InfoHub Logo

مال تولدەپ جاتقان كەز بولسا كەرەك. ۇلى جۇزدەگى دوسان اۋلىنىڭ ەسالى دەگەن كىسىسى كەشقۇرىم وڭاشا تۇرعان ۇلكەن ءۇيدىڭ تۇسىنا كەلىپ:

— كىم بار-اۋ؟ — دەسە، ەشكىم دىبىس بەرە قويماپتى. ول اتىنان ءتۇسىپ ۇيگە كىرسە، ۇيدە جان جوق. ءۇي ورتاسىنداعى جەر وشاقتا قالعان تەزەك مازداپ جانىپ جاتادى. دالاعا شىعىپ، ولاي-بۇلاي قاراسا، اۋىل ادامدارى توسكەيدە قوزى ءبولىسىپ ءجۇر ەكەن. ەسالى ۇيگە قايتا كەلىپ، جالعىز ءوزى وتىرا بەرەدى. «وسى بايدى جۇرت ساراڭ دەۋشى ەدى، كۇن بۇرىن نە بار، نە جوعىن ءبىلىپ الايىن» دەپ جان-جاعىنا قاراسا، كەرەگەنىڭ باسىندا مايلى داستارحانمەن بەتىن جاۋىپ قويعان قويدىڭ جارتى ەتى جايۋلى تۇرادى. كوپ كەشىكپەي-اق دالادان باي دا كەلەدى.

— كەشتەتىپ جۇرگەن بۇل قايسىڭ؟

— مەن ەدىم، — دەيدى ەسالى.

وسىلاي ءجون سۇراسىپ بولعان سوڭ، ەكەۋى وتكەن-كەتكەندى ايتىپ ءبىراز وتىرىپ قالادى. الدەن ۋاقىتتا باي:

— مىنا قوناققا نەڭ بار، تاماعىڭدى اس، — دەگەن بولادى.

بايدىڭ ءسوز ساپتاۋىن بۇرىننان بىلەتىن ونىڭ ايەلى:

— ۇيدە ەت جوق ەدى، — دەي سالادى. سول كەزدە ەسالى اڭگىمەنىڭ بەتىن باسقا جاققا اۋدارىپ:

— ياپىرىم-اي، مىناۋ ءۇيدىڭ اعاشىن قانداي ۇستا ىستەدى ەكەن-ا؟ — دەپ ءۇيدىڭ ۋىق كەرەگەسىنە تاڭىرقاپ قاراي بەرەدى.

— ە، جىگىتىم، بۇل — تۇركىستانداعى الكەن ءۇيشىنىڭ قولىنان شىققان ءۇي، — دەيدى اڭقاۋ باي.

— ءوزى نەشە قانات؟

— سەگىز قانات.

— جوق، بايەكە، سەگىز قانات ەمەس، — دەيدى ەسالى ادەيى.

— بۇل ءۇيدى ءوز قولىمنان شاپتىرعان مىنا مەن عوي، سەگىز قانات؟ — دەيدى باي دا ەرەگىسە ءتۇسىپ. سوندا ەسالى:

— ءسىز سەگىز قانات دەيسىز، مەن التى قانات دەيمىن. سەنبەسەڭىز كەرەگەنىڭ باسىن ساناي قويايىق. ءسىز ماڭدايشادان بىلاي قاراي وڭ جاعىن ساناپ شىعىڭىز. مەن سول جاعىن سانايىن. كانە، ءبىر، ەكى، ءۇش، ءتورت... — دەي بەرگەندە، باي:

— ءتۇسىندىم، ءتۇسىندىم. سەنىڭ اڭدىپ وتىرعانىڭ اناۋ ەت قوي. ءاي، قاتىن، اسا عوي ەتىڭدى، — دەگەن ەكەن.

---