(وزبەك جىگىتىنە)
ويعا جىر، كوڭىلگە كۇي، جانعا تىنىس،
اينالاڭ الما-ورىك، الدا قىمىز.
اسان اتام اڭساعان جەرۇيىعى،
جىگىتىم، جاقسى ءا، ءبىزدىڭ الماتىمىز؟
اسىرەسە ماعان ءبىر ۇنايتىنى -
الاتاۋدان دولى وزەن قۇلايتىنى،
قۇلىن-تايداي تەبىسكەن قۇربىلاردىڭ،
ازىلمەنەن ءبىر-بىرىن سىنايتىنى.
قوڭىر سالقىن اۋاسى الماتىنىڭ،
(مەن ءوزىم الماتىنىڭ سولداتىمىن).
سايراڭداۋعا كەلىپ تۇر،وزبەك دوسىم،
ساۋىق قۇرىپ سايالا، ال دا تىنىم.
قىمىز ءىش، قازىدان ال، تارتىنباعىن،
تاۋعا ءجۇر، وزەنگە ءتۇس، سالقىنداعىن،
ءوزىڭنىڭ وزبەك باباڭ سەكىلدەنگەن
ۇمىتپا قازاق دەگەن حالقىڭ بارىن.
ەسىڭە سالاتىنىم تاعى دا ءبىر،
سەرۋەندە، الماتىنىڭ باعىنا كىر.
كيىكتىڭ لاعىنداي قىزدارىمنىڭ
جانىنا جانىڭمەنەن جاعىنا ءبىل.
ويعا جىر، كوڭىلگە كۇي، جانعا تىنىس،
اينالاڭ الما-ورىك، الدا قىمىز.
تاشكەنت ءشارىن وزىنە باۋىر تۇتقان
جىگىتىم، جاقسى، ءا، ءبىزدىڭ الماتىمىز؟!

---