InfoHub Logo

ەگەمەندى ەلىمىزدىڭ جاھاندىق وركەنيەتكە ەنۋىمەن بىرگە ءبىلىم بەرۋگە  قويىلىپ وتىرعان تالاپتىڭ ءوزى شىعارماشىلىقپەن جۇمىس ىستەي بىلەتىن، باسەكەگە قابىلەتتى جەكە تۇلعا قالىپتاستىرۋ ەكەندىگى بارشامىزعا ءمالىم. باستى ماقسات تەك ءبىلىمدى تۇلعا دايىنداۋ عانا ەمەس، رۋحاني دۇنيەسى باي، ۇلتتىق قۇندىلىقتاردى باعالاۋعا جانە دامىتۋعا قابىلەتتى تۇلعانى تاربيەلەپ شىعارۋ بولىپ وتىر. ۇستازدار قاۋىمىنا  ەل ەرتەڭى بولاشاق ۇرپاقتىڭ «قۇزىرەتتىلىك» دەپ اتالاتىن بىلىمدىلىكتىڭ جاڭا دەڭگەيىنە شىعۋىنا جاعداي جاساۋ مىندەتى تۇر. بۇل ارينە، ساپالى ءبىلىم مەن ىسكەرلىكتى تالاپ ەتەتىنى جاسىرىن ەمەس. ال وقۋشىعا ساپالى ءبىلىم بەرۋ، ساباققا ىنتاسىن ارتتىرۋ، قۇزىرەتتىلىگىن قالىپتاستىرۋ ءمۇعالىمنىڭ قولىنداعى شارۋا. ۇرپاق بولاشاعى ءبىلىم شاڭىراقتارىنان باستاۋ الادى. ەل ەرتەڭى – ءوزىمىز وقىتىپ، تاربيەلەپ وتىرعان مەكتەپ وقۋشىلارى.  قازىرگى ءبىلىم بەرۋ ۇردىسىندە وقىتۋدىڭ سوڭعى تاسىلدەرىن يگەرگەن، شىعارماشىل، پەداگوگيكالىق شەبەرلىگى جەتىلگەن، ۇيلەستىرۋشى ءمۇعالىم اۋاداي قاجەت. زامان تالابىنا ساي جاڭارتىلعان ءبىلىم بەرۋ باعدارلاماسى دا ۇرپاق ءۇشىن تىڭ سەرپىن، تىڭ باعدارلاما بولىپ وتىر. 

«ءمۇعالىم ءوزىنىڭ ءبىلىمىن ۇزدىكسىز كوتەرىپ وتىرعاندا عانا ءمۇعالىم، وقۋدى، ىزدەنۋدى توقتاتىسىمەن ونىڭ مۇعالىمدىگى دە جويىلادى،»-دەپ ۇلى پەداگوگ ك.د.ۋشينسكيي ايتقانداي، ءمۇعالىم ۇنەمى ءبىلىمىن جەتىلدىرىپ، ءوزىن-وزى دامىتىپ وتىرسا، ءبىلىم سالاسىنا قوسقان ۇلەسى دە زور بولماق. وسى ورايدا ەلىمىزدىڭ تۇكپىر- تۇكپىرىندە جاڭارتىلعان ءبىلىم بەرۋ مازمۇنىن يگەرتۋگە ، ءمۇعالىم ءبىلىمىن جەتىلدىرۋگە بايلانىستى كۋرستار وتكىزىلىپ جاتىر.تالعار اۋدانىنا قاراستى تۇزدىباستاۋ اۋىلىنداعى № 31 مەكتەپتە ءوز ءبىلىمىن جاڭارتۋعا كەلگەن ۇستازدارعا قازاق ءتىلدى مەكتەپتەردەگى «قازاق ءتىلى» مەن «قازاق ادەبيەتى» پاندەرى بويىنشا پەداگوگ كادرلاردىڭ بىلىكتىلىگىن ارتتىرۋ كۋرسى ۇيىمداستىرىلعان بولاتىن. كۋرس ترەنەرى بيسەنبايەۆا مەرۋەرت كەنجەعۇل قىزى توپتاعى 27 ءمۇعالىمدى جاڭارتىلعان ءبىلىم بەرۋ باعدارلاماسىنىڭ قۇرىلىمى، ماقسات- مىندەتتەرى، پەداگوگيكالىق ادىس-تاسىلدەر، كريتەريالدى باعالاۋ جۇيەسىن ۇيرەتۋدە بار ءبىلىم، كۇش-جىگەرىن ايامادى. ساباقتىڭ ساپاسىن ارتتىرۋعا بولاتىن ءبىلىم بەرۋدەگى سپيرال قاعيداتى جەڭىلدەن كۇردەلىگە قاراي وسەتىنىن، تاپسىرمالاردى وزدىكتەرىنەن ورىندايتىنداي جوسپار قۇرا بىلۋگە ۇيرەتتى. ۇستازدارعا ۇستاز بولا ءجۇرىپ، ءار جاستاعى مۇعالىمدەردىڭ بىلىمگە دەگەن قۇشتارلىعىن وياتىپ، جىگەرىن تاسىتتى. پەداگوگيكالىق شەبەرلىگىن شىڭداۋعا قوماقتى ۇلەس قوستى دەسەم، ارتىق بولماس. ءبىلىمدى دە، بىلىكتى ترەنەر مەرۋەرت كەنجەعۇلقىزىنان ءبىلىم بەرۋ جۇيەسىنە ەنگەن جاڭالىقتىڭ قىر-سىرىن تەرەڭ مەڭگەرگەنىمىز انىق. ۇيرەنگەن ءادىس- تاسىلدەرىمىزدى ءار ساباعىمىزدا جان-جاقتى قولدانىپ، كەلەشەك ۇرپاقتىڭ ساناسىنا قۇيۋعا سۇبەلى ۇلەس قوسامىز دەگەن ويدامىن.

سەمبايەۆا التىنكۋل ساتىمباي قىزى

تالعار اۋدانى № 21 مەكتەپتىڭ قازاق ءتىلى مەن ادەبيەتى ءپانى ءمۇعالىمى

---