جوعارى وقۋ ورىندارىنا قۇجات قابىلداۋ باستالدى
بۇگىن ەلىمىزدە جوعارى وقۋ ورىندارىنا تالاپكەرلەردىڭ قۇجاتتارىن قابىلداۋ باستالدى.
ق ر عىلىم جانە جوعارى ءبىلىم ءمينيسترى ساياسات نۇربەك وسى ناۋقاننىڭ قالاي باستالعانىن كورۋ ءۇشىن ل.گۋميليەۆ اتىنداعى ەۋرازيا ۇلتتىق ۋنيۆەرسيتەتىنە بارىپ، ءبىلىم ورداسىنىڭ قىزمەتكەرلەرىمەن، تالاپكەرلەرمەن كەزدەستى.
«بۇگىننەن باستاپ قازاقستاننىڭ بۇكىل وڭىرلەرىندە جوعارى وقۋ ورىندارىنا قۇجات قابىلداۋ ناۋقانى باستالدى. جەرگىلىكتى جوعارى وقۋ ورىندارىنىڭ نەگىزىندە جانە ۇلتتىق تەستىلەۋ ورتالىعىنىڭ نەگىزىندە قۇجاتتار قابىلدانادى. بيىل جالپى ماگيستراتۋراعا، دوكتورانتۋراعا جانە باكالاۆرياتقا 88 111 گرانت ءبولىندى. بۇل بىلتىرعىمەن سالىستىرعاندا 16 پايىزعا كوپ. ولاردىڭ ىشىندە 73 مىڭ گرانت باكالاۆريات باعدارلامالارىنا ارنالعان. بيىلعى باستى ەرەكشەلىك، پرەزيدەنت تاپسىرماسى بويىنشا نەگىزگى باسىمدىق تەحنيكالىق-ينجەنەرلىك ماماندىقتارعا بەرىلگەن. گرانتتاردىڭ 60 پايىزى ينجەنەرلىك، تەحنيكالىق ماماندىقتارعا ءبولىندى. وسى جىلدان باستاپ وسىنداي باسىمدىق ساقتالادى»،- دەدى ۆەدومستۆو باسشىسى.
ونىڭ ايتۋىنشا، قۇجات قابىلداۋ ناۋقانى بۇكىل جوعارى وقۋ ورىندارىنىڭ نەگىزىندە ۇيىمداستىرىلعان.
«كەز كەلگەن ازامات، تالاپكەر كەلىپ، قۇجاتتارىن نە ءوز قولىمەن، نە ۆيرتۋالدى قابىلداۋ ارقىلى تاپسىرا الادى. بۇگىن وزدەرىڭىز كورگەندەي، كەز كەلگەن جوعارى وقۋ ورنى Zoom ارقىلى، Teams ارقىلى ارنايى ۆيرتۋالدى قابىلداۋعا بۇكىل قۇجاتتارىن تاپسىرىپ، كەيىن پوشتامەن جولداۋعا مۇمكىندىگى بار»، - دەدى ساياسات نۇربەك.
سونداي-اق، ول قۇجاتتاردى ونلاين رەجيمدە تاپسىرۋ مۇمكىندىكتەرى تۋرالى مالىمەت بەردى.
«بىرنەشە جىلدان بەرى وقۋعا قۇجاتتى ونلاين رەجيمدە تاپسىرۋ قولدانىستا بار. ياعني، «ەلەكتروندى ۇكىمەت» پورتالى ارقىلى تاپسىراتىن. ونى ءبىز پىسىقتاپ جاتىرمىز. تامىز ايىندا دايىن بولادى. تامىز ايىنداعى ماگيستراتۋرا مەن دوكتورانتۋرا تالاپكەرلەرىن تولىققاندى «ەلەكتروندى ۇكىمەت» پورتالى ارقىلى قابىلدايمىز. كەلەسى جىلعا دا ۇلكەن دايىندىق جوسپارلاپ جاتىرمىز»، - دەدى مينيستر.
ەسكە سالساق، پاندەميادان كەيىن ەلدەگى جوعارى وقۋ ورىندارىنىڭ ءبارى ءداستۇرلى ءبىلىم بەرۋ فورماتىنا كوشىپ، وقۋ اقىلارىن قايتا ناقتىلاعان بولاتىن.
You Might Also Like
-
ادامزات كوروناۆيرۋس سياقتى ىندەتتەرمەن ەرتە زامانداردان بەرى كۇرەسىپ كەلەدى. وسىدان ءبىر عاسىر بۇرىن ورىن العان "يسپان تۇماۋىدا" الەمدە قانشاما ادامنىڭ ءومىرىن جالمادى. تاريحتا بەزگەك، شەشە...
-
اۋرۋعا شالدىققان نەمەسە ورازا تۇتقاندا اۋرۋى اسقىناتىن كىسى ورازا تۇتپايدى. تۇتقان بولسا، اشا الادى. اۋرۋعا قارايتىن كىسى دە اۋرۋ ۇكىمىنە جاتادى، ياعني ناۋقاسقا قاراۋدا قينالاتىن بولسا، تۇتپاۋعا بول...
