قاي قىز بار بۇل قازاقتا تەڭگە جەتكەن،
ءبارى دە جىلاي-جىلاي كەمگە كەتكەن.
بار ەدى جارقىن اتتى ءبىر باي كىسى
مىرزەكە دەگەن اتقا قولى جەتكەن.
ارينە، باي كىسىنى جۇرت ماقتاماق،
كىسىنى كەدەي سورلى كىم جاقتاماق؟
جەپ كەتەر، ءىشىپ كەتەر سۇمدار جيىلىپ،
شۋىلداپ بايدى ماقتاپ ىرجاقتاماق.
باي ەندى كوتەرمەس پە مۇرنىن كوككە،
ەتەر مە كوتەردىڭ دەپ ولارعا وكپە،
اۋرۋسىز قۇر ءتۇپۋ دەپ، قۇر جوتەلىپ،
بايلىقتى بايقاتپاس پا توڭىرەككە.
بار ەدى جارقىن بايدا 3-4 بالا،
ولارعا بايلىق تۇرسا، شىركۋ قايدا؟
كۇلايىم ۇلدان ۇلكەن جالعىز قىزى
ۇقسايدى كوركەمدىگى تۋعان ايعا.
ون بەسكە گۇلايىمنىڭ كەلگەن جاسى،
جىبەكتەي ۇلبىرەيدى ماڭداي شاشى.
اق تورعىن ەكى بەتى قۇلپىرعان نۇر
اللانىڭ ءبىر جاراتقان تاماشاسى.
العانداي ەكى كوزدىڭ جاۋىن بۇرىپ،
جىميىپ ەزۋ تارتىپ قويسا كۇلىپ.
ا، دۇنيە، وينار ما ەدىم جيىلعاندا،
باس قوسىپ بوزبالالار داۋرەن ءسۇرىپ.

---