشاقتىق، ەرىنشەكتىك، جيعان مالىن دالاعا شاشۋ. اباي اتامىز اتاعان بەس اسىل ىستەن گورى بەس دۇشپاندى جانىنا سەرىك ەتكەندەر كوپ بۇل ۋاقىتتا. تۇلكى زاماندا تازى بولىپ شالۋعا تىرىساتىندار مەن مىسىقتىلەۋلەردىڭ مىسى ۇستەم بولىپ تۇر. جوعارىدا مەن تەك كوزبەن كورگەنىمدى عانا بايان ەتتىم. مۇنداي جانداردىڭ اۋىل-ايماقتا بارى راس، ءتىپتى قاراسى قالىڭ. وزگەنىڭ ءتورت تۇلىگىنە كوزىن ءسۇزىپ، وزىنىكىنەن شاشاۋ شىعارمايتىن شىقبەرمەس شىعايبايلاردىڭ قانشاۋىن ايتايىن سىزدەرگە؟! تاريحىمىزدا بايگەدەن وزا شاپقان تۇلپاردى مەنىڭكى دەپ يەمدەنۋدەن قىمسىنبايتىن ادامداردا بولعان عوي. حاندىق بيلىك پەن شۇرايلى جەرگە تالاسقان رۋلارىمىز بەن رەسەي پاتشا وكىمەتى بەكىتەتىن بولىستىقتى بيىكتىك كورىپ، قاراپايىم جۇرتتىڭ قۇتىن قاشىرعان بيلەرىمىزدىڭ اتىمەن قوسا، ءىسى دە قالدى تاريحتا.
حوش... تاريحقا تەرەڭدەي بەرسەك تاڭداي قاعارىمىز ايدان-انىق. ۇلتتىق قۇندىلىق پەن داستۇرگە مىعىم اۋىل قازاعىنىڭ دا اقىلى جالعان اتاق پەن كورەالماۋشىلىقتان ءارى اسا الماي وتىر. قالا قازاعىنىڭ ءحالى تىپتەن جاعا ۇستاتارلىق. ءبىرى ۇلىنىڭ تويىنا بيىكتىگى ءبىر جارىم مەتر تورت جاساتسا، ءبىرى قىزىنىڭ مەكتەپ بىتىرگەنىنە تەمىر تۇلپاردى تىزگىندەتىپ، ءوزارا جارىسىپ الەك. ارينە، بىرەۋدىڭ ءمىنىن كورگەننىڭ، جاماندىعىن تەرگەننىڭ ابەستىگىن بىلەمىز. دەگەنمەن، مۇنى كورىپ، بويىنا وسى قاسيەتتەردى ءسىڭىرىپ وسكەن ۇرپاق قانداي بولماق؟ قۋ دۇنيەنىڭ قىر سوڭىنا تۇسكەن جاس بۋىن وسكەن سوڭ قۇلقىنى قۇدىق، جەمساۋى استاۋى بولماي ما؟ وسى قاسيەتتەردەن ءبىرجولا ارىلۋدىڭ جولى بار ما؟ باستىسى اۋىلى ارالاس جاتقان از عانا قازاقتىڭ اراسى بەس دۇشپاننىڭ اسەرىنەن الشاقتاپ كەتپەسە ەكەن...
ەرقانات بالتاباي حقتۋ جۋرناليستيكا
You Might Also Like
-
ۇكاش اتا: قاسيەتتىلىگى مەن تاريحى تاريحى تەرەڭگە تامىرلاعان قازاق حالقى، كونەنىڭ كوزى كەتسە دە، ەسكەرتكىشتەرىن قاستەرلەپ، قىزعىشتاي قورىپ، ەستەلىكتەرىن جادىندا،جۇرەگىندە ساقتاعان سونداي اق ۇرپاقتان...
-
رۋحاني جاڭعىرۋ – ادام بالاسىنىڭ ىشكى جان دۇنيەسىنىڭ تازالاعى، جاقسىلىقتار مەن يگى ىستەر جاساۋعا ۇمتىلۋى. رۋحاني جاڭعىرۋ-تابىستى ەل بولۋىمىزدىڭ كەپىلى. ۇلتتىق بولمىسىمىزدى ساقتاپ ق...
