سوناۋ ەسلام ۇزدىك تۋعان بالا ەكەن،
بايتاق ەلگە اسقار تاۋداي پانا ەكەن.
سول پانادان، سول بالادان ايرىلىپ،
جالپاق جاۋار جۇرەگىندە جارا ەكەن.
كولى كەتىپ، شولگە اينالسا - جەر جەتىم،
ەرى كەتىپ، شەر بايلانسا - ەل جەتىم.
ءبىلدىم انىق جاستىڭ ۇزدىك تۋعانىن،
كورمەسەم دە، كورگەننەن سوڭ ەل شەتىن.
ءبىلدىم جاستىڭ اسىپ تۋعان باعاسىن،
جاس تا بولسا، بايتاق ەلگە اعاسىن.
قالىڭ جاۋار ۇستىندەگى قامقانىڭ
تاعدىر تارتىپ جىرتقان ەكەن جاعاسىن.
( جاۋار - قاراۋىل رۋىنىڭ ءبىر اتاسى)
ەسىن جيا ەل دەپ قۇلاش سەرمەپتى،
اعايىننىڭ ءبىرىن دە جات كورمەپتى.
ەر ازامات ءبىر ناقاقتان قىسىلسا،
قورعاۋ بوپتى، ءبىرىن قولدان بەرمەپتى.
تارتىپتى ىلعي تۋرا جولعا، ماقۇلعا،
اسقار تاۋداي پانا بوپتى جاقىنعا.
«حالىق ايتسا، قالت ايتپايدى» دەگەن عوي،
يە بوپتى بايتاق، تەرەڭ اقىلعا.
اجال - ءبىر جول، اتتاپ ەتپەك ايلا جوق،
وتكەن ادام قايتا كەلمەس، قايلا جوق.
سولاي، زەكە، ەلگە توقتاۋ ايتقان ءجون،
ويمەن ازىپ، جاسىعاننان پايدا جوق.
سولاي، زەكە، وي سابىرمەن باسىلار،
وزىڭىزدەي اعاسى بار، جاسى بار.
جاقسى تۋعان ەر ازامات جوق ەمەس،
ەل اسقار عوي، تالاي قىمبات تاسى بار.
سول سۇڭقاردى كىم ۇمىتار، كىم قيىپ،
كەتىپتى ەلىم ەل ويىنا ۋ قۇيىپ.
ءبىراق اقدا جەڭگەنى ءجون سول ويدى،
وي دەگەن ءبىر داريا عوي تۇڭعيىق.
وي دەگەن - ءبىر تەرەڭ داريا تۇڭعيىق،
وي قاجىتار ءبىر قايعى، ءبىر نۇر قۇيىپ.
وي دەگەن - سەل، وندا قۇلان قاعى جوق،
وي دەگەنىڭ - تاۋسىلمايتىن كەرميىق.
جۇرگەن جەرى ساۋىق-دۋمان بازارداي،
اجال شىركىن قاراتپايدى اجارعا-اي.
جولاۋشىمىن، ۋاقىتىم تار بولماسا،
جىگىت ەكەن ارناپ سوزدەر جازارداي.
جىگىت ەكەن كەمەلىنە كەلە الماي،
ارماندا وتكەن تولىق جەمىس بەرە الماي.
كەمەرىنە كەلىپ، تولسا سوناۋ جاس،
ەل قالار ما ەد ەر جەمىسىن تەرە الماي.
تاۋدا تاس كوپ، تاس ىشىندە تاس بولار،
ەلدە جاس كوپ، جاس ىشىندە جاس بولار.
ساقا قۇيماس قولايىنا جاقپاسا،
اسىل تۋعان جاس بايتاققا باس بولار.
مۇشە كەلسە، «ات بولارلىق قۇلىن» دەر،
جاقسى تۋسا، سوندا مىناۋ ۇلىم دەر.
سول ۇلىنان ەرتە ايرىلسا سانالى ەل،
ۇزىلگەندەي بولدى، دۇنيە، جولىم دەر.
سولاي، زەكە، قايىسسا دا قابىرعا،
بولسىن بايتاق ەندى ميعا - سابىرعا.
ءولىم جول عوي، ەل - جولاۋشى سول جولدا،
ەندى قاراي بەرمەگەيسىڭ قابىرعا.
عيبرات الىپ اقىننىڭ بۇل حاتىنان،
قايعىڭدى ازايت كوكىرەكتەن اتىلعان.
Tap جولداردا جولداس بولعان جولداسىم.
كىشىلىك ايتتىم زىليقانىڭ دا اتىنان.

---