ءبىرىنشى سىنىپ وقۋشىلارى بيىلعى 1 قىركۇيەكتەن باستاپ 5 كۇندىك وقۋ اپتاسىنا كوشەدى
مەملەكەت باسشىسىنىڭ تاپسىرماسى بويىنشا، وسى وقۋ جىلىنىڭ 1 قىركۇيەگىنەن باستاپ، ەلىمىزدىڭ جالپى ءبىلىم بەرەتىن مەكتەپتەرىنىڭ 1-سىنىپتارى 5 كۇندىك وقۋ اپتاسىنا كوشەدى. ءبىرىنشى سىنىپ وقۋشىلارى 1 قىركۇيەكتەن باستاپ، 1 ماۋسىمعا دەيىن وقيتىن بولادى.
بۇل تۋرالى ق ر ءبىلىم جانە عىلىم مينيسترلىگىنەن حابارلادى.
دەمەك، مەكتەپتەردىڭ 1 سىنىپ وقۋشىلارى 2017 جىلدان ەمەس، وسى جىلدان باستاپ 5 كۇندىك وقۋ جىلىنا كوشەدى.
كەلەسى قادامعا سايكەس، 2017 جىلى ەكىنشى، بەسىنشى، جەتىنشى، توعىزىنشى سىنىپ وقۋشىلارى 5 كۇندىك وقۋ اپتاسىنا كوشەدى. 2018 جىلدان باستاپ، بارلىق باسقا سىنىپ وقۋشىلارى جاڭا وقۋ بارىسىنا كوشەدى.
5 كۇندىك ءبىلىم بەرۋگە كوشۋ ءبىلىم بەرۋ باعدارلاماسىنىڭ جاڭارتىلۋىنا بايلانىستى. جاڭا ءبىلىم بەرۋ باعدارلامالارى، بۇعان دەيىن حابارلانعانداي، نازاربايەۆ زياتكەرلىك مەكتەبى باعدارلاماسىنا، ۇزدىك الەمدىك تاجىريبەگە سايكەس فۋنكسيونالدىق ساۋاتتىلىققا نەگىزدەلەدى.
«مينيسترلىك قازىرگى تاڭدا بارلىق مەكتەپتەردىڭ 5 كۇندىك وقۋعا كوشۋىن تەزدەتۋ امالدارىن قاراستىرۋدا. الايدا، بۇل ماسەلەنى شەشۋ ءۇشىن تەزدەتىلگەن كەستە نەگىزىندەگى ءبىلىم بەرۋ باعدارلامالارىنىڭ مازمۇنىن جاڭارتۋ بويىنشا تولىق ەسەپ جۇرگىزۋ كەرەك. سونىمەن قاتار، ءۇش اۋىسىممەن وقيتىن مەكتەپتەر ماسەلەسىن دە جەتە قاراستىرۋ قاجەت.
ءبىز تۇسىنەمىز، ءبىلىم بەرۋ پروسەسىنىڭ ساپاسىنا دا، كولەمىنە دە زيان كەلمەۋ ءۇشىن، جازعى دەمالىس مەرزىمى شامامەن 2 اپتاعا كەيىنگە جىلجىتىلادى»، دەلىنگەن مينيسترلىكتىڭ حابارلاماسىندا.
قازاقستان رەسپۋبليكاسى پرەمەر-مينيسترىنىڭ ورىنباسارى داريعا نازاربايەۆا 5 كۇندىك وقۋ اپتاسىن ەنگىزۋ ماڭىزدىلىعىن اتاپ ءوتتى: «مەن اتا-انالار مەن ءبىزدىڭ بالالار ءۇشىن وتە قۋانىشتىمىن، ويتكەنى مەكتەپتەن تۇسەتىن جۇكتەمە وتە اۋىر جانە بالالاردىڭ دەنساۋلىعىنا اسەر تيگىزەدى، ولار ءبىر كۇن ىشىندە قالپىنا كەلە المايدى. ءبىزدىڭ جوسپارىمىز بويىنشا، سەنبى كۇنى بالالار جان-جاقتى دامي الاتىن بولادى، ءتىل ۇيرەنۋ كۋرستارىنا نەمەسە سپورت سەكسيالارىنا قاتىسۋعا مۇمكىندىگى بولادى. سونىمەن قاتار ەڭ باستى تاربيەنى ءبىز وتباسىنان الامىز، سوندىقتان سەنبى كۇنى بالالاردا اتا-انالارىمەن تىلدەسۋگە، جانۇيا داستۇرلەرىمەن تانىسۋعا بولەتىن ۋاقىت بولۋى قاجەت. بۇدان باسقا، سەنبى - وقىتۋشىلاردى قايتا دايارلاۋ ءۇشىن ماڭىزدى كۇن بولادى».
You Might Also Like
