InfoHub Logo

ءبىزدىڭ وقىتۋشىلار بولمەسىندەگى بوساعاعا ورناتىلعان ۇلكەن اينانى ۇناتپاۋشى ەدىم. ءبىراق، بارلىق وقىتۋشىلاردىڭ ساباققا كىرەر الدىندا ۇنەمى وسى اينانىڭ الدىنا كەلىپ، جاعالارىن تۇزەپ، شاشتارىن تارايتىنىن بايقادىم.

ءبىر رەتكى جينالىستا ديرەكتوردىڭ ءسوزى مەنىڭ وسى ايناعا دەگەن كوزقاراسىمدى وزگەرتتى. ول بىلاي دەدى:
- ءبىز دەمالىس بولمەسىنە اينا ورناتىپ قويدىق، مۇنىمىز بىردەن ءار - ءبىر ۇستازدارىمىزدىڭ كيىمدى رەتتى دە تازا كيىپ، اشىق - جارقىن ءجۇرۋىن ءۇمىت ەتكەنىمىز، بۇل ۇستازدارعا قوياتىن نەگىزگى تالاپ؛ ەندى بىردەن ءبىز.....

مەڭگەرۋشى ۇزاق ءبىر تىنىستاپ كىدىرىپ الدى دا، ءسوزسىز اقىرىن قايتا جالعادى:
- ۇستازدارىمىزدىڭ بۇدان بىلاي كوڭىلسىزدىكتى وسى اراعا تاستاپ كەتۋىن، استە سىنىپقا الىپ كىرمەۋىن وتىنەمىن.
وسىدان كەيىن ول بىزگە مىناداي ءبىر ۋاقيعانى ايتىپ بەردى.
ءبىر جولى ول بولماشى ءبىر ىسكە بولا كۇيەۋىمەن ۇرىسىپ قالىپتى دا، سول بەتىنشە ساباق وتكەلى سىنىپقا كىرىپ كەتىپتى.

سول كۇنى ونىڭ كوڭىل - كۇيى ناشار ەدى، تاقتاعا جازۋ جازعاندا دا كوپ رەت قاتەلەستى، مۇنداي اعاتتىق ونىڭ باسىنان بۇرىن-سوڭدى وتپەگەن-دى - ونىڭ جاۋاپكەرشىلىگى مەن ءبىلىم بەرۋ پوزيسياسىن تامام جۇرت تەگىس بىلەتىن. ول تاقتاعا جازۋ جازىپ بولىپ ارتىنا بۇرىلعاندا، ءبىر قىز وقۋشىنىڭ باسىن تومەن سالىپ، قولىنداعى دوڭگەلەك ايناعا قاراپ وتىرعانىن بايقاپ قالدى، ادەتتەگى كۇن بولسا، ول ساباقتى توقتاتىپ قويىپ، قىز وقۋشىعا كوز يشاراتى ارقىلى ونىڭ قاتەلىگىن بىلدىرگەن بولاتىن ەدى، ءبىراق، بۇگىن ولاي بولمادى. ول الگى وقۋشىنىڭ قاسىنا جەتىپ باردى دا، ونى جازعىرا، ۇرسىپ تاستادى، ءدال وسى كەزدە، ول ابايسىزدا ۇستەل ۇستىندە جاتقان كىشكەنتاي دوڭگەلەك اينادان ءوز ءجۇزىن كورىپ قالدى، ول قانداي الپەتتەگى كەسكىن دەيسىز. ادەتتە سونداي جىلى ءجۇزدى، سابىرلى دا سالماقتى سۇلۋ ءجۇزدى ىزا كەرنەپ الىپتى. مۇنى كورىپ ول، بەينە، بىرەۋ توبەسىنەن ۇرعانداي تۇردى دا قالدى.

- ەڭ ابزالى كوڭىلسىزدىكتى دەمالىس بولمەسىنە تاستاپ كەتەلىك، ويتپەگەندە.......
سىنىپتا وقىتۋشىنىڭ مەيىرىمى مەن سۇيىسپەنشىلىككە تولى كۇلكى ۇيىرىلگەن ءجۇزى وقۋشىلارعا ءارقانداي تەلەگەي - تەڭىز بىلىمىنەن دە تەز اسەر ەتەدى.
كەيبىر اينا تەك سىرتقى تۇرقىمىزدى تۇزەۋگە كومەكتەسىپ قانا قالماستان، ىشكى كوڭىل كۇيىمىزدى دە ساقتالعان داقتى دا كورسەتە الادى - وقىتۋشىلاردىڭ دەمالىس بولمەسىندەگى اينا، انە، سونىڭ ءبىر مىسالى.