ەۇۋ حالىقارالىق QS World University Ranking 2016 رەيتينگىندە 26 ورىنعا جوعارىلادى
ل.ن.گۋميليەۆ اتىنداعى ەۋرازيا ۇلتتىق ۋنيۆەرسيتەتى الەمدىك ءبىلىم نارىعىندا باسەكەگە قابىلەتتى ەكەندىگىن تاعى دا دالەلدەپ، الەمدەگى ۇزدىك 900 ۋنيۆەرسيتەت اراسىندا 345-ورىنعا كوتەرىلدى. بۇل الەمنىڭ 4322 جوو اراسىنداعى باسەكەدە قول جەتكىزەتىن ورنى، ياعني بۇل قازاقستان مەن ورتا ازيانى بىلاي قويعاندا، تمد ەلدەرى جوو-لارى اراسىندا وزىق جەتىستىك بولىپ سانالادى.
بۇل تۋرالى اتالعان جوو-نىڭ باسپا ءسوز قىزمەتى حابارلايدى.
ايتا كەتۋ كەرەك، تمد ەلدەرىنىڭ بارلىق ۋنيۆەرسيتەتتەرى الەمنىڭ 900 ۇزدىك ۋنيۆەرسيتەتى رەيتينگىندە مۇنداي جەتىستىككە جەتە قويعان جوق. ال قازاقستاننان ەۇۋ-دەن باسقا 7 جوعارى وقۋ ورنى ەنىپ وتىر. ولار: ءال-فارابي اتىنداعى قازۇۋ، ق.ساتبايەۆ اتىنداعى قازۇتۋ، اباي اتىنداعى قازۇپۋ، م.اۋەزوۆ اتىنداعى وقمۋ، قبتۋ، ە.بوكەتوۆ اتىنداعى قارمۋ جانە ابىلايحان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتى.
رەيتينگ كوشباسىندا جىلداعىداي امەريكا مەن بريتان ۋنيۆەرسيتەتتەرى: ماسساچۋسەتس تەحنولوگيالىق ۋنيۆەرسيتەتى، ستەنفورد ۋنيۆەرسيتەتى، گارۆارد ۋنيۆەرسيتەتى، كەمبريدج ۋنيۆەرسيتەتى جانە كاليفورنيا تەحنولوگيالىق ينستيتۋتى.
ەۇۋ بۇل بايقاۋلارعا 2009 جىلدان بەرى تۇراقتى قاتىسىپ كەلەدى. سوڭعى ءبىر جىلدا 26 ورىنعا كوتەرىلگەن وقۋ ورنى قازاقستان جانە ورتالىق ازيا ۋنيۆەرسيتەتتەرى اراسىندا ايتۋلى جەتىستىككە قول جەتكىزدى. سونىمەن قاتار سوڭعى جىلدارى Quacquarelli Symonds (QS) حالىقارالىق كومپانياسى اشىلعانىنا 50 جىل تولماعان الەمنىڭ جوو اراسىندا «QS Top 50 Under 50» دەگەن جاڭا رەيتينگى ناتيجەسىندە ەۇۋ 32-ورىنعا تۇراقتادى. بۇل رەيتينگكە تمد-نىڭ ءبىر دە ءبىر ۋنيۆەرسيتەتى ىلىنبەگەنىن ەسكەرسەك، ناعىز ىلگەرىلەۋدىڭ ۇلگىسى جانە ءۇش جىل قاتارىنان 32،38 ورىنداردى ۇستاپ كەلەدى.
ەۋرازيا ۇلتتىق ۋنيۆەرسيتەتى ەۋروپالىق عىلىمي-ونەركاسىپتىك پالاتاسى «ەۋروپالىق ستاندارت: جوعارى وقۋ ورىندارىنىڭ رەيتينگى:» كورسەتكىشى بويىنشا دا الەمنىڭ 2 678 جوو قاتىسقان بايقاۋدا قازاقستانداعى 23 جوعارى وقۋ ورىندارى اراسىنان جەتەكشى بەستىككە ەندى. نەبارى قۇرىلعانىنا 20 جىل بولعان وقۋ ورنىنىڭ ابىرويىن اسقاقتاتقان بۇل كورسەتكىشتەر - ءبىلىم بەرۋ ءىسى ساپاسىنىڭ ارتىپ، الەمدىك ستاندارتتارعا ساي جاراقتاندىرىلۋىن تورتكۇل دۇنيەگە دالەلدەسە كەرەك. QS رەيتينگى نەگىزگى التى كورسەتكىش بويىنشا باعالايدى. ولاردىڭ ىشىندە وقۋ ورنىنىڭ اكادەميالىق بەدەلى، جۇمىس بەرۋشىلەر اراسىنداعى ابىرويى، شەتەل ستۋدەنتتەرى مەن حالىقارالىق دەڭگەيدەگى وقىتۋشىلار قۇرامى سەكىلدى سەكىلدى جايلار ەسكەرىلەدى.
سونداي-اق ل.ن.گۋميليەۆ اتىنداعى ەۋرازيا ۇلتتىق ۋنيۆەرسيتەتى ەكى جىل قاتارىنان ءبىلىم ساپاسىن قامتاماسىزداندىرۋ تاۋەلسىز قازاقستاندىق اگەنتتىگى (بسقا) قورىتىندىسى بويىنشا دا كوش باستاپ كەلەدى.
You Might Also Like
-
وعىزناما — تۇركى حالىقتارىنىڭ ەجەلگى شەجىرەسىن گەنەالوگيالىق اڭىزدار نەگىزىندە باياندايتىن ەپوستىق داستان. شىعارما العاش اۋىزشا تۋىنداپ، بەرتىن كەلە قاعازعا تۇسىرىلگەن.
