InfoHub Logo

قاجىمۇقان جولاۋشىلاپ، اۋىلعا قايتاردا، جولاي ۇيىنە ءبىر بالگەر جىگىتتى ەرتە كەلەدى. ونىمەن ءباتۋالاسىپ، بىلاي دەيدى: 

— ال، جىگىتىم، بار شەبەرلىگىڭدى سال. ەنەمنىڭ اتى — تاكەي. بەس قىزى بار. ۇلكەنى — مەنىڭ زايىبىم، ونىڭ اتى — ءمىناي. ەڭ كىشىسى ون بەس-ون التىعا كەلىپ، بويجەتىپ قالدى. وسى قىز جايلى ءبىر حاباردىڭ شەتىن شىعارىڭقىراپ ەبىن تاۋىپ، قۇمالاعىڭدى سويلەت. ءقازىر انامدى شاقىرايىن، — دەپ قاجەكەڭ سىرتقا شىعىپ، ەنەسىن ەرتىپ كەلەدى.

— قانە، قۇلىندارىم، امان-ەسەن ءجۇر مە ەكەن، بال اشىپ بەرە عوي... بال باسىڭ، مىنە، — دەپ تاكەي اجەي قالتاسىنان تيىن-تەبەن الىپ، بالگەردىڭ الدىنا قويادى.

بالگەر جىگىت وز-وزىنەن كۇبىرلەپ، اق ورامالدىڭ ۇستىنە شاشىلعان جۇگەرىلەرگە قاراپ وتىرىپ، الدەن سوڭ سويلەي بەرەدى.

— اجە، بەس پەرزەنتىڭىز بار ەكەن عوي. ءقازىر ءوزىڭىز ەڭ ۇلكەنىنىڭ ۇيىندەسىز عوي شاماسى. ۇشەۋى تۇرمىستا سياقتى عوي... ءبارى امان. ءبىراق مىنا ءبىر قۇمالاق جەكە تۇر عوي. ەڭ كىشىڭىز وسى بولسا كەرەك. بالدىڭ ايتۋىنا قاراعاندا، كەنجەڭىز تۇرمىسقا شىققان با؟ شاماسى ءبىر جەتىنىڭ ىشىندە شاقىرۋشى كەلىپ تۇر عوي بوساعاڭىزعا، — دەپ بالگەر جىگىت ءسوزىن اياقتاعاندا، تاكەي اجەي:

— مىناۋ نە دەپ كەتتى، ويباي-اۋ، تۇرمىسقا شىققانى نەسى؟ ءالى جاس قوي. وي، قۋ قۇدايىم-اۋ، شۇناق قۇداي، بۇل نە قىلعان ءىس بولدى؟ — دەپ جىلاي بەرەدى. سوندا توردە قيسايىپ جاتقان قاجەكەڭ سىلقىلداپ كۇلە جونەلىپتى. مۇنى سەزگەن ەنەسى كوزىن ءسۇرتىپ:

— ءاي، بالۋان-اي، سەنىڭ-اق ويىنىڭ تاۋسىلمايدى-اۋ. ۇيقى-تۇيقى بۇل قانداي بالە دەسەم... قوي، بالىڭ قۇرسىن، بالىڭ قۇرسىن، — دەپ سىرتقا شىعىپ كەتىپتى.

---