InfoHub Logo

ءسىڭىرى شىققان جارلى كەدەي، ديۋانا اتانعان اقىن ومار ۋاتايەۆتىڭ 1932 جىلى سەكسەن جاسىندا قازىرگى اياكوز اۋدانى، اقشاتاۋ سوۆحوزىنىڭ جەرىندەگى قىزىلجالدا دۇنيەدەن كوشىپ، قوڭقاقتىڭ زيراتىنا جەرلەنگەنى بەلگىلى. ومارعا قاتىستى بۇل اڭگىمەدەگى وقيعا ۇلى وكتيابردەن بۇرىن بولعان.

...ۇشبيىك جاقتاعى ءبىر بايدىڭ ۇيىندە ىشىندە قازىرەت جانە ءارىپ اقىن بار ءبىر توپ كىسىلىكتى ادامدار مەن يگى جاقسى اتانعاندار تۇستەنىپ وتىرادى. داستارحانعا قىمىز اكەلىنگەندە:

— ومار ديۋانا كەلە جاتىر، — دەگەن ءسوز ەستىلەدى.

— قىمىزدى ومار كەلگەن سوڭ ىشەيىك، — دەپتى قازىرەت.

ءبارى دە قازىرەتتىڭ سوزىنە توقتاپ، قىمىزعا ۇمتىلماي سابىر ەتىسەدى. ۇيدە وتىرعاندارعا سالەم بەرە كىرىپ، توردەن ورىن العان وماردان قازىرەت:

— قىمىزدى ىشۋگە بولا ما؟ — دەپ سۇرايدى.

— ىشۋگە بولمايدى قىمىزدى!

وسىلاي دەپ وماردىڭ داۋسى ساڭق ەتكەندە، ءبارى دە تىم-تىرس بولىپ، تاڭىرقاعان كەيىپتە ومارعا قاراسادى.

— قالاي؟ — دەسكەندەرگە:

— كەشە بيە ساۋاتىن شەلەككە قارالا كۇشىك اۋزىن تىعىپ العان، — دەپ سەنىمدى ءتۇردى جاۋاپ قايتارىپتى ومار. سۇراستىرا كەلگەندە وماردىڭ ايتقانى شىن بولىپ شىعادى. وسى وقيعانىڭ كۋاسى بولعان ءارىپ اقىن تاعى ءبىر كەزىككەندە ومار اقىنعا:

— ەل سەنى ديۋانا، بىلگىش دەيدى، بالالارىمدى سىناپ بەرشى، — دەپتى. سوندا ومار ارىپكە بالالارىن قاتار قويدىرىپ، بارىنە سىن كوزىمەن ءبىر قاراپ وتەدى دە، ارىپكە قاراپ:

— سويلەگەندە كەتەسىڭ وتتاي شالقىپ،
اق تۇيەشە كەلگەندى ءبىر-اق تارپىپ.
كەۋدەڭ التىن بولعانمەن، بوكسەڭ مىرىش،
ءبىر وزىڭە تارتقان جوق، ءبارى شارتىق، —

دەپ ونىڭ بالالارىنا ءبىر شۋماق ولەڭمەن باعا بەرىپتى.

ايتقانداي-اق ءارىپتىڭ بالالارىنا اقىندىق ونەر دارىماي، ءوزىنىڭ جولىن قۋعان بىردە-بىرى بولماعان ەكەن.

---