InfoHub Logo

سۋدا جۇزە ءبىلۋ - ومىرگە وتە قاجەت. ادام بالاسى ەرتە زاماننان بەرى سۋدا جۇزۋمەن اينالىسىپ كەلەدى. جازعى قاپىرىق، ىستىق كۇندەردە ادامدار جۇزدەپ، مىڭداپ جاعاجايلارعا - وزەن-كولدەردىڭ، تەڭىزدەردىڭ جاعالارىنا جينالادى. سۋدىڭ جاعاسىنداعى تازا، سالقىن اۋا، كۇننىڭ ساۋلەسى، تابيعي كوگىلدىر وسىمدىكتەر دۇنيەسى دەمالىسقا وتە پايدالى. ارينە مۇنىڭ ءبارى، اسىرەسە جاقسى جۇزە بىلەتىن ادامداردى ەرەكشە راقاتتاندىرادى.

ءجۇزۋ دەگەنىمىز سۋدىڭ بەتىمەن نەمەسە ىشىمەن بەلگىلى تەرەڭدىكتە قولمەن جانە اياقپەن ەسۋ قيمىلدارى ارقىلى ادامنىڭ ىلگەرى جىلجۋى. جۇزە بىلەتىن ادام سۋداعى نەشە ءتۇرلى كەدەرگىلەردى جەڭەدى، بىرەۋ-مىرەۋ سۋعا باتىپ بارا جاتسا، ونى قۇتقارۋدى دا بىلەدى.

جۇزۋمەن شۇعىلدانۋدىڭ سپورتتىق جەتىستىكتەرگە جەتۋدە ماڭىزى زور. مىسالى: سۋعا سەكىرۋ، سۋ شاڭعى سپورتى، ەسۋ جەلكەن سپورتى جانە ت.ب. مۇنداي سپورت تۇرلەرىمەن اينالىسۋ ءۇشىن الدىمەن ءجۇزىپ ۇيرەنۋ قاجەت. سۋدا ءجۇزۋدىڭ مىناداي سپورتتىق ءادىس تاسىلدەرى بار. كرول – ەركىن ءجۇزۋ (ەتپەتتەپ جانە شالقالاپ)، براسس جانە باتتەرفلياي (باتتەرفلياي كەيدە دەلفين دەپ تە اتالادى). سپورتتىق ءجۇزۋدىڭ وسى تۇرلەرىمەن شۇعىلداناتىن ادامدار ءجۇزۋ ادىستەرىن تىڭعىلىقتى ورىنداۋعا داعدىلانادى.

شومىلۋ جانە ءجۇزۋ دەنە مۇشەلەرىنىڭ سىرتقى تەمپەراتۋرا وزگەرىستەرىنەن، سالقىننان پايدا بولاتىن اۋرۋلارعا شالدىقپاي، ءتوزىمدى بولۋىن تاربيەلەيدى. وزەن-كولدەردە ءجۇزۋ بولسا، كۇننىڭ شۋاعى مەن تازا اۋا ادام دەنەسىنە كۇشتى اسەرىن تيگىزەدى.

سۋدىڭ ىشىندە ادام سالماقسىز بولاتىندىقتان، دەنەگە كوپ كۇش تۇسپەيدى دە ومىرتقا جوتاسى سوزىلادى، بۇلشىق ەت تالشىقتارى ۇزارادى. سونىڭ اسەرىنەن ادام تۇلعاسى سىمباتتانىپ، قيمىل-قوزعالىسى ەركىن دە اسەم كورىنەدى.

سۋدا ءجۇزۋدىڭ پايداسى:

سۋدا ءجۇزۋ كەزىندە ءسىزدىڭ بارلىق بۇلشىق ەتىڭىز جۇمىس جاسايدى. سۋدا بىرەسە اياقپەن، بىرەسە قولمەن جۇزە المايسىز. ءبارى ءبىر ۋاقىتتا ءسىزدىڭ ءجۇزۋىڭىز ءۇشىن قىزمەت ەتۋى ءتيىس. ءار بۇلشىق ەت تۇرلىشە كۇش الادى. سول سەبەپتى، دەنەڭىزدىڭ بۇلشىق ەتى ءوز فورماسىنا قاراي قالىپتاسىپ، سىمباتتىلىعىڭىز ارتا تۇسەدى.

سۋدا ءجۇزۋ ومىرتقا اۋرۋلارىنىڭ الدىن الادى. قوزعالىس دەنە مۇشەلەرىنىڭ قىزمەتىن ارتتىرىپ، ومىرتقا سۇيەكتەرىنىڭ جانىنداعى كىشكەنتاي بۇلشىق ەتتەردى «تىنىقتىرادى». ومىرتقا باعاناسىنا تۇسكەن اۋىرلىقتى تەجەيدى. سونىمەن قاتار، وستەوحوندروز اۋرۋىنىڭ الدىن الىپ، دەنە ءبىتىمىڭىزدى قالىپقا كەلتىرەدى.

جۇرەك قان تامىرلارىنىڭ جۇيەسى دە سىزگە «العىس» بىلدىرەدى. سەبەبى، ءجۇزۋ جۇرەك سوعىسىنا يگى اسەر ەتىپ، قان اينالىمىن جۇيەگە كەلتىرەدى.

بۇل سپورت تۇرىمەن ماشىقتانعان ادامنىڭ تىنىس الۋ مۇشەسى دە جاقسى قىزمەت اتقاراتىن بولادى. اسىرەسە، كوكىرەك قۋىسى كەڭەيىپ، تىنىسى اشىلادى.  

دەنە تەمپەراتۋراسى قالىپتى جاعدايدان شىقپاي، يممۋنيتەتىڭىز سۋىق تيۋگە، تۇماۋعا قارسى تۇرا الادى.

سونىمەن قاتار، ارتىق سالماقتان ارىلۋعا كومەكتەسەتىنى دە بار. كوپ قوزعالىس پەن ەنەرگيانىڭ جۇمسالۋىنىڭ اسەرىنەن اعزاداعى كالوريا مولشەرى ازايا تۇسەدى. وعان قوسا، ءجۇزۋ كەزىندە ومىرتقاعا تراۆموتولوگيالىق ءقاۋىپ تونبەيتىنىن ەسكەرۋ كەرەك.

جانە دە ءجۇزۋ سپورتى جۇيكەنى جۇقارتىپ، ويدى مىڭ بولگەن كۇيزەلىستەن ارىلتۋعا سەپ بولادى. سۋىق سۋ ادام دەنەسىندەگى جاعىمسىز ەموسيا مەن نەگاتيۆتى كوڭىل-كۇيدى شايىپ اكەتەدى. بويىڭىزعا قۋات بەرىپ، سەرگىتەدى.

---