InfoHub Logo

بەرىشتىڭ ۇرانى — «اعاتاي!». اعاتاي اتامىز جاسىندا قايداۋىل دەگەن باتىرىنىڭ قىزىنا ۇيلەنەدى. ونان بۇقاي دەگەن ءبىر بالا تۋادى. بۇقاي جيىرماعا جەتكەسىن-اق اعاتايعا ىلەسىپ جورىققا جۇرەدى. اعاتاي دا بۇقايىم ءوزىمنىڭ تۋىمدى ۇستار-اۋ دەپ ويلاپ جۇرەدى.

قايداۋىل جاسى جەتىپ قارتايىپ، ءولىم توسەگىندە وتىرىپ ارتىنا وسيەت ايتادى. «مەنىڭ ساۋىت-سايمانىمدى، قارۋ-جاراعىمدى ءوز بالالارىمنان يە بولاتىن بالام جوق. مەنىڭ ساۋىت-جاراعىما جيەنىم بۇقايجان يە بولا الادى. مەنىڭ كوزىم جۇمىلعاسىن بۇقايجانعا بەرىڭدەر»، — دەپ ايتىپ دۇنيەدەن وتەدى.

بۇقايعا حابار جىبەرىلەدى. كەلىپ ناعاشىسىنىڭ ساۋىتىن الىپ كەتسىن دەيدى. بۇقاي كادەسىن بەرىپ، قالىڭدىق ويناپ جۇرگەن كەز ەكەن، بارۋعا جينالادى.

اعاتاي: «شىراعىم، بۇقايجان، ءتىلىمدى الساڭ، بارعان جولى قاشىق، تۇرىكپەندە قايداۋىلدىڭ سايمانىنا كوز الارتىپ جۇرگەن ءور قاراقشى كوپ بولار، ءبىر بەلگىسىز ادامىنان كەرۋەنشىلەرگە قوسىپ بەرىپ جىبەرىپ الدىرتالىق»، — دەيدى. بۇقاي تۇرىپ قالادى، بارمايتىن بولادى.

اعاتاي ءبىر زامان ءوزى ساپار شىعىپ كەتەدى، سول مەزگىلدە بۇقاي اتام كەلگەنشە بارىپ قايتايىن دەپ كەتىپ قالادى. بارىپ ءبىراز جاتىپ ساۋىت-سايماندى الىپ قايتادى. جول بويى ءبىر جايلى جەرگە ءتۇسىپ قالادى، اتىن ۇزىن شىلبىرمەنەن اياعىنا بايلاپ، قورجىندى باسىنىڭ استىنا سالىپ ۇيىقتاپ قالادى. تۇندە ۇرىقاراقشى باسىن شاۋىپ ءولتىرىپ كەتەدى. دۇنيەسىن ولجالاپ، ءوزىن جالاڭاش تاستاپ كەتەدى. ارتىنان كەرۋەنشىلەر كەلىپ، بۇقايدىڭ ءجۇزىن جاسىرىپ «قارعا-قۇزعىن جەمەسىن» دەپ ۋاقىتشا امانات ەسەبىندە كومىپ كەتەدى. ءسويتىپ، اعاتاي باتىرعا حابار ەتەدى. اعاتاي بارىپ بۇقايدىڭ سۇيەگىن الىپ كەلىپ، جۋىپ ارۋلاپ كومەدى دە، ءسويتىپ باياعى اي كۇنىندە مۇڭ بولىپ وتىرعان كەلىنگە رۇقسات بەرىپ، مالىن قايىرىپ الادى. كەلىن ۇزاتىلىپ، بارعان جەرىندە ءۇش-تورت ايدان سوڭ ءبىر ۇل بالا تۋادى. اعاتايدىڭ بايبىشەسى: «بالا ءبىزدىڭ بۇقايجاننىڭ بالاسى، بالانى الىپ كەل، ءوزىمىز اسىرايمىز»، — دەيدى. اعاتاي بارىپ بالانى قۇتتىقتاپ، الىپ كەلىپ اسىرايدى. اتىن بەگالى قويادى، بەگالىدان تايمان تۋادى، تايماننان يساتاي تۋادى.

يساتاي ءوسىپ ءار جەردە جولدىققا تالاسىپ، جول بەرمەي جۇرگەندە، يساتايعا قازاقتىڭ اقساقال بيلەرى جولدىققا تالاسقاندا: «يساتاي-اي، ساعان جولدىق تيمەيدى، سەن نەكەسىز تۋعانسىڭ، بۇقاي ءولىپ، شەشەڭ باسقا كىسىگە نەكەلەنگەسىن، اتاڭا بەلگىلى باسقا كىسىنىڭ نەكەسىندە تۋدى»، — دەپ بەتىنە باسادى. شورا كەپ:

— ە، عىلمان اقىن يساتاي، ماحامبەتتىڭ تاريحىن باستاعاندا باس جاعىندا مىنداي كۇمىلجىگەن ءسوزدى ەستىرتىپ كەتەدى.

اعاتايدىڭ بۇقايىن تۇرىكپەننەن بۇ دا ولگەنگە دەيىن قالىڭدىق ويناپ جۇرگەندە، بەگالىداي باتىردىڭ نەكەدەن بۇرىن بولدى دەپ جابىلعان جۇرتتىڭ جالاسى، — دەيدى.

---