بەس تورە (ءى نۇسقا)
تاتتىمبەت تانىمال كۇيشى عانا ەمەس، تۇتاس قاراكەسەكتە ءسوز ۇستاعان سەرى، شەجىرە-شەشەن بولعان كىسى ەكەن. سونىسىنان بولسا كەرەك، ءبىر جولى ول قاراكەسەكتىڭ بەلگىلى ءبىر ءبيى — الشىنباي ءبيدىڭ اتىنان ومبىعا جىبەرىلەدى. تاتتىمبەت بۇل ساپارىندا شىڭعىس ءۋاليحانوۆ، مۇسا شورمانوۆ، ىبىراي جايىقبايەۆ سياقتى ءبىرتالاي بي-تورەلەرمەن ساپارلاس بولادى. بي-تورەلەردىڭ جول بويى بايقاتقان وزبىرلىعىنا، مەستىگىنە، ەلگە تانىتقان سۋىق راي زورەكەرلىگىنە ىشتەي ىزاسى ءتۇسىپ، ۇناتپاي كەلە جاتقان كۇيشى تورەلەر ءبىر اۋىلعا ءتۇسىپ، ءماجىلىس قۇرىپ وتىرعاندا، تىڭنان ءبىر كۇي شەرتەدى. بوگەنايى بوتەن بۇل كۇيدى بايقاپ قالعان تورەلەر: «مىناۋ قايسى كۇي ەكەن؟» — دەپ سۇراپ قالادى. سوندا تاكەڭ:
كۇيدىڭ اتى «بەس تورە»،
بەسەۋى دە مەس تورە.
ساناڭ بولسا كەۋدەڭدە،
جۇمباعىمدى شەش تورە.
ءوز ەلىنە قاسقىرداي،
مۇنشا نەگە ءوش تورە؟» — دەپ جاۋاپ قاتىپ، كۇيدى تاعى قايىرىپ ءبىر شەرتىپ جىبەرگەن ەكەن. ءسويتىپ، كۇيشىنىڭ ايگىلى «بەس تورە» كۇيى وسى ومبى ساپارىنان تۋعان ەكەن.
You Might Also Like
-
افريكانىڭ 30-دان استام ەلى، ءبىرقاتار ازيا جانە ارال ەلدەرى الەمدەگى ەڭ از دامىعان ەلدەردىڭ تىزىمىنە ەندى. بۇل تۋرالى بىرىككەن ۇلتتار ۇيىمىنىڭ ساۋدا جانە دامۋ جونىندەگى كونفەرەنسياسىندا (يۋنكتاد) ناش...
-
ارقا بويىندا ءبىر جىلدارى قىس تىم قاتتى بولىپ، تۇتاس جاتقان ادىرلاردى قاساتتانعان قار الىپ مالعا جايىلىم بەرمەيدى.
