ەكونوميكانى دامىتۋ ءۇشىن جەدەل تەحنولوگيالىق جاڭعىرۋ جۇرگىزۋ قاجەت - جۇرىنوۆ
بۇل پىكىردى ق ر ۇلتتىق عىلىم اكادەمياسىنىڭ پرەزيدەنتى مۇرات جۇرىنوۆ ءبىلدىردى.
«ەلباسىنىڭ بۇل جولعى جولداۋى بيلىك تارماقتارى اراسىنداعى وكىلەتتىكتەردى بولۋگە قاتىستى ۇندەۋىمەن بايلانىستى ءوربىدى. وندا پرەزيدەنتىمىز 5 باعىتتا باسىمدىق جاريالاپ وتىر. ونىڭ ءبىرىنشىسى جەدەل تەحنولوگيالىق جاڭعىرۋعا قاتىستى. بۇل باياعىدان ايتىلىپ كەلە جاتقان جايت. ءبىراق، مۇنى ەندىگى ۋاقىتتا جاڭا دەڭگەيگە كوتەرىپ وتىر. 2020 جىلعا دەيىنگى يندۋستريالدى-يننوۆاسيالىق ستراتەگيامىزدى قۇردىق. ەندى ونى جاڭا بەلەسكە كوتەرىپ، جەدەل تەحنولوگيالىق جاڭعىرتۋىمىز كەرەك»، - دەدى ول.
اكادەميا پرەزيدەنتىنىڭ پايىمىنشا، ءوندىرىس وشاقتارىنا مەملەكەتتىڭ ەكونوميكاسىنا پايدا كەلتىرەتىندەي جاعدايلار جاساماي قوعام العا قاراي دامىمايدى. ويتكەنى، قوعامدى دامىتۋ ءۇشىن قارجى كەرەك.
«پرەزيدەنت قازاقستانعا ەكونوميكالىق پايدا اكەلىپ وتىرعان بىرنەشە باعىتتاردى اتادى. ول - تاۋ-كەن، مۇناي-گاز ءوندىرۋ جانە مۇناي حيمياسى سالالارى. بۇل ەكى سالا ءبىزدىڭ ەكونوميكامىزدىڭ ۇشتەن ەكىسىن بەرىپ وتىر. ودان كەيىن اۋىل شارۋاشىلىعى سالاسى بار. ءبىزدىڭ جەرىمىز باي، اۋىل شارۋاشىلىعىنا، مال شارۋاشىلىعىنا قولايلى. ەندى سونى يگەرۋ ءۇشىن ءبىلىم كەرەك، عىلىم كەرەك. بۇل سالادان دا قازاقستان ازيا ەلدەرىنىڭ اراسىندا ءبىلىمى مەن عىلىمى دامىعان مەملەكەت»، - دەدى جۇرىنوۆ.
سونىمەن قاتار ول شاعىن جانە ورتا بيزنەستى كۇشەيتۋ قاجەتتىگىن اتاپ ءوتتى.
«ءبىز دەموكراتيا كەرەك دەيمىز. دەموكراتيا بولۋى ءۇشىن حالىقتىڭ 60-70 پايىزى ورتا بۋىنعا ەنۋى كەرەك. ونىڭ ايلىعىنان باسقا دا تابىسى، وتباسىندا قورى بولۋى ءتيىس. شاعىن جانە ورتا بيزنەس 60-70 پايىز بولعان كەزدە، ولار وزدەرىنىڭ پارتياسىن، كاسىپوداعىن قۇرۋى مۇمكىن. مىنە، سوندا دەموكراتيا بولادى. كەدەي ەلدە ەشقاشان دەموكراتيا بولمايدى. ونى مىڭ جەردەن كونستيتۋسياعا جازىپ قويساڭ دا»، - دەدى ول.
جۇرىنوۆ جەمقورلىقتى جويماي بىردە-بىر زاڭ جۇمىس ىستەمەيتىندىگىن دە باسا ايتتى.
«جالپى، جولداۋدا جاقسى-جاقسى جاڭالىقتار ايتىلدى. ەندى ونى تياناقتى ورىنداي الساق، قوعام العا جىلجيدى»، - دەدى اكادەميك.
You Might Also Like
-
قازاقستاندا ءۇشتىلدى ءبىلىم بەرۋ باعدارلاماسى اياسىندا وقۋلىقتار دايىندالا باستادى.
-
اۆتوماتتاندىرىلعان كىتاپحانالىق جۇيەلەر مەن اقپاراتتىق تەحنولوگيالاردىڭ كوللەدجدەگى اقپاراتتىق ءبىلىم بەرۋ دەڭگەيىنە اسەر ەتەر ىقپالى. «اقپاراتتى مەڭگەرگەن ادام - الەمدى بيلەيدى» م.ا.روت...
