InfoHub Logo

ءار ءجۇز جىلدا دۇنيەنىڭ حالقى اۋىسادى، ياعني بۇرىنعى ءومىر سۇرگەندەر كەتىپ، جاڭا ادامدار كەلەدى. ءبىر زاماندارى باسقالاردىڭ مۇلكى بولعان نارسەلەردى ءقازىر ءبىز قولدانۋدامىز، بىزدەن كەيىن دە باسقالار قولدانادى. ءبىر قوناق ۇيدە تۇرساڭىز، ول جەردەن شىعاردا «مىنا توسەكتى، پەردەنى الىپ كەتەمىن» دەي الاسىز با؟! سىزگە «اقىلىڭنان الجاسقانبىسىڭ، بۇل سەنىڭ مۇلكىڭ ەمەس، وسى جەردىكى» دەپ جاۋاپ بەرەدى. ادامنىڭ ءومىرى جايالىقپەن كەبىننىڭ ورتاسىندا وتەدى. ەكەۋى دە ماتا، ەكەۋى دە قالتاسىز بولادى. بوس كەلىپ، بوس كەتەسىڭ. ولاي بولسا، الىپ كەتە الاتىن نارسەڭ ومىردە جاساعان امالدارىڭ بولماق...

قولدان، اياقتان ارىلعانىڭدا، ياعني اجال قۇشىپ تابىتقا قويىلعانىڭدا ناماز، ورازا، ءىلىم ۇيرەنۋ توقتايدى. كەبىنمەن بىرگە امال داپتەرىڭ دە جابىلادى. ءبىراق ساداقا-ي جاريا دەپ اتالاتىن سەنىڭ سەبەبىڭمەن جۇزەگە اسقان يگى ىستەرىڭ بولسا، نەتكەن باقىت! بىرەۋگە ءىلىم ۇيرەتكەنىڭ، جاقسى ۇل-قىز ءوسىرىپ، جاقسى شاكىرت جەتىلدىرىپ، ارتىڭنان قالدىرعان جاقسى قىزمەتىڭ، جاقسى امالىڭ بار بولسا، ولگەننەن كەيىن دە ساۋاپ جازىلۋى توقتامايدى. مەن قارتايعاندا، قول-اياقتان ارىلعاندا، ءبىر شەتكە جيناپ قويعان دۇنيەم بولسىن، جالعا بەرەتىن ۇيلەرىم بولسىن دەپ ءفاني دۇنيەنىڭ قامىن ويلايتىن مۇسىلمان قالايشا ولگەننەن كەيىنگى ءومىردىڭ قامىن ويلامايدى، وسىنى تۇسىنبەيمىن...

ساتتىلىككە جەتۋدىڭ ەڭ ۇلكەن سەبەپتەرىنىڭ ءبىرى رۋحاني سەنىمدىلىك، كۇش-قۋات. ءبىر قوعامدا ءوزارا قۇرمەت، ماحاببات پايدا بولسا، قىزمەتتەر الدىڭعى قاتارعا شىعادى، وسەك اڭگىمەلەر ازايادى نەمەسە مۇلدەم جويىلادى. ونىڭ ورنىنا دۇعا كەلەدى. ارينە قىزمەتتەر كوبەيۋىمەن اللاھتىڭ مەيىرىمى، راحمەتى كوبەيەدى، راحمەت كوبەيۋىمەن مەيىرىمدىلىك ارتادى، مەيىرىمدىلىك ارتۋىمەن بەرەكە ارتادى. بەرەكە كوبەيۋىمەن ادامداردىڭ تىنىشتىعى، باقىتى ارتادى. اللاھ ءۇشىن بولماعان ىستە قايىر جانە ماحاببات بولمايدى، بار دەپ ويلانعان نارسەلەردىڭ ءبارى الدامشى.

---