ءبىلىم سالاسىنداعى رەفورمالاردىڭ ۇزدىكسىز جۇرگىزىلۋىن توقتاتا تۇرۋ قاجەت شىعار - توقايەۆ
ءبىلىم بەرۋ سالاسىندا تەرەڭ جان-جاقتى ويلاستىرىلماعان سىناقتاردى وتكىزۋگە جول بەرۋگە بولمايدى. بۇل تۋرالى بۇگىن ق ر پارلامەنتى سەناتىندا ءوتىپ جاتقان «ورتا ءبىلىم بەرۋ جۇيەسىنىڭ جاي-كۇيى، پروبلەمالارى جانە زاڭنامالىق رەتتەۋ پەرسپەكتيۆالار» تاقىرىبىنا ارنالعان پارلامەنتتىك تىڭداۋ بارىسىندا سەنات ءتوراعاسى قاسىم-جومارت توقايەۆ ايتتى.
«ەلىمىزدە ورتا ءبىلىم بەرۋ سالاسى ءجيى رەفورمالار جۇرگىزىلەتىن سالالاردىڭ قاتارىنا جاتادى. سوڭعى جىلدارى مەكتەپتەرىمىز ۇنەمى رەفورمالار جۇرگىزۋ رەجيمىندە جۇمىس ىستەۋدە. سوعان قاراماستان بۇل سالا زامان تالابىنا ساي جاڭعىرتىلدى دەپ ايتا المايمىز. جۇرگىزىلگەن رەفورمالاردىڭ تيىمدىلىگى كورىنەتىن ناتيجەلەرگە ءالى دە قول جەتكىزگەن جوقپىز. مەكتەپتەگى ءبىلىم بەرۋ جۇيەسىندە جاسالعان جاڭالىقتار كوپ جاعدايدا قوعامدى ايتارلىقتاي تولعاندىرادى»، - دەدى سەنات ءتوراعاسى.
وسى رەتتە ول اتالعان جايتتىڭ باستى سەبەبى رەتىندە ءتۇسىندىرۋ شارالارىنىڭ جەتكىلىكسىز دەڭگەيدە جۇرگىزىلۋىنە، ءبىلىم بەرۋ جۇيەسىندەگى جاڭالىقتاردىڭ ءتيىستى دەڭگەيدە جۇزەگە اسپاۋىنا جانە پەداگوگ مامانداردىڭ ساپاسىنا تىكەلەي بايلانىستى بولىپ وتىرعانىن باسا ايتتى.
«مۇمكىن بۇل ماڭىزدى سالاداعى رەفورمالاردىڭ ۇزدىكسىز جۇرگىزىلۋىن توقتاتا تۇرۋ قاجەت شىعار. قانداي جەتىستىككە جەتتىك، قايدا كەلدىك، نەگە قول جەتكىزدىك؟ الدىمەن وسىلارعا باعا بەرىپ الۋ كەرەك. ءبىلىم بەرۋ سالاسىندا تەرەڭ جان-جاقتى ويلاستىرىلماعان سىناقتاردى وتكىزۋگە جول بەرۋگە بولمايدى. وسى ورايدا قازاقتىڭ ۇلى اقىنى، اعارتۋشى، ۇستاز احمەت بايتۇرسىنوۆتىڭ جاستاردىڭ وقۋ، تاربيە جۇمىس تۇزەلمەي جۇرت ءىسى تۇزەلمەيدى» دەگەن قاعيداسىن قاشاندا ەستە ۇستاعانىمىز ءجون»، - دەدى قاسىم-جومارت توقايەۆ.
دەرەككوز: قازاقپارات
You Might Also Like
-
قازاقستاندا اقىلى وقۋعا تۇسكىسى كەلگەن تالاپكەرلەردى ۇلتتىق ءبىرىڭعاي تەستىلەۋدەن بوساتۋ ماسەلەسى تالقىلانۋدا. بۇل تۋرالى بۇگىن ق ر پارلامەنتى سەناتىندا ءوتىپ جاتقان «ورتا ءبىلىم بەرۋ جۇيەسىنىڭ ج...
