InfoHub Logo

ەرتەدە ءبىر قويان جۇرەك ادام بولىپتى. قانشاما قورقاق بولسا دا، ونىڭ وزىنشە قۋلىعى بار ەكەن، ءوزىنىڭ سۋجۇرەك ەكەنىن ايەلىنە سەزدىرمەۋ ءۇشىن كوپ ايلا-امال جاساپتى. ايەلى اقىلدى ادام بولسا كەرەك، ونىڭ سونشالىق قورقاق ەكەنىن سەزىپ ءجۇرىپتى.

ءبىر كۇنى تۇندە قورقاق ايەلىمەن دالاعا شىقسا، اي سۇتتەي جاپ-جارىق ەكەن. جەرگە تۇسكەن ينە تابىلاتىنداي جارىق ءتۇندى كورگەن قورقاق:

— بايبىشە، بۇگىن ناعىز ۇرلىق قىلاتىن ءتۇن ەكەن، — دەيدى.

— ياپىر-اي، مىناۋ ايتقانىڭ جاقسى بولدى-اۋ، كوپتەن جاس سورپا ىشسەم بە دەپ ءجۇرۋشى ەم، ال وندا تەز اتتان.

ءوز سوزىنەن ءوزى ۇستالعان قورقاق امال جوق اتقا ءمىنىپ، قارىنا قۇرىعىن ءىلىپ ءجۇرىپ كەتەدى.

ءبىراز ۋاقىت وتكەننەن كەيىن جان-جاعىنا الاقتاپ كەلە جاتقان قورقاق قالىڭ قوپانىڭ ىعىندا تەبىندە جاتقان كوپ جىلقىنى كورەدى دە، شەتىنە بارىپ قايتىپ، ءبىر توبىن ءبولىپ ايداپ كەتپەك بوپ كوپ ءجۇرىپ قالادى. ءبىر كەزدە ارت جاعىنان تۇسىرلەگەن ات ءدۇبىرىن ەستىپ، قورقاق قاشا جونەلەدى. قۋعىنشى كوپ ۇزاتپاي قۋىپ جەتىپ سويىلمەن ءبىر سالىپ وتكەندە، مۇرتتاي ۇشقان قورقاق جانساۋعا ايتۋعا شاماسى كەلمەي بۇعىپ جاتا
بەرەدى. قۋعىنشى اتىنان ءتۇسىپ، باسىن كوتەرمەي جاتقان قورقاقتى تىك كوتەرىپ اپ:

— ولتىرەم! — دەپ اقىرادى.

قورقاق:

— ايتقانىڭدى ەتەيىن، تاقسىر، تەك جانىمدى قالدىرا گور، — دەپ زار ەڭىرەيدى.

— جارايدى، ءبىر جولى كەشىرىم جاسادىم، ەندى قايتىپ بۇل جەردى باسۋشى بولما! — دەپ قۋعىنشى قورقاقتى بوساتىپ جىبەرىپتى. اجالدان ارەڭ قۇتىلعان قورقاق اتىن بايلاۋعا شاماسى كەلمەي، قامىستان جاسالعان سەنەنىڭ سىرتقى ەسىگىنەن كىرە، بىرەۋ بەلبەۋىنەن تارتىپ جىبەرمەي تۇرىپ الادى. زارەسى ۇشقان قورقاق: — باتىر، باتىر، كىرە سويلەسەيىك، — دەپ ىشكە قاراي ۇمتىلادى. وسى كەزدە البار جاقتان كەلە جاتقان ايەلى:
«بايعۇس-اۋ، بەلىڭە اعاش قىستىرىپ، كەپتەلىپ تۇرعانىڭ نە؟ جولىڭ بولدى ما؟» سەنىڭ-اق قالجىنىڭ تاۋسىلمايدى-اۋ»، — دەپ، قورقاقتىڭ بەلبەۋىنە قىستىرىلعان قۇرىقتى الىپ تاستايدى.

ەسىن ازەر جيناعان قورقاق ايەلىنىڭ بەتىنە قاراپ: — سەن قۋعىنشى ەمەسسىڭ بە، داۋىسىڭ سوعان ۇقساپ تۇرعانى، — دەپتى.

---