بعم ءتورت ءپاننىڭ مۇعالىمدەرىن 2،5 ايدىڭ ىشىندە اعىلشىن تىلىندە سويلەتىپ شىقپاقشى
پيلوتتىق جوبا استانا، الماتى مەن قاراعاندى قالالارىندا قولعا الىندى. ءاربىر قالادا 25 ءمۇعالىم، جالپى 75 مەكتەپ وقىتۋشىسى حيميا، فيزيكا، بيولوگيا مەن ينفورماتيكا پاندەرىن اعىلشىن تىلىندە تۇسىندىرۋگە ۇيرەنەدى. ولار ءۇشىن ارنايى باعدارلاما جاسالدى. ءبىلىم جانە عىلىم مينيسترلىگىنىڭ وسى تاپسىرىسىن Professional development centre الىپ وتىر، دەپ حابارلايدى قازاقپارات.
اتالعان ورتالىقتىڭ دەپارتامەنت ديرەكتورى ايدا ۋرازايەۆا تاپسىرىستىڭ ناقتى سوماسىن اشقان جوق. الايدا وقۋعا تۇسكەن 75 ءمۇعالىمدى 2،5 ايدىڭ ىشىندە اعىلشىن تىلىندە ەركىن سويلەۋگە، ءتىپتى جازۋعا ۇيرەتىپ شىعامىز دەپ وتىر.
«وسى ۋاقىتتىڭ ىشىندە ءۇش قالادا ءبىلىم الاتىن مۇعالىمدەر كۇنىنە ءتورت جارىم ساعات اعىلشىن ءتىلىن ۇيرەنەتىن بولادى. بارلىق ساباقتار تەك سول تىلدە عانا وتەدى. پيلوتتىق جوبا ءۇشىن ءبىز ارنايى باعدارلامانى دايارلاپ شىقتىق. مۇعالىمدەر سول باعدارلاما بويىنشا ءتىل ۇيرەنەتىن بولادى. شىنى كەرەك، باستاپقىدا ولاردىڭ تاراپىنان ءبىر قورقىنىش بولدى. الايدا قازىرگى كەزدە ولاردىڭ بويىندا كادىمگىدەي قۇلشىنىس، ءتىلدى ۇيرەنەمىن دەگەن ماقسات انىق بايقالادى»، - دەيدى ا.ۋرازايەۆا.
دەپارتامەنت باسشىسىنىڭ سوزىنە قاراعاندا، مۇعالىمدەردىڭ ءتىزىمىن مينيسترلىك ءبىلىم بەرۋ باسقارمالارىنىڭ ۇسىنىسى نەگىزىندە ازىرلەدى. ولاردىڭ بارلىعى - حيميا، فيزيكا، بيولوگيا مەن ينفورماتيكا وقىتۋشىلارى. ازىرشە، اعىلشىن ءتىلىن بىلمەيدى. جەلتوقسان ايىنا دەيىن ولار Starter، ياعني باستاپقى كەزەڭنەن باستاپ، ا1-ا2-ۆ1 سياقتى ساتىلاردان ءوتۋى ءتيىس. ال كۋرستىڭ سوڭىندا ولاردىڭ دايىندىقتارىن تاۋەلسىز ماماندار باعالايدى.
You Might Also Like
-
جىل قايىرۋ بويىنشا ون ەكى جىل اينالعاندا ءبىر مۇشەل تولادى. كونە كوز قاريالار وتكەن جىلداردى ەسەپتەگەندە نەمەسە ادام جاسىن ايىرعىسى كەلگەندە وسى مۇشەلدى قولايلى كورەدى.
-
جوعارى وقۋ ورىندارىنىڭ دەڭگەيىن تۇلەكتەردىڭ جۇمىسقا تۇرۋىنا قاراي باعالاۋ كەرەك. بۇل تۋرالى بۇگىن استانادا پارلامەنت سەناتىنىڭ ءتوراعاسى قاسىم-جومارت توقايەۆ ءمالىم ەتتى.
