InfoHub Logo

سىرىم باتىر بالا كۇنىندە ون ءتورت جاسىندا-اق جورىققا اتتاناتىن بولىپتى. سونان ون سەگىز جاسقا كەلەدى. ون سەگىز جاسىندا جولداستى كوبەيتىپ، مانعۇلدان تاڭداپ-تاڭداپ الپىس سەگىز اتتى ايداپ قايتادى. استىندا تۇلپاردان تۋعان تورى توبەل اتى بار. جولداستارىنىڭ سوڭىنان ءوزى جالعىز كەلەدى. جىلقىنىڭ تۇستەنىپ كەتكەن جەرىنە ءوزى كەشكە قونۋعا كەلەدى. ءبىر كۇنى جىلقىنىڭ تۇستەنىپ كەتكەن جەرىنە قونىپ شىعىپ، جالعىز ءوزى ءجۇرىپ كەلە جاتسا، ساسكە تۇستە جايىقتىڭ ارعى تۇسىندا تايسويعان بۇيرەكتىگىندە اڭ اۋلايتىن سالا بار ەكەن. سول سالانىڭ بارلىعىندا، ارعى بەتىندە نۇرالى حان قۇسبەگىلەرى، بيلەرى، اڭشىلارىمەن سەيىلدىكتە اڭ اۋلاپ ءجۇر ەكەن. بەلگىلى عوي اڭ اۋلاپ جۇرگەن ادامداردىڭ ءاربىر جەرلەردە بىتىراپ، جايىلىپ جۇرەتىندىگى. سىرىم وسىلاردى كورگەن سوڭ ءوزىنىڭ اقىلىمەن ويلاپ: «داۋدە بولسا، بۇل جۇرگەندەر نۇرالى حاننىڭ اڭشىلارى بولار»، — دەپ شامالاپ، «نۇرالىنى كورەيىنشى، رەتى كەلسە تىلدەسەيىنشى دەپ (بۇرىن تانىمايدى ەكەن) جولدان بۇرىلىڭقىراپ كەلىپ، نۇرالىنى وسى بولار-اۋ دەپ كەلسە، دۇرىسىندا سول شامالاپ كەلگەن ادامى نۇرالى بولىپ شىعادى. نۇرالىنى ويىمەن تانىپ، سالەم بەرەدى. سول كۇندە سىرىم باتىر ون سەگىز جاسىندا ەكەن. تاكاپپار حان قازاقتىڭ ءبىر بوزبالاسىنىڭ سالەمىن وڭدىلىقپەن الا قويسىن با؟

— سەن قاي تۇقىمسىڭ؟ — دەپتى نۇرالى سىرىمعا. سوندا سىرىم:

— قىدىرقوجانىڭ بالاسى — سۇلتانسيىق، ونان تۋعان — بايباقتى، بايباقتىدان تۋعان — شولىم، شولىمنىڭ بالاسى — دات، داتتىڭ بالاسىمىن، اتىم — سىرىم، — دەپتى. سوندا نۇرالى تۇرىپ:

— ە، قىدىردىڭ كوپ تەنتەگىنىڭ ءبىرى ەكەنسىڭ عوي، — دەپتى. سوندا سىرىم:

— ساقباردىڭ سۋىنىڭ بويىندا وعىم وزار ما ەكەن، بوعىم وزار ما ەكەن دەپ، وعى مەن بوعىن جارىستىرعان توعىم تورەنىڭ تۇقىمى ەدىڭ، — دەپتى.

---