InfoHub Logo

ەلىمىزدەگى ەڭ شاعىن مەكتەپ سولتۇستىك قازاقستان وبلىسىنداعى بىرلىك اۋىلىندا اشىلدى. مۇندا نەبارى بەس وقۋشى بار دەپ حابارلايدى كتك.

بالا سانىنىڭ  ازدىعىنان ءۇش جىل بويى جابىق تۇرعان ءبىلىم ورداسى بيىلدان باستاپ قايتا جۇمىس ىستەپ جاتىر. بۇعان وسى وڭىرگە قىتايدان قونىس اۋدارعان قانداستارىمىز سەبەپ بولعان. اينالدىرعان بەس شاكىرت ءۇشىن ون ادام جۇمىس ىستەيتىن مەكەمەنى تىلشىلەر كورىپ قايتتى.

اۋدان اكىمىنىڭ قولىنان مەكتەپكە كەرەك-جاراعىن الىپ جاتقان انار وتباسىمەن بيىل كوكتەمدە قىتايدان كوشىپ كەلىپتى. وتكەن وقۋ جىلىنىڭ ءتورتىنشى توقسانىن اۋدان ورتالىعىندا ءتامامداعان. بيىلدان باستاپ اۋىلدا وقيتىن بولدى.

"مەن قىتايدا جاقسى وقىعانمىن. ەندى بۇل جاقتا جاقسى وقيمىن دەگەن ۇمىتتەمىن. مەكتەپ اشىلعانى دا جاقسى بولدى"، - دەيدى 3 سىنىپ وقۋشىسى انار ەكپىن.

بىرلىك ورتا مەكتەبى بالا سانىنىڭ ازدىعىنا بايلانىستى ءۇش جىل بۇرىن جابىلعان ەدى. ەندى تەرىسكەيگە جۇڭگو مەن تالدىقورعاننان كوشكەن ون وتباسىنداعى بەس بالا ونىڭ قايتا اشىلۋىنا سەپ بولىپ وتىر. قونىس اۋدارعانداردىڭ كەيبىرىنە ءبىلىم وشاعىنان جۇمىس تا تابىلىپتى.

"وسى مەكتەپكە مەنى جۇمىسقا ورنالاستىرعالى جاتىر. جانە دە زەينەتكە شىققانشا جاسىم ەلۋگە كەلدى، شامام جەتكەنشە وسى بىرلىك اۋىلىنداعى مەكتەپتە ءبىر كىسىلىك ەسە قوسىپ بەرسەم دەگەن ماقسات"، - دەيدى بىرلىك اۋىلىنىڭ تۇرعىنى الەن ورازالى.

بىرلىك مەكتەبىندەگى بەس بالاعا ساباق بەرەتىن ەكى ءمۇعالىمنىڭ ءبىرى وسى مەكتەپتىڭ تۇلەگى. ءبىر كەزدەرى وقۋشىعا تولى سىنىپتار بۇگىندە ەلەس بولىپ قالدى دەيدى ول.

"11 جىلدىق مەكتەپ بولاتىن ءبىز وقىپ كەتكەن كەزدە. بۇنىڭ الدىندا ءمۇعالىم مەن وقۋشىلار سانى كوپ ەدى. ءقازىر ەكەۋ. مەن جانە تاعى سول قازاق ءتىلى مەن ادەبيەتىنەن بەرەتىن ءمۇعالىم. ەكى ءمۇعالىم"، - دەيدى ۇستاز گۇلدانا احمەتوۆا.

ەڭ شاعىن مەكتەپ عيماراتىن جوندەۋگە ءۇش جارىم ميلليون تەڭگە جۇمسالعان ەكەن. ونىڭ سىرتىندا ءبىر جارىم ميلليوننىڭ قازاندىعى بار. ال ەكى ءمۇعالىم مەن بەس بالاعا وت جاعۋشى، ەدەن جۋۋشى، كۇزەتشى مەن مەيىربيكەنى قوسقاندا سەگىز ادام قىزمەت كورسەتپەك.

جەرگىلىكتى بيلىك كەلەر جىلى بالا سانى كوبەيەدى دەپ وتىر. ويتكەنى وڭتۇستىكتەن وسى اۋىلعا تاعى ون شاقتى وتباسى كوشىپ كەلەدى دەپ كۇتىلۋدە.

---