جارامساق بۇلاق بارىپ قۇيدى قۇمعا،
قۇم وعان بۇلعاعان جوق قۇيرىعىن دا.
راس قوي «سۋ اياعى - قۇردىم» دەگەن،
قۇم ءقايتسىن جارامساقتىڭ سىيلىعىن دا.
تال جاناسار جاعىنىپ، تەرەككە كەپ،
تامىرى ءالسىز تال بايعۇس...
تەرەك بولەك.
جاعىنۋدان جاتادى جەر ەكپەلەپ،
جاعىنۋلار ءبىراق تا كەرەك... كەرەك...
تەرەك بايعۇس نەسىنە جاعىنادى؟!
جاعىناتىن نارسە ىزدەپ اڭىرادى.
سىبىرلايدى جاعىمپاز سامال كەلىپ:
- جاعىنا ءبىل، جاعىنساڭ،- تابىلادى.
...داۋىل-دولى ۇرىنار ەمەنگە كەپ:
- اسقاقتاماي يىلگىن تومەنگە! دەپ.
اراسىندا ارپالىس باستالادى،
سەبەبى، داۋىل بولەك،
ەمەن بولەك.
ەمەن تەك جەرگە عانا باس ۇرادى!
داۋىل ونى كۇندەيدى، اشىنادى.
He ەمەندى قۇلاتىپ باسىلادى.
He قۇيرىعىن قىسادى، قاشىپ ءالى...
ءبىر كەمپىردى ءبىر كەمپىر
اپا دەگەن كۇن كەشتىك.
ءبىر بالانى ءبىر بالا
اتا دەگەن كۇن كەشتىك.
قۋانىشتى ارمان عىپ،
قاپامەنەن بىرگە وستىك.
ەگىز-ەگىز ەلدەسىپ،
قول ۇستاسىپ بەلدەسىپ،
قايراتتانىپ، كەل دەسىپ،
تۋعان جەردە كەڭ بەسىك،
ءومىر سۇردىك سەلبەسىپ.
بۇعانامىز قاتپاستان،
بۋىنىمىز دات باسقان.
سوعىس دەگەن سويقان كەپ،
تاپىل تۇرىپ، تاپ باسقان،
بالا شاقتى اپ قاشقان.
بىلە جاتار بىلگەندەر،
(بىلمەگەندەر، بىلمەندەر...
ناردىڭ جۇگىن كوتەردىك،
بوتالار مەن ىنگەندەر.
قاتار ءجۇرىپ قايعى، ارمان،
جەڭىس كۇتتىك مايداننان،
ەر ەدىك ءبىز، ەر ەدىك
ەرتە تۋىپ، جاي قالعان.
تابيعات،
جانىمدى الساڭ،
الشى مەنىڭ.
ءبىر ءتۇيىر جەرگە تۇسكەن تامشىڭ ەدىم.
مۇقاعالي جوعالسا قايتەر دەيسىڭ
ارتىمدا قالسىن جەرىم،
قالسىن ەلىم.
مەن دە ءبىر ءجۇرىپ كەتكەن ساعىمدايمىن،
قالدىر دەپ،
ساعان، ءسىرا جالىنبايمىن،
ماڭگىلىك مەكەنىمە جەتۋ ءۇشىن،
كۇنىنە قانشاما رەت ادىمدايمىن.
كىم ءبىلسىن،
قانشاما ءالى شىرقارىمدى،
كىم ءبىلسىن،
قاي كۇنى سەن قىرقارىڭدى.
مۇقاعالي جوعالسا قايتەر دەيسىڭ،
جوعالتپاسام بولعانى ۇرپاعىمدى.

---