داپتەرلەردەگى وزگە جازبالار
الدىمەن ءبارى كوز الدىما كەلەدى. سونان سوڭ ەستيمىن، ەستيمىن دە جازۋعا وتىرامىن.
(3-داپتەر، 46-بەت).
SOS
I
سويۋىڭا قارسىمىن!
قارسىمىن!
قارسىمىن!
مەن ءداريادان قالعان تامشىمىن.
قاڭسىدىم...
وسى – بار شىنىم.
سويۋىڭا قارسىمىن!
الداعان ەكەن عوي قۋ بالام،
قاراعاي ەكەم عوي قۋراعان!..
تيدىرمەن دەنەمە پىشاقتى،
سويىلۋ ءۇشىن مەن تۋماعام!
الدادىڭ، قۋ بالام، الدادىڭ،
وسى ما اڭساعان ارمانىم؟!
سويدىرمان، جارقىنىم،
كورەمىن جازۋىن اللانىڭ.
اتا، سەن ولەسىڭ بە، شىنىمەن ولەسىڭ بە؟!
(3-داپتەر، 59-بەت).
1967-جىلدىڭ 27-قاراشاسىنىڭ ءتۇنى. ءتۇس. عاجاپ ءتۇس!!! "تۇزەلەسىڭ، سەن تۇزەلەسىڭ!" عاجاپ! ەكى توپتىڭ ورتاسى! ۆ.ي.ل.
(4-داپتەر، 1-بەت).
1967-جىلى نەلەر تىنۋى كەرەك
1. سامۇرىق (باۋىرجان مومىشۇلىنا ارنالعان). ءساۋىردىڭ ىشىندە.
2. SOS! (پوەما. بولعان وقيعا ىزىمەن). "سپاسيتە ناشيح دۋش" (قۇتقار ءبىزدىڭ رۋحتى). مامىردىڭ ىشىندە.
3. نازىم (پوەما. قاراقالپاق اسەرىنەن).
4. ولەڭدەر. جيناق دايارلاۋ.
5. دانتە "عاراسات مايدانى". باستاۋ، بارىنشا اياقتاۋعا تىرىسۋ
6. درامانىڭ سوڭعى ۆاريانتىن (نۇسقاسىن) تىندىرۋ.
7. پوەزيا تۋرالى ۇلكەن اڭگىمە.
ءبىر جىلعا سول دا جەتەر. جولىڭ بولسىن!
كەزەك كۇتتىرمەيتىندەرى:
1. وڭتۇستىك، قىزىلقۇم اسەرلەرى. جيناققا
2. قاراقالپاق اسەرلەرى.
(4-داپتەر، 2-بەت).
دالانىڭ قويۋ ءتۇنى-اي بالبىراعان!
جۇلدىزدىڭ كوزىن قارا جاۋدىراعان.
تاۋلاردىڭ ءوزىن قارا ابدىراعان،
قالعىعان قاباعى اناۋ سالبىراعان.
(4-داپتەر، 5-بەت).
كىم ەكەن ىرەنجىتكەن قىز بالانى؟
(4-داپتەر، 14-بەت).
الاتاۋىم تۇرعاندا،
ارقاسىزبىن دەي المان.
قاراتاۋىم تۇرعاندا،
قالتاسىزبىن دەي المان.
(4-داپتەر، 19-بەت).
تاعى دا كۇن شىعادى، تاڭ اتادى،
جاتادى ءتۇن جامىلىپ دالا تاعى.
جالعىز عانا جىر تۋسام، جالعىز عانا،
سەكىلدى سامۇرىقتىڭ بالاپانى.
(4-داپتەر، 26-بەت).
لاتۆيا، ليتۆا، ەستونيا، رسفسر، ۋكراينا، بەلارۋسيا، ارمەنيا، ازەربايجان، گرۋزيا، تاجىكستان، تۋركمەنيا، وزبەكستان، قازاقستان، قىرعىزستانداردان، پوەزيا، سەنى ىزدەدىم...
(4-داپتەر، 73-بەت).
"بورياس س پروداجنىمي فرانسۋزامي، يا زاششيششايۋ فرانسيۋ" (ساتقىن فرانسۋزدارمەن كۇرەسۋ ارقىلى مەن فرانسيانى قورعايمىن).
ر. روللان.
(4-داپتەر، 80-بەت).
"ماحاببات مازارى". پوەما.
(4-داپتەر، 84-بەت).
كۇنىنە ءۇش ولەڭ، قالايدا ءۇش ولەڭ! 7.11.1972-ج.
(7-داپتەر، 13-بەت).
1972-ج. 8-اقپان كەشكى ساعات 17.30 ميىمدا دانەڭە جوق وتىرمىن.
"تياجەلا تى، شاپكا مونوماحا". (اۋىرسىڭ-اۋ سەن، مونوماحتىڭ بوركى).
(7-داپتەر، 20-بەت).
جەتەدى، جوسپار بۇگىن ورىندالدى! يا، ءسات! 9-اقپان تۇنگى ساعات 2.30
جاقسى ءتۇس كور!!!
(7-داپتەر، 25-بەت).
(جوعارىداعى ساعات 17.30 مەن 2.30-نىڭ ارالىعىندا، ياعني 9 ساعاتتا "كەشىرگىن، قالا"، "ءۇش باقىتىم" 57 جولدان تۇراتىن ەكى ولەڭ جازىپتى. بۇل "ميىندا دانەڭە جوقتاعىسى"! – قۇراستىرۋشى O.A.)
بۇگىن تۋعان كۇنىم، 41-گە كەلدىم. دەنساۋلىق جاقسارىپ كەلەدى. جازۋعا سۇمدىق زاۋقىم بار... ايەلىم، بالالارىم سىي-قۇرمەت كورسەتتى. ۇيگە اباي كەلدى: ءبيۋسى. جاقسىلىقتىڭ نىشانى. پوەحالي!
9-اقپان 1972-جىل (7-داپتەر، 27-بەت).
بۇگىن جوسپار ورىندالاتىن ءتۇرى جوق. قۇلقىم شاپپايدى. ەكى يىعىمنان بىردەڭە باسىپ تۇر. ءبىر ءتۇرلى السىزدىك بار، ونىڭ ۇستىنە ءىشى قۇرعىر اۋىرىپ، وتىرعىزباي بارادى. ءتۇن جارىمى بولماسا تاڭ اتاردا ما، قالايدا جوسپاردى ورىنداۋىم كەرەك.
10-اقپان 1972-جىل (7-داپتەر، 33-بەت).
اكادەميادا كەزدەسۋ بولدى. بارماۋعا دا بولۋشى ەدى، امال نە، "قازاق ادەبيەتى" حابارلاما بەرىپ، تىزىمگە ەندىرىپ قويىپتى. ءانۋار بايانداما جاسادى. قازاقشا. ءتاپ-تاۋىر، انا تىلىندە سويلەپ شىقتى. مۇزافار، عافۋ بولىپ ولەڭ وقىدىق ءبارى دە دۇرىس قاي، ءبىراق بۇگىنگى جوسپارىم تاعى دا ورىندالمايتىن ءقاۋىپ بار. ميىمدا تۇك جوق.
11-اقپان 1972-جىل (7-داپتەر، 33-بەت).
ەندى ۇيىقتاۋىڭا بولادى. جوسپار ورىندالدى. ءيا، جوسپار! جوسپارسىز جۇمىس ىستەپ كور...
15-اقپان 1972-جىل (7-داپتەر، 59-بەت).
اقپاننىڭ 5-ىنەن 15-ىنە دەيىنگى 10 كۇندە 27 ولەڭ.
(7-داپتەر، 66-بەت).
ءارى قاراي نە بولادى؟ كەيىن؟ ودان سوڭ؟ بىلمەيمىن...
27-اقپان 1972-جىل (8-داپتەر، 37-بەت).
اقپان اياقتالدى. بۇل اي جاقسى بولدى مەن ءۇشىن. بايانداماعا كىرىسسەم بە ەكەن، ولەڭدى قويا تۇرىپ. الدە جيىندى ساۋىرگە سوزۋعا ارەكەت جاساسام با؟
29-اقپان 1972-جىل (8-داپتەر، 44-بەت).
بايقا! جالعان ايتپا! ەسىندە بولسىن، اقىلگويسىمە! ەستە ۇستا: سەن ەشكىم ەمەسسىڭ! سەن – اقىنسىڭ. ابستراكسيانىڭ اناسى – وبراز. پوەزياعا كەرەگى وبراز با، وي ما؟ وي!!!
وبراز – ويدىڭ تۇرلاۋسىز مۇشەسى. ولەڭنىڭ دە.
(9-داپتەر، 46-بەت).
قايعى بار قايتقان قۇستىڭ قاناتىندا.
جوعالعان داپتەردەن ەستە قالعاندار:
1. جىگىتتەر، بوركى اۋىر مونوماحتىڭ.
2. –"–، مەنىڭ اتىم قاڭتارۋلى.
3. ارماندا، جانىم...
4. قازاق سەنى سىيلايدى قاشاندا دا.
5. وسى مەن جىلاڭقى بوپ باراتىرمىن.
6. جانىم-اۋ، جالعىز ءقايتىپ شىداپ ءجۇرسىڭ؟
7. موتوردىڭ ءۇنىن ەسىتە-ەسىتە شارشادىم.
8. باققا باردىم؟؟؟
9. دوستىق دومبىرا تۋرالى بىردەڭەلەر، ت.ب.
ەكىنشى داپتەردەگىلەردىڭ ءبىرسىپىراسى "ماۆردا".
جوقتارى:
1. شىركىن-اي، جۇرتىم ماعان ءبىر ات بەرسە.
2. مەنىڭ كىشكەنتاي كۇنىم. "ءقا." شولپانىما.
3. جۇرەك تۋرالى سيكل.
4. سۇپ-سۇرعىلت قالا.
5. قۇلپىتاستاعى جازۋ.
6. ماحاببات، دوستىق ادامگەرشىلىك تۋرالى كوپ ولەڭ. كوبى ەسىمدە جوق
جاريالانباعان 1000 جولداي ولەڭ.
جوق ءالى قايتارمادى، جوق. ادەيى ىستەلگەن بولۋ كەرەك.
"پوەزيا" اتتى كۇندەلىگىم، قايران كۇندەلىگىم!!!
نە ايتىپ ەدىم وندا؟! جوق
1970. (5-داپتەر، 1-بەت).
1973-جىل. بەتبۇرىس؟؟؟ نە ىستەۋ كەرەك؟ ىشپەۋ كەرەك! ىشپەۋ كەرەك!
(10-داپتەر، 26-بەت).
قالاممەن جازىلعانىن دا، ماشينكاعا باسىلعانىن دا ءۇش نۇسقا پەسانى جوعالتتىم. بالەگە تاپ بولدىم...
16-اقپان 1973-جىل.
تابىلا ما؟ قايدام؟
21-اقپان 1973-جىل.
ءوزىڭدى ءوزىڭ الداما ەشقاشاندا.
"اڭساپ ءجۇرىپ كەزدەستىك ساكەن تويىنا" اتتى ولەڭ س.ق-نىڭ تاپسىرماسى بويىنشا جازىلدى.
29-ماي 1974-جىل (12-داپتەر، 90-بەت).
مەن ولەڭدى ويدان قۇراستىرىپ جازبايمىن. الدەكىم قۇلاعىما سىبىرلاعانداي بولادى. سونى كوشىرەمىن، سەنەسىڭ بە؟
م. م. 21-نويابر 1973-جىل (13-داپتەر، 12-بەت).
ا.پ. مەجيروۆتان حات الدىم. بۇل – ءبىرىنشى بولىپ ماعان ءومىرىمنىڭ قيىن كۇندەرىندە اكەلىك قولىن سوزعان ادام. ءسىزدىڭ سەنىمىڭىزدى قالاي اقتاسام ەكەن، سۇيىكتى اقساقال؟!
م. م. 1-دەكابر 1973-جىل (13-داپتەر، 34-بەت).
جوعالعان قولجازبالار، گازەت-جورنال قيىندىلارى، پوەزيا جونىندەگى كۇندەلىك ءالى جوق. سۋ اياعى قۇردىمعا كەتتى. بىرەۋ قاساقانا ساقتاپ وتىرسا جاقسى. بىلمەس ءبىر تۇلەيدىڭ قولىنا ءتۇسىپ جىرتىپ تاستاماسا... اتتەگەن-اي، جاريالانباعاندارى كوپ ەدى...
5-اقپان 1972-جىل (7-داپتەر، 2-بەت).
1. اقىل بار، تالانت جوق – مانساپقۇمار، اتاققۇمار.
2. تالانت بار، اقىل جوق – ماسكۇنەم.
3. ەكەۋى دە بار – ءدانىشپان.
اباي جاققان ءبىر ساۋلە سەنبەۋ ءۇشىن.
You Might Also Like
-
1) ولەڭ جيناعىنىڭ ازدىعى، كوپتىگى جونىندە ايتادى. سول دا ءسوز بولىپ پا؟
-
زامان جىلان سەكىلدى جىل سايىن تۇلەيدى. بۇل جاڭا كەيىپكە ەنۋ. زامان دا جاڭاشىلدىقتى ءجيى ەنگىزىپ وتىرادى. ال سونى العاشقىلاردىڭ ءبىرى بولىپ قابىلداپ الاتىن كىمدەر؟ ارينە ەڭبەكتەگەن ءسابي، بالالىق شاقتى...
