ەسماعامبەت پەن سەيىت
ورىنبوردىڭ قاسىنداعى تاما سەيىت قوڭىربايەۆ مەنمەن، ورىس مىنەزدى كىسى ەكەن. سونىڭ مىنەزىن ەسىتكەن سوڭ، ەسماعامبەت ادەيى ىزدەپ بارىپتى.
ءتۇس كەزى ەكەن، ات-ارباسىن باسقا جەرگە قويىپ، ەسىك قاقپاستان سەيىتتىڭ ءوزى وتىرعان ۇيگە كىرىپ بارسا، سەيىت زال ۇيىندە، ەكى قولىن قالتاسىنا سالىپ ەرسىلى-قارسىلى ءجۇر ەكەن.
كەلگەن ەسماعامبەتتى كىسى ەكەن دەمەي، جۇرگەن كۇيى، تەڭسەلىپ جۇرە بەرەدى. ەكى قولىن قالتاسىنا سالىپ، ەسماعامبەت تە جۇرەدى. سەيىت ستول ۇستىندە جاتقان شىلىمىن الىپ تارتسا، ول دا الىپ تارتادى. سەيىت ديۆانعا وتىرسا، ول دا وتىرادى.
اقىرى شىداي الماي سەيىت:
— كىمسىڭ، نەتكەن ادامسىڭ؟ — دەيدى جەكىرىپ.
— ادام ەمەسپىن. ءازازىلمىن. سەنىڭ جەلكەڭە ءمىنىپ، ادامزاتتان بەزدىردىم. ادام اتانى بەيىشتەن بەزدىردىم. ەندى ەكەۋمىزدەن باسقا جان جوق، سەرۋەندەپ جۇرگەن جوقپىز با؟ — دەپ بۇل دا قاتتى سويلەيدى.
سەيىت اڭىرىپ ازىراق تۇرادى دا:
— اقساقال، قۇلدىق، كەشىڭىز! — دەپ قولىن الادى.
ءجونىن سۇراپ، ەسماعامبەت ەكەنىن بىلەدى. قوناق قىلادى.
ءتاۋباعا كەلگەندەي بولادى.
— تاقسىر، مەن وسى جاسقا كەلگەنشە مۇسىلماندىققا لايىق ءىس ەتىپ كورگەنىم جوق، ماعان دا بەيىش ءناسىپ بولار ما ەكەن؟ — دەيدى ءپىر تۇتىنىپ.
— نەگە بولماسىن، مۇسىلماننىڭ ەشقايسىسى دا دوزاقتا قالمايدى. ءوزىڭ زەكەت بەرۋشى مە ەدىڭ؟ — دەپ سۇرايدى سەيىتتەن.
— جوق.
— ناماز وقيسىڭ با؟
— جوق.
— ورازا ۇستايسىڭ با؟
— جوق.
— قايىر-ساداقا بەرەتىن بە ەدىڭ؟
— جوق، — دەيدى سەيىت.
— كەستىرىلگەن بە ەدىڭ؟ — دەيدى اقىن كەكەسىن تۇردە.
— ە، جاس بالاسىن قازاق پىشتىرمەي تۇرا ما؟ ول اتا-انانىڭ ءىسى عوي، — دەيدى سەيىت.
— ەندەشە، ساعان دوزاق تۇگىل، دانەمە دە جوق. عاراساتتا سەنىڭ مۇسىلماندىعىڭا شەك كەلتىرسە، سونىڭدى كورسەتپەيسىڭ بە؟ — دەپتى كەكەتىپ.
ءومىرى مۇسىلماندىق بىلمەگەن سەيىت ەسماعامبەتتىڭ سوزىنەن جىعىلىپ، قايىر-ساداقا بەرىپ، بارعان كىسىمەن سويلەسەتىن بولىپتى.
You Might Also Like
-
ەل ىشىندە قۇدىق تۋرالى اڭىزدار كوپ قوي، مەن ءوزىم كورگەن ءبىر قۇدىقتىڭ جايىن ايتايىن دەپ وتىرمىن:
-
قوشتاي جاسىراق كەزىندە ءبىر باي ۇلكەن توي جاسايدى. سول ماڭداعى اۋىل-ايماق ەرتەلەتىپ تويعا اعىلادى. قوشتاي عانا ءجاي شىعادى. ءوزى قىرى مەن سىرىنا قانىق ءبىر اۋىلعا تاياي بەرگەندە، ءبىر جولاۋشى جىگىتكە كەز...
