InfoHub Logo

جىل سايىن ەلىمىزدە قازاننىڭ العاشقى جەكسەنبىسى ۇستازدار كۇنى مەرەكەسى رەتىندە اتالىپ وتەدى.

ۇستاز – قاسيەتتى ۇعىم. ۇلى اباي «ادامنىڭ ادامگەرشىلىگى جاقسى ۇستازدان» دەگەن بولاتىن.

ال ىبىراي التىنسارين «مەن ءۇشىن جاقسى ءمۇعالىم بارىنەن دە ارتىق، ويتكەنى ءمۇعالىم – مەكتەپتىڭ جۇرەگى» دەيدى.

ەسكە سالساق، ۇستازدار كۇنى مەرەكەسى 1965 جىلى 29 قىركۇيەكتە كسرو جوعارعى كەڭەسى پرەزيديۋمىنىڭ بۇيرىعىمەن بەكىتىلگەن.

ق ر ۇلتتىق ستاتيستيكا بيۋروسىنىڭ دەرەگىنە سايكەس، 2021-2022 وقۋ جىلىندا ەلىمىزدە 555 014 پەداگوگ ەڭبەك ەتكەن.

بىلتىرعى وقۋ جىلىنىڭ باسىندا مەكتەپكە دەيىنگى ۇيىمدارداعى پەداگوگ سانى 96 723 ادامدى قۇرادى، ونىڭ ىشىندە:

30 جاسقا دەيىنگى پەداگوگتەر – 22،7% (21 931 ادام)

30-دان 39 جاسقا دەيىنگى پەداگوگتەر – 32،4% (31 363 ادام)

40-تان 49 جاسقا دەيىنگى پەداگوگتەر - 26،1% (25 259 ادام)

50-دەن 59 جاسقا دەيىن – 16،2% (15 662 ادام)

50 جاستان جوعارى – 2،6% (2 508 ادام)

زەينەتكەرلىك جاستا – 2،5% (2 445 ادام).

ال جالپى ءبىلىم بەرەتىن مەكتەپ ۇستازدارىنىڭ سانى وتكەن وقۋ جىلىندا 385 830 ادامدى قۇرادى، ونىڭ ىشىندە 80% استامى - ايەل (311 623 ادام).

سونداي-اق، ۇلتتىق بيۋرونىڭ مالىمەتى بويىنشا ەلىمىزدە 36 378 پەداگوگ جوعارى وقۋ ورنىندا ەڭبەك ەتىپ جاتىر.

ەندى ۇستازدار قاۋىمىنا قاتىستى قازاقستاندا ىسكە اسىپ جاتقان رەفورمالار مەن جاڭاشىلدىقتارعا توقتالىپ وتسەك. بيىل مەملەكەت باسشىسىنىڭ تاپسىرماسى بويىنشا مۇعالىمدەردىڭ ەڭبەكاقىسى 25 پايىزعا ارتتى. بۇل ماقساتتا الداعى ءۇش جىلدا 1،2 ترلن تەڭگە بولىنەتىنى ايتىلدى.

بۇدان بولەك، پرەزيدەنت بيىل قازاقستان حالقىنا جولداۋىندا پەداگوگيكالىق جوعارى وقۋ ورىندارىن اككرەديتتەۋدىڭ جاڭا ستاندارتى قابىلداناتىنىن ايتتى.

«جاڭا قازاقستاندى قۇرۋ ىسىندە مۇعالىمدەردىڭ ءرولى ايرىقشا ەكەنى ءسوزسىز. مەملەكەتىمىزدە سوڭعى جىلدارى ۇستاز ماماندىعىنىڭ ابىروي-بەدەلىن ارتتىرۋ ءۇشىن كوپ جۇمىس جاسالدى. دەگەنمەن بۇل باعىتتا ءالى دە ءبىرشاما وزگەرىستەر قاجەت. پەداگوگيكالىق جوعارى وقۋ ورىندارىن اككرەديتاسيالاۋدىڭ جاڭا ستاندارتى قابىلدانادى. سونداي-اق ۇستازداردىڭ قۇزىرەت اياسى ايقىندالادى. جاھاندىق عىلىمي-تەحنيكالىق دامۋ بارىسىن ەسكەرسەك، جوعارى سىنىپتاردا جاراتىلىستانۋ-ماتەماتيكا پاندەرىن جانە اعىلشىن ءتىلىن وقىتۋدى بارىنشا كۇشەيتۋ ماڭىزدى»، - دەگەن ەدى قاسىم-جومارت توقايەۆ.

تاياۋدا بەلگىلى بولعانداي، ەلىمىزدە «پەداگوگ» كاسىبي ستاندارتى قابىلدانادى. ول بويىنشا جۇمىس اياقتالۋعا جاقىن. بۇل تۋرالى ق ر وقۋ-اعارتۋ ءمينيسترى اسحات ايماعامبەتوۆ ءمالىم ەتكەن ەدى.

سونىمەن قاتار داستۇرگە اينالعان رەسپۋبليكالىق «ۇزدىك پەداگوگ-2022» بايقاۋىنا ءوتىنىم سانى بيىل رەكوردتى كورسەتكىشكە جەتتى. ەلىمىزدىڭ ءار وڭىرىنەن 5 مىڭنان استام ءمۇعالىم مەن تاربيەشى قاتىسۋعا نيەت بىلدىرگەن.

ايتا كەتسەك، بيىل مەرەكە قارساڭىندا ق ر وقۋ-اعارتۋ مينيسترلىگى ۇستاز ەڭبەگى تۋرالى دەرەكتى فيلم ازىرلەدى. فيلمدە مۇعالىمدەردىڭ كۇندەلىكتى ءومىرى، ولاردىڭ ەڭبەگىنىڭ ماڭىزى، جەتىستىكتەرى، قىزىعۋشىلىقتارى، تاجىريبەسى مەن ءبىلىمى كورسەتىلەدى.

---