InfoHub Logo

ءبىر كۇنى اتاقتى ءبىر باي جامانقارا كۇيشىنى شاقىرىپ الادى.

— ءاي، كۇيشى، — دەيدى ول، — مەنىڭ كىشى توقالىمدى كۇيىڭمەن ۇيىتىپ، ىسىنەن جاڭىلدىرساڭ، استىڭا ات مىنگىزەمىن، جەتەگىڭە تۇيە بەرەمىن. ال بۇل شارتتى ورىنداي الماساڭ، سەن دومبىرا تارتۋدى قوياسىڭ.

— ماقۇل، — دەيدى كۇيشى. ول كەزدە كۇيشىنىڭ ناعىز بابىندا جۇرگەن شاعى ەكەن.

— ەندەشە، ول ءقازىر ۇيگە كەلىپ قامىر يلەيدى. سول كەزدە سەن كۇيىڭدى باستايسىڭ.

ءسويتىپ، كەلىنشەك قامىردى يلەۋگە كىرىسە بەرگەندە، كۇي دە كۇمبىرلەي جونەلەدى. ارقالانىپ كەتكەن كۇيشى قانشا كۇي تارتقانىن بىلمەيدى، كەلىنشەكتىڭ قولى تاباقتان شىعىپ كەتىپ، جەر يلەپ وتىرعانىن بايقايدى. ال بايعا قاراسا، قاباعى ءتۇيىلىپ، جەرگە قاراپ وتىر ەكەن. كۇيشى كۇيدى شورت ءۇزىپ تاستايدى دا:

— بايەكە، شارتتى ورىنداڭىز، — دەيدى. ۇيالعان باي شارتتى ورىنداۋ ءۇشىن دالاعا شىعىپ جۇرە بەرگەن ەكەن.

 

---