InfoHub Logo

جىنىستىق ساۋات تاقىرىبىن نەعۇرلىم ەرتەرەك قوزعاساق - نەكەسىز جۇكتى بولىپ قالۋدىڭ، جىنىستىق جولمەن ءقاۋىپتى اۋرۋ جۇقتىرۋدىڭ الدىن الامىز. بۇل تۋرالى ەلوردادا وتكەن دوڭگەلەك ۇستەلدە Y-PEER ەرىكتىلەر جەلىسىنىڭ جاتتىقتىرۋشىسى كاميلا تۇياقبايەۆا ايتتى.

«قازاقستان رەسپۋبليكاسىنىڭ زاڭناماسى بويىنشا 14 جاستان باستاپ قىلمىستىق جاۋاپكەرشىلىككە تارتىلادى. 16 جاستان باستاپ جۇمىس ىستەۋگە جانە نەكە قيدىرۋعا بولادى. ال نەگە وسى جاستان باستاپ اتا-انانىڭ رۇقساتىنسىز دارىگەرگە قارالۋ مۇمكىندىگى جوق؟»، - دەيدى Y-PEER ەرىكتىلەر جەلىسىنىڭ جاتتىقتىرۋشىسى كاميلا تۇياقبايەۆا.

ونىڭ ايتۋىنشا، جىنىستىق ساۋاتقا قاتىستى ءپاندى مەكتەپ باعدارلاماسىنا ەنگىزۋ ادامنىڭ جاۋاپكەرشىلىكتى سەزىنە بىلۋىنە ىقپال ەتەدى.

«بۇل پاندە تەك جىنىستىق قاتىناس تۋرالى عانا ايتىلمايدى. ونىڭ نە ەكەنى، ساقتانباعان جاعدايدا جۇكتىلىك بولاتىندىعى، وعان قىز بالا دا، ۇل بالا دا جاۋاپتى ەكەنى، ءوز دەنەڭدى قۇرمەتتەۋ، كىم كورىنگەندى جولاتپاۋ تۋرالى ايتىلادى. نەگە قىز بالاعا «سەن ءبىر ادامعا عانا تۇرمىسقا شىعىپ، ءبىر اداممەن عانا جىنىستىق قاتىناستا بولۋ كەرەكسىڭ« دەپ ۇيرەتىپ، ۇل بالاعا نە ءۇشىن ۇيرەتپەيمىز؟ جاساندى تۇسىك جاساتقان قىز بالانىڭ ۇياتسىز ەكەنىن ايتامىز، ال وسى جەردە سوعان سەبەپ بولعان ەر بالا نەگە جاۋاپكەرشىلىككە تارتىلمايدى؟

15-16 جاستان باستاپ قىز بالا مەن ۇل بالا بىر-بىرىنە وزگەشە قاراپ، گورموندار ويناي باستايدى. وسىنداي تابيعات زاڭدىلىعىن توقتاتۋ وڭاي ەمەس. بۇل تاقىرىپتا نەعۇرلىم ەرتەرەك قوزعاساق، نەكەسىز جۇكتى بولىپ قالۋدىڭ، جىنىستىق جولمەن ءقاۋىپتى اۋرۋ جۇقتىرۋدىڭ الدىن الامىز»، - دەيدى ول.

ايتا كەتەرلىگى، دوڭگەلەك ۇستەلدى ق ر دسم «قوعامدىق دەنساۋلىق ساقتاۋ ۇلتتىق ورتالىعى» جانە «دەنساۋلىق ساقتاۋدى دامىتۋ رەسپۋبليكالىق ورتالىعىنىڭ» ۇيىمداستىردى.

---