InfoHub Logo

ءال-فارابي اتىنداعى قازاق ۇلتتىق ۋنيۆەرسيتەتىندە "ازاتتىق" راديوسى، "سۇڭقار" كاسىپوداعى جانە Myprofession.kz سايتىنىڭ دەمەۋشىلىگىمەن   "ەڭ دارىندى بولاشاق جۋرناليست بايقاۋى" وتۋدە.

وليمپياداعا رەسپۋبليكامىزدىڭ تۇكپىر-تۇكپىرىنەن 9 جوعارعى وقۋ ورنىنىڭ — ءال-فارابي اتىنداعى قازۇۋ، ل.ن.گۋميليەۆ اتىنداعى ەۇۋ، سەمەي قالاسىنىڭ شاكارىم اتىنداعى مەملەكەتتىك ۋنيۆەرسيتەتى، ە.ا.بوكەتوۆ اتىنداعى قاراعاندى مەملەكەتتىك ۋنيۆەرسيتەتى، س.تورايعىروۆ اتىنداعى پاۆلودار مەملەكەتتىك ۋنيۆەرسيتەتى، قورقىت اتا اتىنداعى قىزىلوردا مەملەكەتتىك ۋنيۆەرسيتەتى، ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتى، ياسساۋي اتىنداعى حالىقارالىق قازاق-تۇرىك ۋنيۆەرسيتەتى جانە «تۇران» ۋنيۆەرسيتەتتەرىنىڭ كوماندالارى قاتىسۋدا. ءار توپ 3 ستۋدەنتتەن قۇرالعان.

بايقاۋ 2 تۋردان تۇرادى. العاشقى تۋردا بولاشاق جۋرناليستەر «جۋرناليستيكا» ماماندىعىنىڭ وقۋ جوسپارىنا سايكەس مىندەتتى بولىپ سانالاتىن "قازاق جۋرناليستيكاسىنىڭ تاريحى"، «جۋرناليستيكاعا كىرىسپە»، «شەتەل جۋرناليستيكاسى» جانە «تەلەجۋرناليستيكا» پاندەرىنەن جالپى سانى 100 تەست سۇراعىنا جاۋاپ بەردى. بەرىلگەن ۋاقىت — 2 ساعات. ەستەرىڭىزگە سالا كەتەيىك، 1-تۋر 24 ناۋرىزدا وتكەن بولاتىن.

2-تۋر "ەڭ ۇزدىك فوتو"، "ەڭ ۇزدىك بەينەسيۋجەت" جانە "ەڭ ۇزدىك ونلاين جازبا" نوميناسيالارى بويىنشا وتكىزىلۋدە.

ءادىلقازىلار قاتارىنان ءال-فارابي اتىنداعى قازۇۋ-دىڭ جۋرناليستيكا  فاكۋلتەتىنىڭ دەكانى مەدەۋبەك ساعاتبەك، «قازاق گازەتتەرى» ج ش س باس ديرەكتورى كەنجالين جۇمابەك، پرومو تۆ مامانى سلامبەك ماقسات، تەلەجۋرناليست ەرلان اكچالوۆ، «فوتوونەر» قوعامدىق بىرلەستىگىنىڭ ءتوراعاسى اسىلحان ءادىرايىم ۇلى سياقتى ءوز سالاسىنىڭ ۇزدىك ماماندارى تابىلدى.

«باپتاپ كەلگەن تۇلپارلاردىڭ ىشىنەن ەڭ كۇشتىسى، ەڭ مىقتىسى انىقتالاتىن بولادى. مۇندا بالالاردىڭ ىزدەنىستەرى، تاپقىرلىقتارى، شەبەرلىگى – بارلىعى قارالۋى ءتيىس. وسىعان قاراعاندا ەشكىم جۇلدەسىز قالمايتىن سياقتى»، - دەيدى س. مەدەۋبەك ۇلى.

بايقاۋ قورىتىندىسى بۇگىن، 14.00-دە شىعادى.

 

---