InfoHub Logo

تۇركىستان وبلىسى تۇلكىباس اۋدانىنىڭ تۇرعىنى الماس قارابايەۆ اسىق اتۋدان الەم چەمپيوناتىنا قاتىسىپ كەلدى.

رۋمىنيا جەرىندە وتكەن بايراقتى باسەكەدە ەل نامىسىن قورعاعان مەكتەپ ءمۇعالىمى ەشقانداي قارسىلاس شاق كەلتىرمەدى.

«بەس اسىقتان قازاقستان قۇراماسى جالپىكوماندالىق ەسەپتە ءبىرىنشى ورىندى يەلەندىك. ۇلكەن شەڭبەر ىشىندەگى اسىقتى الىستان اتىپ، شەڭبەردەن شىعارۋ كەرەك بولدى. ءبىزدىڭ كومانداعا بۇل ويىن ەش قيىندىق تۋدىرمادى» - دەيدى ول.

الماس ت.رىسقۇلوۆ اۋىلىندا ورنالاسقان ا.س.پۋشكين اتىنداعى اقپاراتتىق تەحنولوگيالار مەكتەپ ليسەيىندە دەنە شىنىقتىرۋ پانىنەن ساباق بەرەدى.

بوس ۋاقىتىندا بالالاردى اسىق اتۋ ويىنىنا باۋلىپ، قىر-سىرىن ۇيرەتەدى.

جارىستارعا الىپ بارىپ، شىڭدايدى. شاكىرتتەرى دە سەنىمدى اقتاپ الەمدىك دودالاردا توپ جارىپ، جەڭىمپاز اتانىپ ءجۇر.

«بالا كەزىمىزدەن اسىق ويناپ وستىك. كەيىننەن مەكتەپ بىتىرگەن سوڭ شىمكەنت الەۋمەتتىك پەداگوگيكالىق ۋنيۆەرسيتەتىن ءبىتىردىم. 2015 جىلدان باستاپ اسىق ويناۋدى قايتا قولعا الدىم. 2019 جىلى اۋىل مەكتەبىنە ءمۇعالىم بولىپ قىزمەتكە ورنالاسىپ، شاكىرت دايىنداۋدى باستادىم. ءقازىر 14 شاكىرتىم بار. ونىڭ 11 ۇل، 3 قىز بالا. ناتيجەلەرى كوڭىل قۋانتارلىقتاي» - دەيدى ول.

الماس - اسىق اتۋدان سپورت شەبەرى. ءوزى دە جارىستارعا قاتىسىپ، جۇلدەلى ورىنداردى يەلەنىپ كەلەدى.

اتاپ ايتار بولساق، قىزىلوردا، شىمكەنت، الماتى قالالارىندا وتكەن قازاقستان كۋبوگىنىڭ چەمپيونى، ورال، پەتروپاۆل، تاراز، كوكشەتاۋ قالالارىندا وتكەن ق ر چەمپيوناتىنىڭ كۇمىس جۇلدەگەرى، قىرعىزستان رەسپۋبليكاسىندا وتكەن دۇنيەجۇزىلىك كوشپەندىلەر ويىنىنىڭ قولا مەدال يەگەرى.

سونداي-اق، بيىل رۋمىنيا ەلىندە وتكەن الەم كۋبوگىنىڭ جەڭىمپازى اتاندى.

«بۇگىندە كوپتەگەن جاستار اسىق ويناۋعا قۇمارتپايدى. ىنتاسى جوق. ودان قايتا ۇيالى تەلەفون شۇقىلاپ، الەۋمەتتىك جەلىدە وتىرعاندى قۇپ كورەدى. ءبىز سوندا دا جاستاردىڭ قىزىعۋشىلىعىن وياتىپ، ۇلتتىق سپورتتىق ويىندى ناسيحاتتاپ كەلەمىز» - دەيدى ۇستاز.

---