ءبىتىرۋشى تۇلەكتەرگە موتيۆاسيا سىيلاعان 4 ۇندەۋ
كوپتەگەن شەتەلدىك جوعارعى وقۋ ورىندارىندا تۇلەكتەرگە ديپلوم تابىستاۋ سالتاناتىنا قۇتتىقتاۋ، ءارى ولاردى جىگەرلەندىرۋ ءۇشىن اتاقتى ادامداردى شاقىراتىن ءداستۇر بار. كوبىنە اسا تانىمال ادامدار تۇلەكتەرگە وزدەرىنىڭ ساتسىزدىكتەرى تۋرالى اڭگىمەلەيدى — ويتكەنى كەشەگى ستۋدەنتتەر بارىنەن بۇرىن ساتسىزدىكتەن كوبىرەك قورقاتىن بولار. دجوان روۋلينگ، ستيۆ دجوبس جانە ستيۆەن سپيلبەرگ پەن دجيم كەرري ساتسىزدىكتەردەن نەگە قورىقپاۋ كەرەكتىگىن تۇسىندىرەدى.
دجوان روۋلينگ، جازۋشى
2016 جىلى دجوان روۋلينگ گولليۆۋدتىڭ "The Hollywood Reporter" جۋرنالىنىڭ نۇسقاسى بويىنشا الەمدەگى ەڭ ىقپالدى 25 اۆتورلاردىڭ كوشىن باستادى. ال ودان جيىرما جىل بۇرىن، 1997 جىلى Bloomsbury باسپاسى گارري پوتتەر تۋرالى العاشقى كىتابىن جاريالاعانعا دەيىن، ول الەۋمەتتىك جاردەماقىعا كۇنىن كورگەن، تۇراقتى تابىسى جوق، ەشكىمگە بەلگىسىز جالعىزباستى انا ەدى.
«وقۋ بىتىرگەننەن سوڭ، اراعا جەتى جىل وتكەندە مەن بارلىق تۇرعىدا ۇلكەن ساتسىزدىككە ۇشىرادىم. نەكەم بۇزىلدى، بالامەن جالعىز، جۇمىسسىز ءارى اقشاسىز قالدىم. مەن ساتسىزدىكتى كەرەمەت دەگىم كەلىپ تۇرعان جوق. مەنىڭ ءومىرىمنىڭ ءدال سول ءساتى مەن ءۇشىن ەڭ قيىن كەزەڭ بولدى، بولاشاقتا ءومىرىم ءقازىر گازەتتەردە جازىلىپ جاتقانداي سوڭى باقىتقا ۇلاساتىن ەرتەگىگە اينالادى دەپ ويلامادىم. ءبىراق ءدال وسى ساتسىزدىك مەنى قۇتقاردى — مەنىڭ باستى قورقىنىشىم ورىندالدى، سوعان قاراماستان ەڭ باستىسى ءتىرى ەدىم، مەنىڭ سۇيىكتى قىزىم، ەسكى باسپا ماشينام جانە قيالدا كوپتەگەن يدەيالارىم بولدى. ەگەر باسقا سالادا جەتىستىككە جەتۋ مۇمكىندىگى بۇيىرعاندا، مەن شىن مانىندە جاقسى كورەتىن ىسىممەن اينالىسۋعا مۇمكىن باتىلدىعىم جەتپەس ەدى.
ساتسىزدىكتەردى اينالىپ ءوتۋ مۇمكىن ەمەس، تەك اسقان ساقتىقپەن عانا ءومىر سۇرگەن بولساڭىز عانا ساتسىزدىككە كەزىكپەيتىن شىعارسىز، دەگەنمەن، بۇنداي ءومىردى «ءومىر» دەپ اتاۋعا كەلمەيتىن شىعار. ءبىراق بۇل جاعدايدا ءسىز ساتسىزدىكتىڭ ناعىز وزىنە ۇشىرايسىز».
گارۆارد تۇلەكتەرى الدىنداعى سوزدەرى، 2008
ستيۆەن سپيلبەرگ، كينورەجيسسور
تاريحتاعى ەڭ تابىستى رەجيسسەرلەردىڭ ءبىرى تەك 2002 جىلى 55 جاسىندا جوعارى ءبىلىم تۋرالى ديپلومىن العان. جاس كەزىندە ول كاليفورنيا كينومەكتەبىنە ەكى مارتە تۇسۋگە تىرىسقان، ءبىراق ونى «دارىنسىز» دەپ تانىپ، مەكتەپكە قابىلداماعان. سودان كەيىن ول تەحنيكالىق كوللەدجگە تۇسكەن، الايدا كوپ ۇزاماي Universal Studios-تاعى «ارمانداعان جۇمىسىنا» ورنالاسۋ ءۇشىن كوللەدجدى تاستاپ كەتكەن. بەس جىلدان كەيىن سپيلبەرگتى اتاقتى قىلعان «Jaws» تريللەرى جارىق كوردى.
«مەن كوللەدجدەن كەتىپ قالدىم، ويتكەنى سەندەردىڭ كەيبىرەۋىڭ سياقتى مەن دە نە قالايتىنىمدى انىق ءبىلدىم. بالكىم، سەندەر ءقازىر جازۋشى-يۋموريست ەمەس، دوكتور بولعىلارىڭ كەلەتىنىن اتا-اناڭىزعا قالاي ايتۋدى ويلانىپ وتىرعان شىعارسىڭدار. مەن ءوز اتا-اناما ەگەر كينودا جولىم بولماسا، ۋنيۆەرسيتەتكە قايتا ورالامىن دەپ ايتتىم. ءبىراق كينودا جولىم بولدى.
ءبىزدىڭ ءومىرىمىزدىڭ العاشقى 25 جىلىندا ءبىزدى بوتەن داۋىستاردى تىڭداۋعا ۇيرەتەدى. اتا-انالار مەن وقىتۋشىلار ءبىزدىڭ سانامىزدى دانالىق سوزدەرمەن، پايدالى اقپاراتپەن تولتىرادى، سودان كەيىن ولاردىڭ ورنىن مىنا دۇنيەنىڭ شىن مانىندە قانداي ەكەنىن ۇيرەتەتىن باستىقتار باسادى. ءتىپتى ءبىز: «مەن الەمگە مۇلدەم باسقاشا قارايمىن» دەپ ىشتەي ويلاپ تۇرعانىمىزبەن، ءبىز ءۇشىن ولارمەن كەلىسىپ، جاي عانا باس يزەۋ الدەقايدا وڭاي بولاتىنى راس.
1980ء-شى جىلعا دەيىن تۇسىرىلگەن فيلمدەر كوبىنەسە شىندىقتان الشاق بولدى. مەن ءبىر كوپىرشىكتىڭ ىشىندە ءومىر سۇرگەندەي بولدىم، سەبەبى ماعان جوعارعى ءبىلىم جەتىسپەدى، مەنىڭ الەمگە دەگەن كوزقاراسىم ومىرلىك تاجىريبەگە ەمەس، ءوز باسىمداعى ويلارمەن عانا شەكتەلدى. سودان كەيىن مەن «لالاگۇل جازىعىنىڭ گۇلدەرى» ءفيلمىن ءتۇسىردىم. بۇل وقيعا تەرەڭ ماعىناعا، تەرەڭ شىندىققا تولى بولدى، مىسالى، فيلمدە شاگ ەيۆەري: «الەمدەگىنىڭ ءبارى سۇيىكتى بولعىسى كەلەدى» دەيدى. بۇل ءفيلمدى تۇسىرە وتىرىپ، كينو مەنىڭ ميسسيام بولۋى مۇمكىن ەكەندىگىن ءتۇسىندىم. كەز كەلگەن ادام وسىنى سەزىنەدى دەپ ۇمىتتەنەمىن».
گارۆارد ۋنيۆەرسيتەتىنىڭ تۇلەكتەرىنىڭ الدىندا سويلەۋى، 2016 جىل
ستيۆ دجوبس، كاسىپكەر
1976 جىلى 20 جاسار ستيۆ دجوبس ستيۆ ۆوزنياكپەن بىرگە اتا-اناسىنىڭ گاراجىندا Apple-دى قۇردى. 10 جىلدىڭ ىشىندە كاسىپورىن التى مىڭنان استام ادام جۇمىس ىستەيتىن، قۇنى ەكى ميلليارد دوللار بولاتىن ءىرى كومپانياعا اينالدى. ولاردىڭ اراسىندا دجوبستىڭ شاقىرۋى بويىنشا Appleء-دى باسقارعان ماركەتولوگ دجون سكاللي دا بولدى. ۋاقىت وتە كەلە ولاردىڭ بولاشاققا دەگەن كوزقاراستارى ەكىگە ايىرىلدى، ديرەكتورلار كەڭەسى سكالليدى قولدادى دا، ستيۆ دجوبسقا Apple-دان كەتۋگە تۋرا كەلدى.
«30 جاسىمدا مەنى ءوزىم قۇرعان كومپانيادان ۇلكەن داۋمەن جۇمىستان بوساتتى. سانالى عۇمىرىمدى ارناعان بارلىق نارسەدەن ءبىر ساتتە ايىرىلىپ، ءوزىمدى جابىرقاۋلى سەزىندىم. سول كەزدە مەنىڭ Apple-دان كەتكەنىم — مەن ءۇشىن ەڭ قايىرلى ءىس بولعانىن ءتىپتى بىلگەن جوقپىن. تابىستىڭ قيىن جولى جەڭىلدىكپەن الماستى، مەن قايتا تۋىلعان كۇيدە بولدىم. وسى سەزىممەن مەنىڭ ومىرىمدەگى شىعارماشىلىققا تولى كەزەڭدەردىڭ ءبىرى باستالدى. كەيىنگى بەس جىل ىشىندە مەن NeXT جانە Pixar–دى قۇردىم جانە سۇلۋ ايەلگە عاشىق بولدىم، كەيىن ول مەنىڭ جارىم بولدى. ەگەر مەن Apple-دان كەتپەگەنىمدە، مۇنىڭ ءبىرى دە بولمايتىنىنا سەنىمدىمىن. ءدارىنىڭ ءدامى سۇمدىق بولدى، ءبىراق ناۋقاسقا (ءوزىن ايتىپ وتىر) قاتتى قاجەت بولعان ەكەن.
مەن ءوز ءىسىمدى ەرەكشە جاقسى كورگەندىكتەن عانا كەرى شەگىنبەستەن، العا جىلجىعانىما سەنىمدىمىن. ەگەر ءسىز وزىڭىزگە ۇنايتىن نارسەنى ءالى تاپپاعان بولساڭىز — ىزدەۋدى جالعاستىرا بەرىڭىز».
ستەندفورد ۋنيۆەرسيتەتىنىڭ تۇلەكتەرىنىڭ الدىندا ءسوز سويلەۋى، 2005
دجيم كەرري، اكتور
دجيم كەرري العاش رەت 15 جاسىندا كومەديالىق نومىرىمەن ساحناعا شىققان ەدى — ونىڭ دەبيۋتى ءساتسىز بولدى. كوپتەگەن ءساتسىز كاستينگتەردەن كەيىن، 23 جاسار كەرري كينوداعى ءوزىنىڭ العاشقى، باستى ءرولىن سومداعان "Once Bitten" (1985) ءفيلمىن دە كوپشىلىك سالقىن قابىلدادى. تەك 31 جاسىندا Ace Ventura: Pet Detective» اتتى از بيۋدجەتتىك فيلمىنەن كەيىن عانا ونىڭ اتاعى شىعا باستادى. فيلمگە ۆەنتۋرانىڭ وبرازى مەن سەناريدى ءدجيمنىڭ ءوزى ويلاپ تاپقان. بۇل فيلم ءۇشىن كەرري ەڭ ناشار اكتەرلىك جۇمىستارعا بەرىلەتىن سىيلىق «Golden Raspberry» نوميناسيالاندى، ءبىراق كورەرمەندەر اراسىندا فيلم ۇلكەن تابىسقا يە بولدى، ال ەيس ۆەنتۋرا ايگىلى كومەديا كەيىپكەرلەرىنىڭ بىرىنە اينالدى. كەرريدىڭ كەلەسى فيلمدەرى — «The Mask»، «Dumb and Dumber»، «The Truman Show» كينەماتوگرافيانىڭ كلاسسيكاسىنا اينالعان.
«ادامداردىڭ كوبى «سەنىمدى» دەگەن جەلەۋمەن، قورقىنىش جولىن تاڭدايدى. مەنىڭ اكەم كوميك بولۋدى ارماندايتىن، ءتىپتى ول ءۇشىن ونىڭ بارلىق مۇمكىندىگى بولعان. ءبىراق، قولىنان كەلەتىنىنە سەنبەدى، سوندىقتان، ەسەپشى بولىپ جۇمىس ىستەپ، جايباراقات «جايلى» ورىندى تاڭدادى. مەن 12-گە تولعاندا ول جۇمىستان ايىرىلىپ قالدى، سالدارىنان ءبىزدىڭ وتباسىمىز قيىن كۇندەردى باستان كەشتى. وسى مىسالدان تۇيگەنىم، ۇنامسىز جۇمىستان دا ساتسىزدىككە ۇشىراۋ مۇمكىن ەكەن، ولاي بولسا نەگە جانىڭ قالايتىن ىستە ب ا ق سىناماسقا. بۇل كۇلكىلى نەمەسە مۇلدەم مۇمكىن ەمەس سياقتى كورىنۋى مۇمكىن، ءبىز جاراتقاننان سۇراۋعا ءتىپتى تىرىسپايمىز دا. مىنا، مەن، ءوزىڭىز قالاعانىڭىزدى سۇراي الاتىنىڭىزعا بارلىق مۇمكىندىگىڭىز بارىنا ءتىرى دالەل بولا الامىن».
ماحاريشي مەنەدجمەنت ۋنيۆەرسيتەتىنىڭ تۇلەكتەرىنىڭ الدىندا سويلەۋى، 2014
وقۋعا كەڭەس بەرەمىز:
You Might Also Like
-
جامبىل وبلىسى ت.رىسقۇلوۆ اۋدانى قۇلان اۋىلى قۇلان شاعىن ورتالىقتى مەكتەپ-گيمنازياسىنىڭ وقۋشىسى سەرىك نۇرجان
-
ءامين تۇياقوۆ (1938 جىلى 12 اقپاندا ماڭعىستاۋ وبلىسى ماڭعىستاۋ اۋدانى شايىر اۋىلىندا تۋعان) — كسرو-نىڭ ەڭبەگى سىڭگەن سپورت شەبەرى، كسرو-نىڭ ءۇش دۇركىن چەمپيونى، الەم كۋبوگىنىڭ جەڭىمپازى.
