InfoHub Logo

بۇگىن ەركە قىز بەن مىسىق عاجايىپ ورمانعا سەرۋەندەۋگە باردى. بۇل ورمانداعى اڭ دا، قۇس تا، ءتىپتى وسىمدىكتەر دە سويلەي الادى. جايقالعان اققايىڭدارى، سامىرسىن، شىرشالارى بار، كوك مايسانىڭ ۇستىندە قىزىلدى جاسىل گۇلدەر جايقالعان عاجايىپ ورمان بۇل.
ەركە قىز مىسىعى ەكەۋى بۇلدىرگەن تەرىپ، سونىڭ قىزىعىمەن ورمانعا تەرەڭدەي ەنىپ كەتتى. كەنەت الدارىنان بۇرىن-سوڭدى كورمەگەن ادەمى كوكوراي شالعىندى جەر شىعا كەلدى. مۇندا گۇلدەردىڭ ءتۇر-تۇرى بار ەكەن. ءبارى شەتىنەن ادەمى. سامال جەلمەن تەربەلىپ، جۇپارلارىن شاشىپ تۇر. ەركە قىز قۋانىپ كەتتى. ءار گۇلدى يىسكەپ، شىر اينالىپ بيلەدى. گۇلدەر دە ەركە قىزدى ۇناتىپ قالعان سياقتى، ءبارى ءان شىرقاي جونەلدى:
اپپاق، سارى، قىزىل گۇل
جايقالامىز تەربەلىپ.
ايالايدى تابيعات،
ەركەلەتەر جەل كەلىپ.

گۇلدى جاقسى كورەتىن،
كەلدى بىزگە ەركە قىز
گۇل سياقتى ەركە قىز،
ەركە قىزداي ەركەمىز.

كەرەمەت! قازاق جەرىنىڭ تاۋ-تاسى دا، ءتىپتى نازىك گۇلدەرى دە اقىن ەكەن عوي!
ەركە قىز بەن مىسىق گۇلدەردىڭ وزدەرىن وسىلاي جىلى قابىلداعاندارىنا ءدان ريزا بولدى. كەنەت قايدان شىعا كەلگەنى بەلگىسىز گۇلدى القاپ ادەمى الا قانات كوبەلەكتەرگە تولىپ كەتتى. ءارقايسى ءبىر-بىر گۇلگە قونىپ ەدى گۇلدى القاپ ءتىپتى قۇلپىرىپ كەتتى.  
-    ايتپاقشى، بۇگىن كوبەلەكتەردىڭ مەرەكەسى عوي، - دەدى مىسىق.
-    راس پا؟ قانداي تاماشا! ءدال مەرەكە كۇنى كەلگەنىمىز قانداي جاقسى بولدى! – دەپ قۋانىپ كەتتى ەركە قىز.
-    ءيا. ءقازىر ولار بي بيلەپ، ارالارىنداعى ەڭ ادەمى قاناتى بار كوبەلەكتى تاڭدايدى. ول كوبەلەكتەردىڭ پاتشايىمى بولىپ سايلانادى. ناعىز قىزىق ءقازىر باستالادى، - دەپ ماڭعازدانا مياۋلاپ قويدى مىسىق.
ەركە قىز بەن مىسىق كوبەلەكتەردىڭ ءبيىن تاماشالاۋ ءۇشىن كوك شالعىننىڭ ۇستىنە جايلانىپ وتىرعانى سول ەدى، بىرەۋدىڭ جىلاعان داۋسى ەستىلدى. ەكەۋى اڭتارىلىپ، بىر-بىرىنە قارادى. جىلاپ وتىرعان كىم بولدى ەكەن؟ ءبىزدىڭ مىسىق قاعىلەز عوي، وتكىر كوزدەرىمەن شەتتە ءوسىپ تۇرعان گۇل جاپىراعىنىڭ استىنداعى جىلاپ وتىرعان كوبەلەكتى بىردەن تاۋىپ الدى.
-    نەگە جىلاپ وتىرسىڭ، سۇيكىمدى كوبەلەك؟ – دەپ سۇرادى بايەك بولىپ ەركە قىز.
-    مەنىڭ دە بي جارىسىنا قاتىسىپ، پاتشايىم بولعىم كەلەدى،  - دەپ ودان ءارى وكسي جونەلدى كوبەلەك. قاتتى جىلاعانى سونشا، قاناتتارى ءدىر-دىر ەتەدى.
-    وندا نەگە مۇندا جىلاپ وتىرسىڭ؟ جارىس ءقازىر باستالادى. تەزدەتىپ بارا عوي، - دەپ ەركە قىز ونى قولىنا الىپ، ۇشىرىپ جىبەرمەك بولدى. ءبىراق قولىنا قونعان كوبەلەكتىڭ قاناتتارىنىڭ جىرتىلىپ قالعانىن بايقادى.
-    مەنىڭ قاناتتارىم جىرتىلىپ قالدى، ۇشا المايمىن، - دەپ جىلاۋىن ۇدەتە ءتۇستى كوبەلەك. قاپ! ەندى نە ىستەۋگە بولادى؟ ەركە قىزدىڭ دا،
-     مىسىقتىڭ دا كوبەلەككە جاندارى اشىپ كەتتى. وعان قالاي دا كومەكتەسۋ كەرەك! ءبىزدىڭ مىسىق اقىلدى عوي. بۇل جولى دا قاراپ قالمادى.
-    ەركە قىز، كوبەلەككە گۇلەردىڭ كۇلتەلەرىنەن قانات تىگىپ بەرەيىك! – دەپ قۋانا مياۋلاپ جىبەردى.
-    الاقاي! تابىلعان اقىل! قانداي اقىلدى ەدىڭ، اپپاعىم! – دەپ ەركە قىز مىسىعىن ەركەلەتىپ قويدى. ەكەۋى بىردەن ىسكە كىرىسىپ كەتتى. شالعىنداعى ەڭ ادەمى گۇلدەردىڭ كۇلتەلەرىن جيناپ اكەلدى. گۇلدەر دە كۇلتەلەرىن ەركە قىزعا قۋانا-قۋانا سىيلادى. جينالعان كۇلتەلەردى بىر-بىرىمەن جالعاپ، ەركە قىز كوبەلەككە ادەمى، ۇلكەن قانات تىگىپ بەردى.
-    ال، دايىن بولدى! قانە، قاناتىڭدى جايشى.
كوبەلەك جاڭا قاناتىن جايىپ جىبەرىپ ەدى، مىسىق تالىپ قالدى. قورقىنىشتان ەمەس ارينە، تاڭقالعاننان. ءبىر گۇل جۇپارىن شاشىپ جىبەرىپ ەدى، قايتادان ەسىن جيىپ الدى. مۇنداي ادەمى قاناتتى بۇرىن-سوڭدى ەش كوبەلەك كورمەگەن شىعار. ءبارى جاڭا قانات كوبەلەكتىڭ جانىنا جينالىپ، ونىڭ قاناتىن تاماشالاپ كەتتى. كوبەلەك تە قاتتى قۋانىپ، ەركە قىز بەن مىسىققا العىسىن ايتتى. سونىمەن، بي سايىسى دا باستالدى. ارينە، گۇلدى شالعىندا قوڭىراۋگۇلدىڭ سىڭعىرىمەن بي بيلەگەن كوبەلەكتەردىڭ اراسىندا كۇلتەلى قاناتى بار كوبەلەك ەرەكشە كورىنىپ، كوبەلەكتەر پاتشايىمى اتاندى.

وسىلايشا ءبىزدىڭ كەيىپكەرلەرىمىز بۇگىنگى كۇندەرىن وتە كوڭىلدى وتكىزدى. بالاقاي، سەن دە قولىڭنان كەلگەنشە قينالىپ جۇرگەن دوستارىڭا كومەكتەس. سوندا سەن دە، دوسىڭ دا قاتتى قۋاناسىڭدار.

---