جاس وتاۋدا باقىت تاڭى اتقان كۇن
جاس وتاۋدا باقىت تاڭى اتقان كۇن
(جاس جۇبايلارعا تىلەك)
قۇرمەتتى جاس جۇبايلار!
سىزدەر ءدال قازىرگى ۋاقىتتا وتباسى اتتى جاڭا دا جاس مەملەكەتتىڭ تەڭ قۇقىقتى قوجايىنىنا اينالا الدىڭىزدار. وسىناۋ جولدا ءومىر سىزدەرگە قۋانىشى مەن قىزىعىن قاتار ۇسىنا وتىرىپ، قوس جۇرەكتە بىردەي لاۋلاعان سەزىمدەرىڭىزدىڭ بەرىكتىگىن دە سىناققا سالۋدى ۇمىتپايدى. سول سىناقتا سىزدەردىڭ ماحابباتتارىڭىز ءومىر تەڭىزىندەگى جۇبايلار مىنگەن باقىت كەمەسىنىڭ ۇدايى جەلبىرەر جەلكەنىنە اينالا بەرسىن!
ۇلاعاتتى ۇل، ۇياتى بار قىز وسىرە وتىرىپ، ولاردىڭ باقىتتى بولاشاعىنا قيال پاتشالىعىندا سان رەت، ءتىپتى ۇيقىسىز تۇندەردە وي جۇگىرتكەن قوس اتا-انانىڭ كوز الدىندا ءدال قازىرگى ساتتە ولاردىڭ ءوز پەرزەنتتەرىنىڭ جۇرەك قالاۋىمەن قالاپ تىككەن اق وتاۋى پايدا بولدى. باقىتتى جۇبايلار، بۇل - سىزدەردىڭ وتاۋلارىڭىز. سول وتاۋلارىڭىزدىڭ شاڭىراعى سىزدەردىڭ اسقاق ارماندارىڭىزدىڭ بەلگىسىندەي بولىپ بيىكتەي بەرسىن، سول وتاۋلارىڭىزدىڭ ىرگەسى سىزدەردىڭ سەلكەۋسىز سەنىمدەرىڭىزدىڭ كورىنىسىندەي بولىپ بەكىسىن، كوڭىل تورلەرىڭىزدىڭ كەڭدىگىندەي كەرەگەلەرىڭىز كەرىلسىن، ماقساتتارىڭىزدىڭ نىق كورىنىسىندەي بولىپ ۋىقتارىڭىز شانشىلسىن، سول وتاۋدىڭ ۇزىگى بىر-بىرلەرىڭىزگە دەگەن جان جىلۋىنداي جىلى دا بەرەكەلى بولسىن، تۇڭلىكتەرىڭىزدەن قۇيىلعان نۇر رياسىز كۇلكىلەرىڭىزدىڭ كورىنىسىندەي ساۋلەسىن توكسىن!
بۇگىنگى كۇن - سىزدەردىڭ كۇندەرىڭىز! جۇبايلىق ءومىردىڭ راۋانداپ اتقان ءاربىر تاڭى سىزدەردى باقىت بولاشاعىنىڭ تاڭعاجايىپ تورىنە جەتەلەيدى. سىزدەردىڭ ەندىگى ساتتە وزدەرىڭىزدى جاستىق ومىرلەرىڭىزدىڭ ناعىز باقىتتى حانشايىمى مەن حانزاداسى سەزىنۋلەرىڭىزگە تولىق قۇقىلارىڭىز بار. وزدەرىڭىز ارمان ەتكەن باقىت كۇندەرىڭىزدە سىزدەردىڭ اتا-انالارىڭىز بەن تۋعان-تۋىستارىڭىزدى سول تاماشا كۇندەرىڭىزدىڭ كۋاسى بولۋعا جازسىن!
سىزدەر - وتاننىڭ پەرزەنتىسىزدەر. سىزدەردىڭ وتاندارىڭىز وتباسى قۇندىلىعىنىڭ بەرىكتىگىمەن مىقتى. ول ءوز پەرزەنتتەرىن سۇيەدى جانە سىزدەردى دە سول باقىتتى وتاندارىڭىزعا جاستىققا ءتان كۇشپەن لايىقتى قىزمەت ەتۋگە جازسىن!
سىزدەر ءوز ۇلتتارىڭىزدىڭ ۇرپاعىسىزدار. بۇل سىزدەر ءۇشىن ۇدايى ۇرپاق پارىزى مەن مىندەتتەرىن ەسكە سالادى. سىزدەردى ءوز بولمىستارىڭىزدىڭ بوياماسىز قالپىن تۇعىرلى قالىپتارىڭىزدا ساقتاعان وتباسى مۇشەسى رەتىندە ەلەستەتەر، ءوز قوعامدارىڭىزعا ماقتانىش سەزىمىن تۋعىزارلىق جۇباي بولۋعا جازسىن!
سىزدەردىڭ وزدەرىڭىز دە بولاشاقتا جاس ۇرپاقتىڭ تاربيەشىسى اتاناسىزدار. بولاشاق ۇرپاقتىڭ تانىمى مەن ءتالىمى سىزدەردىڭ بۇگىنگى كۇندە جيناعان جان سارايلارىڭىزداعى كوكىرەك قۇندىلىقتارىڭىزدان باستاۋ الىپ جاتادى. دەمەك، تاربيە تامىرى ارىدە. سىزدەردى ءوز قوعامدارىڭىز شىن مانىندەگى رۋحاني قۇندىلىقتارمەن قارۋلانعان جاستار لەگىنىڭ وكىلى رەتىندە تانيدى جانە بولاشاقتىڭ ءتۇپقازىعىنا جان-جاقتى باعىت سىلتەرلىك ەندىگى ەرەسەكتەر ساپىن تولىقتىرارلىق جۇبايلار بولادى دەپ ءۇمىت ەتەدى. ءتاڭىرى تىلەكتەرىڭىزدى ادال مۇراتتارىڭىزعا جەتكىزسىن!
سىزدەردىڭ قورشاعان قوعامدارىڭىز ءدال قازىرگى ساتتە سىزدەرگە ۇلگىلى شاڭىراقتىڭ لايىقتى تۇرپاتتاعى وتاعاسى مەن وتاناسى بولا الادى دەپ سەنىم ارتتى. الداعى جۇبايلىق عۇمىرلارىڭىز سىزدەرگە كوپتىڭ سەنىمىنە جارىقشاق تۇسىرمەستەي جارقىن دا نىق، نۇرلى دا ماعىنالى تۇردە ءومىر ءسۇرۋدى ءناسىپ ەتسىن!
مىنە، سىزدەرگە دە باقىت كۇنىنىڭ تاڭى اتتى. سول كۇننىڭ باستاۋ ساعاتى ەستەرىڭىزدە ۇدايى ساقتالا وتىرىپ، العا جەتەلەپ وتىرۋشى ەكى جۇرەككە تەڭ، ورتاق قۇندىلىققا اينالسىن! سول باقىت تاڭىنىڭ نۇرى اپپاق وتاۋلارىڭىزدى ۇنەمى التىن ساۋلەگە مالىندىرىپ، سىزدەرگە ۇدايى قۇدىرەتتى قۋات بەرۋشى عاجايىپ كۇشكە اينالسىن!
ماحاببات - ادامعا زور جاۋاپكەرشىلىك پەن مىندەت جۇكتەۋشى قاسيەتتى ۇعىم. ول - ادەمىلىك پەن ادەپتىڭ ولشەمى، جان-دۇنيە اسەمدىگىنىڭ اينىماس سەرىگى. سىزدەر ەندىگى ساتتە ءوز ماحابباتتارىڭىزدىڭ عاجايىپ سەنىمىنەن قۋات الا وتىرىپ، ەكىنشى سىڭارىڭىز ءۇشىن ءومىر سۇرۋگە بەل بۋدىڭىزدار. سىزدەر وسىناۋ جولعا باتىل قادام باسۋشىسىزدار. سول جولدا وزدەرىڭىزدىڭ دوستارىڭىز بەن قۇربىلارىڭىز سىزدەردىڭ وسىناۋ جۇرەك سەزىمدەرىڭىزدىڭ تۇراقتى تۇردە جاڭعىرىپ وتىرۋشى قۋاتتى قورعانعا اينالار كۇش بولۋىن شىن جۇرەكتەن تىلەيدى.
قۇرمەتتى شاڭىراق كوتەرۋشى جاس جۇبايلار!
بۇگىنگى قۇرعان شاڭىراقتارىڭىز قۇتتى دا بەرەكەلى بولسىن! سىزدەردىڭ الداعى ومىرلەرىڭىز تەك باقىتتى كۇندەردىڭ تىزبەگىنەن قۇرالسىن! سول تىزبەك ەشقاشان دا ۇزىلمەسىن!
You Might Also Like
-
بيىل گرانتقا تۇسە الماعان تۇلەكتەر قارجى جاعىنان قينالسا، ءبىلىم بەرۋ كرەديتتەرىن پايدالانا الادى، دەپ حابارلايدى BNews.kz.
-
ءبىلىم بەرۋ گرانتتارىن بەرۋ جونىندەگى رەسپۋبليكالىق كونكۋرستىق كوميسسياسى جۇمىسىنىڭ الدىن الا قورىتىندىلارى بويىنشا «التىن بەلگى» مەدال يەگەرلەرىنىڭ ءبىرشاماسى مەملەكەتتىك گرانت ەسەبىنەن...
