InfoHub Logo

مەكتەبىمىز قالىڭ اۋىلدىڭ ورتاسىندا، قىراڭداۋ بيىك جەردە. سىرت جاعىنان اق بالشىقپەن سىلانعان. ەكى بولمەدە كلاسىمىز بولادى، ءبىر بولمەدە شەشىنەمىز. قالعان ەكى بولمەدە وقىتۋشىلارىمىز بەن قىزمەتشى تۇرادى. ءار بولمەدە ءۇش تەرەزەدەن، ەكى بولمەگە ءبىر پەشتەن. ءار كلاستا ەكى ءبولىم، ەكى بولىمگە ەكى وقىتۋشىدان. ءبىزدىڭ كلاسىمىزدا جيىرما پارتا بار. ءبىر پارتادا ەكى بالادان وتىرامىز. پارتالار قاتار-قاتار قويىلعان، ءار قاتاردىڭ اراسىنان كىسى جۇرەرلىك جەر قالىنعان. پارتادا وتىرعاندا جارىق سول جاعىمىزدان تۇسەدى. پارتالاردىڭ الدىندا وقىتۋشىعا قويىلعان ستول مەن ورىندىق بار. وقىتۋشىنىڭ سول جاعىندا قارا تاقتا تۇرادى. تاقتانىڭ ءبىر جاعى سىزۋسىز، ەكىنشى جاعى قىزىلمەن سىزۋلى. تاقتاعا ءبىز بورمەن جازامىز. تاقتانىڭ ارتىندا شكاف تۇرادى. شكافتىڭ ىشىندە كىتاپ، قاعاز، قارىنداش، سيا ساقتالادى. ءبىزدىڭ قارسى الدىمىزدا جاردا كوبەيتۋ مەن ولشەۋلەر ساتىسى ءىلۋلى تۇرادى.

ءبىز ءتورتىنشى بولىمدە وقىپ ءجۇرمىز. ەندىگى جىلى ەكىنشى باسقىش مەكتەپكە كىرمەكپىز. وسى كۇنى ەسەپ عىلىمىن، جاعراپيانى، قوعام قۇرىلىسىن، جاراتىلىس عىلىمىن، انا ءتىلىن وقىپ ءجۇرمىز. بۇلاردان باسقا سۇگىرەت (سۋرەت) سالىپ ۇيرەنەمىز. وقىتۋشىمىز بيىل اۋىل ادامدارىنان جەر سۇراپ الىپ، بىزگە باقشا سالعىزدى. جازداي باقشامىزدى ءوزىمىز سۋاردىق. كۇز بولعاندا ءوزىمىز جينادىق. مەكتەپتەگى بالالار جينالىپ ەكى جەتىلىك جورنال شىعارامىز. جورنالىمىزدى شاكىرتتەردەن باسقا اتا-انالارىمىز دا وقيدى. كەيبىر كۇندەرى وقىتۋشىلارىمىز ءبىزدى جيناپ الىپ، كىتاپ وقىپ، تۇسىندىرەدى. يا ءوزىمىز جينالىپ وقىپ، وقىلعان كىتاپ جايىندا ءسوز قىلامىز. جازدى كۇنى وقىتۋشىلارىمىز ەرتىپ ءجۇرىپ جەردىڭ قۇيقاسى، ءشوبى، جاندىقتارمەن تانىستىرادى. ەگىنشىلەر سابان ايداپ جاتقان جەرگە الىپ بارىپ، جەردى قالاي، قاشان جىرتۋىن، قالاي تۇقىم سەۋىپ، قالاي تىرمالاۋىن كورسەتەدى. بيىل مارقاباي دەگەن جولداسىمىزدىڭ ءوزى ءبىر جەرگە تۇقىم سەۋىپ شىقتى.

ساباعىمىزدى بىلمەي قالساق، وقىتۋشىمىز قايتادان تۇسىندىرەدى. كەيىپ، جازالاندىرمايدى، كەيدە قاسىنداعى جولداسىنا مازا بەرمەي، تەنتەك بولعان بالانى وڭاشا وتىرعىزىپ قويادى. اتا-انالارىمىز بەن وقىتۋشىلارىمىزدى رەنجىتپەلىك دەپ ساباعىمىزدى دۇرىس وقيمىز.

---